ኢዩኤሌ ቲንቢቴ 2 - Geeshsha Maxaafa

Xoossa Yuussa Gallas Bessiza Malata

¹ Xiyoonen zaye zayite; geeshsha zuma bolla waassite! GODAA yuussa gallassi gakkida gishshas biitta bolla dizay wurikka kokkoro.

² He gallassay dhumanne tulala gallassa; shaaranne sakkanna dhuma gallassa; wontta poo7oy eeson zumata gakkiza mala wolqqama booley biitta ubbaan may7ana; hessa malay hayssafe kase hanibeenna; hayssafe guyenkka wodenkka hanenna.

³ He booleti ba sinththan beettidaazi ubbaa tama mala maana; tama laco mala xuuggana; buro istta gakkontta biittay Edene gannate mala cilila biitta shin istti gakki aadhdhida biittay aykkoy baynda bazzo biitta gidana; booleti mishin attida miishshika beettenna.

⁴ Isttas medhay para mala; istta buussay ola para buussa mala.

⁵ Para-gaare giirissa mala giiris sissishe zumata bollara guppeettes; tamay buura miza mala beettida miishsha ubbaa xuuggana; giigettida mino olanchchata salfe mala giireettes.

⁶ Istta be7idi derey kokkorana; asa ayfesoy wurikka babon boottana.

⁷ Ola qarata mala gede sinththe beettes; olanchchata mala dirsa bollara guppi aadhdhana; wurikka sitti giidi gede sinththe baana; ba biza ogeppe hara oge beettenna.

⁸ Issoy issaara sugetettenna; issoy issoy ba oge yeddenna; ba morkke ola miish ubbaa dhayssidi aadhdhi baana; aykkoyka istta teqqenna.

⁹ Istti katamaza worajjana; katama gimbeza bolla istti woxxana; guppi guppidi keeththata bolla kezana; kayso mala maskootera soo gelana.

¹⁰ Biittay istta sinththan kokkorana saloykka qaaxxana; awa ayfeynne aginay dhumana; xoolintteyka poo7o immenna.

¹¹ GODAY ba olanchchata sinththan dada mala guummana; iza olanchchati ay mala daroo! Iza azazo ooththizayti ay mala wolqqamaa! tumappeka GODAA gallassay keehi wolqqama; keehi babisiza he gallassaa danday eqqanay oonee?

Maareteththa Xeys

¹² GODAY, «Ha7ikka gidikko xooman yeehoninne ceecen intte kumeththa wozinappe ha taakko simmite.

¹³ Intte intte kayo bessanaas may7o daaketh xalla gidenna; hessafe bollara intte wozinay meqqiin maarettite; GODAA intte Xoossay kiyanne maariza Xoossa, hanqoska eesotenna; mernaa siiqon izi durenne qaxxayanaas eesotontta Xoossa; hessa gishshas intte izakko simmite.

¹⁴ Oonee erizay GODAA intte Xoossay ba hanqoza zaaridi inttena anjjanaakko, intteka he wode GODAA intte Xoossas kaththa yarshonne ushsha yarsho shiishshandeta.

¹⁵ Xiyoone zuma bolla zaye punnite; dereza ayana shiiqos xeygite; xoomakka awajjite.

¹⁶ Dereza ubbaa issi soo shiishshite; geeshsha duulatas giigsite; cimata xeygite; naytanne buro dhammiza naytakka ubbaa shiishshite; mishiratikka mishira keeththafe attontta kezetto.

¹⁷ GODAAS ooththiza qeesetikka yarsho yarshizasozassinne asi simerettizaso giddon eqqidi yeekketto; GODAWU! Neni ne derezas qadhetta; kawoteththati istta Xoossay awan dizee? giidi nuna kadhanaassinne istti nu bolla miicci kaa7ana mala ne istta ooththofa» getto.

Goday Ba Deraas Immida Hidota

¹⁸ GODAY biittays diza misheteththafe dendidayssan ba derezas qadhettides.

¹⁹ Hessa gishshas GODAY, «Intte kath, woyne ushshinne wogara zayte kallana gakkanaas ta inttes immanaas hayssafe guye kawoteththati inttena baas kaassa miish histtana mala ta isttas aaththa immike.

²⁰ Pudehappe yaana olanchchata ta inttefe haassana; duge bazzo zaara gooddana; sinththati yizayta duge hayqo abban yeddana; guyera yizayta Mediteraane abban yeddana; heen istta ahay zeeqqana; tumappe tani GODAY gita miish ooththadis.

²¹ Biittayee babbofa; GODAY nees ooththida gita miishsha gishshas ufayetta!

²² Intteno biitta bolla diza do7atoo babbofte; kase intte izan heemettiza gadey cililides; miththatikka ayfida; balaseynne woyne miththay keehi daro ayfides.

²³ Intteno Xiyoone deretoo, GODAAN intte Xoossan ufayssi ooththite; izi tumu pirdidi badhdhesa iranne ofinththa ira wogara immides.

²⁴ Intte kase kath bukkiza balen kaththi kumana; woyne ushshinne wogara miththa zaytey kase isttan gum7ettiza ollata kumi palahana.

²⁵ Hayssafe kase wolqqama olanchcha misatiza ta yeddida uusho carkoththo shociza booleti, gumbarotinne gondoti, kase mida kaththaa gishshas ta inttes zaara immana.

²⁶ Intte buro daro miidi kallana; inttes malalisiza miishshata ta ooththida gishshas intte tana GODAA intte Xoossaa galatana; hayssafe guye ta deraa yeellay gakkenna.

²⁷ Isra7eele asatoo tani intte giddon dizayssanne GODAA intte Xoossi tana xalla gididayssanne taappe haray bayndayssa intte erana; hessafe guye ta dereza yeellay gakkenna» gides.

Godaa Gallassa

²⁸ GODAY, «Hayssafe guye tani asa ubbaa bolla ta Ayana gussana; intte macca naytinne attuma nayti tinbite haasayana; cima asaykka agumo agumettana; yelaga naateththati ajjuuta beyana.

²⁹ Hessaththoka he gallassatan taas ooththiza maccassa bollanne attumasa bolla tani ta Ayana gussana.

³⁰ Saloninne sa7an malalisiza miishshata ta bessana; suuththi, tamaynne cuwa tuussi beettana.

³¹ Gita babisiza Godaa gallassay yaanaappe kasetidi arshey dhumana; aginaykka suuth aaththana.

³² GODAA sunth xeygizay wurikka attana; GODAY kase yootida mala Xiyoone zuma bollafenne Yerusalaameppe atoteththi beettana; attanayta garsan GODAY xeygidayti daana» gides.