ኢዩኤሌ ቲንቢቴ 1 - Geeshsha Maxaafa

Booley Gaththida Qoho

¹ Sinththafe hananayssa Xoossi Iyu7eeles yootida qaalay hayssa;

² intte cimati hayssa siyite; Yuhuda deren dizayti wurikka hayssa ezgi siyite. Hayssa mala hanoy kase intte wode gidiin woykko kase intte aawata wode hani erizee?

³ Intte hayssa intte naytas yootite; intte nayti qasse bantta naytas yootetto; nayta naytikka kaalliza yeletas yootetto.

⁴ Gondoy mishin attida kaththaa biitta maate booley mides; izappe attidayssa uusho carkoththo shociza di7o mala booley dhayssides; izappe attidayssa qasse gumbaroy mides.

⁵ Hessafe guye woyne ushshu intte demmontta gishshas yeekkite; intteno maththottizaytoo! Intte dhiskizasoppe beeggidi waassite; intteno wonttan wonttan woyne ushshu uyizaytoo! Camo yeeho yeekkite.

⁶ Qooday baynda booley ola asa mala ta dereza bolla yides; iza achchay gaammo achcha mala; iza gaagina achchay macca gaammo gaagina achcha mala.

⁷ Ta woyne miththa ayfeza mulera dhayssides; balase geetettiza miththa ubbaa menththereththides; miththa haggati mulera booxxana gakkanaas poqoza mulera poqqi denththichides.

⁸ Hessa gishshas izo ekkana giigsidayssi hayqqiin maaqa may7ada yeekkiza geela7oy mala intteka yeekkite.

⁹ GODAA Keeththan yarshos shiiqana kath gidiin woykko woyne ushshay baynda gishshas GODAAS ooththiza qeeseti yeekkeettes.

¹⁰ Goyidi zerida kaththay meli dhayiin woyne miththay tokettidi melida gishshas zaytey dhaydes; hessa gishshas biittaya yeekkawus.

¹¹ Gistteynne banggay haraykka bone kaththi wurikka dhayda gishshas intteno goshshanchchatoo ceecite; intteno, woyne miththata godatikka yeekkite.

¹² Woyne miththatinne balase miththati shullida; oroomaanenne temire miththati, laadeynne hara ayfe ayfiza miththati wurikka melida; hessa gaason addafe ufayssi asappe haakkides.

¹³ Intte intte Xoossa yarsho shiishshiza kath gidiin woykko woyne ushshi baynda gishshas intteno ta Godaa oosanchchata gidida qeesetoo! Ane haa yiidi maaqa may7idi kumeththa omars yeekkite. Intteno yarsho yarshizason ooththizaytoo! Intte, «Wuu! Wuy!» gi waassite.

¹⁴ Dumma xooma gallas awajjite; ayana shiiqos asa xeygite; deren diza cimatanne asaa ubbaa nu GODAA keeththan shiishshidi pude GODAAKKO waassite.

¹⁵ Aye ana! GODAA gallassi matides. Ubbaa dandayza Xoossay dhayssizaaz ehiza gallassi gakkides. He gallassays aayye ana!

¹⁶ Kaththi nu sinththafe dhaydes; ufayssinne ilisi nu Xoossa Keeththafe mule dhaydes.

¹⁷ Zerettida kaththay wuri biitta garsan wooqqi dhaydes; kaththi biittafe dhayda gishshas kase kath woththiza miishshati wurikka mela deettes. Gootaratikka laalettida.

¹⁸ Mehey miza maatay gaden baynda gishshas meheti koshattidi waasseettes; dorsa wudetikka maatay dhayiin daro waaye bolla deettes.

¹⁹ GODAWU! Demba maata ubbaa tamay mida gishshas wora miththaaka tamay mida gishshas ta neekko waassays.

²⁰ Shaafati melida gishshas demban diza maatay wurikka xuugettida gishshas wora do7atikka neekko waasseettes.