ኢዩኤሌ ቲንቢቴ 3 - Geeshsha Maxaafa

Kawoteththata Bolla Yida Pirda

¹ Xoossi, «He wode tani Yerusalaameppenne Yuhudappe di7etti ekettida miish ubbaa zaarana.

² Tani kawoteththata ubbaa shiishshada duge Iyoosaafixe zulle woththana; heenkka ta istta bolla pirdana; gaasoykka ta dere Isra7eele asaa kawoteththata giddon laallidi istti biitta gishetti ekkida gishshassa.

³ Istti ba di7i ehida ta dereta gishetti ekkanaas istta bolla saama yeggida; layma maccassata demmanaas attuma nayta aaththi immida; woyne ushshu uyanaas macca nayta aylleteththas bayzida.

⁴ Intteno Xiroose, Sidoonanne Filisxeeme asatoo! Intte ay ooththishe deetii? Intte ta bolla halo kessana qoppeetii? Intte hessa mala qoppiko tanikka kasetada intte bolla halo kessana.

⁵ Ta bira, worqqanne taas diza al7o miish ubbaa intte bonqqi ekkidi intte eeqa keeth gelththideta.

⁶ Yuhudanne Yerusalaame yeletata istta dere dhassafe haassi efidi Girike asas bayzideta.

⁷ «Hekko tani ha7i istti bayzetti dizasoppe istta denththeththada zaarana; intte istta bolla gaththida qohoza ta intte bolla zaara ehana.

⁸ Intte macca naytinne attuma nayti Yuhuda asaas bayzettana mala ta ooththana; isttika haaho deren diza Saabaane asaas aaththi bayzana; hayssa wursa yootiday tana GODAA.

⁹ «Hayssa ubbaa kawoteththatas awajjite! olas giigettite! ola qarata denththeththite! Intte olanchchati ubbay kezidi morkketa oletto!

¹⁰ Maarasha giththa mashsha qoxxite; baaca qasse toora qoxxite; laafaykka bana, ‹Tani mino asa› go.

¹¹ Intteno yuuyi aadhdhanaas diza kawoteththatoo! Intte wurikka eeson kezite! Hirki shoobban issi bolla shiiqite. GODAWU, neni ne olanchchata kiita!

¹² «Kawoteththati ubbay dendidi duge Iyoosaafixe shoobba betto; tani Xoossay intte yuushon diza kawoteththata bolla pirdanaas ta heen uttana.

¹³ Istta iitateththi keehi darides; hessa gishshas kaxxida kaththi baacan cakettiza mala istta cakkite; woyne miththa ayfey gum7ettizason kumidi yedhettiza mala intte istta yedhettite» gides.

¹⁴ Yo7o pirdiza zullen GODAY pirdiza gallassi gakkides; hessa gishshas daro derey heen shiiqi uttides.

¹⁵ He gallas arsheynne aginay dhumana; xoolintteyka poo7enna.

¹⁶ GODAY Xiyoone zumaa bolla Yerusalaamen dishe babisiza ba qaala giiris sissana; saloynne sa7ay qaaxxana; GODAY gidikko ba dere Isra7eeles shiiqi attizaso gidana.

Xoossa Deraa Anjjeteth

¹⁷ «Isra7eele asawu! He wode tani GODAA intte Xoossa gididayssa intte erana; tani geesh gidida ta zuma Xiyoone bolla de7ana; Yerusalaamey anjjettida katama gidana; hessafe guye hara allaga wottadaray izo worajjenna.

¹⁸ «He wode zumati wurikka woyne miththan kumana; zumbullan daro maaththa miizati heemettana; GODAA Keeththafe pulttoy pulttana; Yuhuda deren diza shaafata ubbaa haaththi kumana; Shiixime shoobbay haath kallana.

¹⁹ Gibxe asaynne Eedoome asay Yuhuda asaa bolla gene ooththida gishshas qasseka xillo asaa wodhida gishshas Gibxey bazzo gidana; Eedoomey asi bayndaso gidana.

^20-21 Hessa gakkanawu tani halo kessontta aggida xillota suuththa gishshas halo kessana; Yuhudaynne Yerusalaamey qasse mernaas ta derey de7izaso gidana; tanikka Xoossay Xiyoone zuma bolla de7ana» gides.