ኢዮቤ ማጻፋ 9 - Geeshsha Maxaafa

Iyoobe Haasaya

¹ Iyoobi hizgi zaarides;

² «Ee! Tani hayssa tumu gididayssa erays; gido attiin asi Xoossa sinththan waani xillo gidanaas dandayzee?

³ Izarakka ooni marshettanaas dandayzee? Izi issi shii oyshota oychchizaa gidikko isttafe issinokka zaaranaas dandayzaadey deenna.

⁴ Xoossi eranchchanne wolqqama; oonee izara eqettidi xoonettonttay?

⁵ Akeekontta zumata kokkorsana; ba hanqozankka shirechchi yeggana.

⁶ Xoossi biitta dizasoppe kokkorsana; biitta tuussatakka qaaseththana.

⁷ Awa arshey mokkontta mala ooththanawu dandayees; Xoolinttetikka poo7isontta mala ooththana.

⁸ Oonikka maaddontta dishin salota micciday iza; izi abba dambala bolla hemettees.

⁹ Zardo, Ooriyoninne Piliyaadise geetettiza Xoolintteta, qasseka duge baggara diza daro Xoolintteta, salo bolla medhdhi woththiday Xoossa.

¹⁰ Izi ooththiza malalisiza miishshata nuni pilggidi akeekanawu dandayokko; izi poliza makkalla miishshata nuni qoodanawu dandayokko.

¹¹ «Xoossi ta matara aadhdhikokka ta demmike; haa taakko shiiqikkoka shaakkada erikke.

¹² Izi ba koyidayssa ekkiko oonikka iza diggenna; ‹Ays hayssaththo ooththay?› giidi iza oychchanaas xalizay deenna.

¹³ Xoossay ba hanqozappe guye simmenna; Era7aabe geetettiza abba giddo do7ata maaddizaytikka iza toho garsan gulbatana.

¹⁴ «Histtiin tani izas zaaro waana immana dandayazinaa? Izara marshettanaas ay qaala ta demmanee?

¹⁵ Geesh gida ta beettidaakkoka; ta bolla pirdizaadey tana maarana mala woossana attiin izas zaaro immanaas xalikke.

¹⁶ Ta iza sunththa xeygikko izi zaaro taas immizaa gidikkoka ta magana izi siyana gaada ta ammanettike.

¹⁷ Izi tana gote carkon liiqisana; aykko gaasoykka baynda taas madunththaa ha darsana.

¹⁸ Shempo ta zaarana wodey gakkanaaska taas shemppo immenna; ta shemppon waaye kunththides.

¹⁹ Taas diza wolqqan ta izara baaxetana gontta mala wolqqan izara eqettidi dandayanay deenna; ta mootettada iza laththana gontta mala iza pirdiza asataakko shiishshanaas dandayza asi deenna.

²⁰ Tani geeshshinne xillokoshin ta haasayay tana qohanchcha kessees; ta haasayza haasayati ubbay ta bolla pirdeettes.

²¹ «Aykkoka tani borey bayndaade gidikkoka ta gishshas qoppike; ta shemppoyokka harassetays.

²² Xoossi xillozanne qohanchchazakka dhayssiza gishshas aykko dummateththika deenna ta giday hessa gishshassa.

²³ Asi iita meton wurshin izi geeshsha asa meto qidhees.

²⁴ Biittay iita asata kushen aadhdhi imettishin izi pirdiza asata ayfe goozees; hayssa ooththiday Xoossa gidontta aggiko haray oonee?

²⁵ «Ta layththati woxxizaytappe haa aadhdhi eesoteettes; aykko ufayssika ta demmontta aadhdheettes.

²⁶ Isttika sookke gizayssafe oosettida wogolo mala eesoteettes; baqqi ekkiza golle kafo mala eesoteettes.

²⁷ Tani ta zuuzunththaa balana; ‹Ta sinththaaka kareththo aggada ane poo7isa bessays› giikko,

²⁸ Xoossi tana geesh ooththidi qoodonttayssa tani eriza gishshas metoynne waayey ta bolla gakkana gaada yayyays.

²⁹ Histtiin ta qohanchcha geetetta qoodettidaa gidikko taas hada daaburay aazassee?

³⁰ Tani ta asateththa saamunan meeccizaa gidikko, ta kushezakka keeha geeshshizaa gidikko,

³¹ ha ubbaa ooththiinkka neni duge iita ciimman tana olana; ta may7otikka tana shaatettana.

³² Izi ta mala as gidontta gishshas, pirdiza asataakko biidi pirdettoos gaanawu dandaykke.

³³ Nu bolla ba kusheza gaththi woththidi pirdi nuna shaakkiza asi nu giddon dizaakko,

³⁴ iza teemateththi tana hirgisontta mala Xoossi ba guufeza ta bollafe denththidaakko,

³⁵ tani izas yayyontta haasayanakkoshin; ha7i gidikko ta diza hanon dashe haasayana dandaykke.