ኢዮቤ ማጻፋ 7 - Geeshsha Maxaafa

¹ «Asas biitta duussay baaxe duus deennee? Isttas gallassayka une ooththiza oosanchchata gallassa mala gidennee?

² Isttika kuwa garsan shempanaas amottiza oosanchchatanne ba damoza ekkanaas naagiza une asa mala gidettennee?

³ Ta daaburda aginati taas go7ay bayndayta gidida; meto omarsatikka taas qofa omars gidida.

⁴ Ichchiza wode awude dendandinaasha gaada qoppays; omarsayka gidikko taas gede aduqqees; tanikka wonttana gakkanaas haa hee shirettashe aqays.

⁵ Taas kumeththa asateththay guxunen kumides; taas ashoykka madunxi goggides; taas madunththayka dhuuqqidi uzazees.

⁶ Ta layththata gallassati daththa mooqe xongeththafe eesoteettes; issi hidotay baynda wurseth gakkeettes.

⁷ Ta Godawu! Ta shemppoya peeno mala gididayssa qoppa; hayssafe guye ubbaka lo7o miish demmike.

⁸ Ha7i tana be7izayssi nam7anththo zaaridi beyenna; izi koyzaa gidikkoka tana demmanawu dandayenna.

⁹ Shaaray laaletti dhayzayssa mala hayqqidi duufon biza asi haa simmidi yeenna.

¹⁰ Nam7anththo zaaridi baso simmenna; izaade erizayti ubbay iza balettana.

¹¹ «Hayssafe guye co7u giikke! Taas ayanay ceecidayssafe dendidayssan ta haasayays; ta shemppoya irayettida gishshas zuuzumays.

¹² Hayssa likke naagettizaade ne tana ooththiday tani abbayee? Woykko abba giddon diza do7aayee?

¹³ Ta hiixay tana minththeththees; ta ichchizasoy ta sakoza baleththees gaada ta qoppadis.

¹⁴ Neni gidikko tana agumon yashissaasa; ajjuutankka daganththaasa.

¹⁵ Hayssa metoy darida asateththa tookkada daanaappe ta cuuletta hayqqanayssa doorays.

¹⁶ Hidota qanxxadis; daanaaska ta koykke; taas layththayka qaanth gidida gishshas tana aggaaga.

¹⁷ «Ne soho immanaassinne qoppanaas asi aazee?

¹⁸ Wonttan wonttan pilggana mala, woden wodenkka ne paaccana mala asi aazee?

¹⁹ Cuch mittiza guuththa wodekka taas immikii?

²⁰ Asa kaalettiza Godawu! Tani nagara ooththoyssan neni ay qohettadii? Ays ta bolla ne toora zaaradii? Ays hayssa keena ta nena deexxadinaa?

²¹ Ubbaaka ta nagara atto giikkii? Ta ooththiza qoho taappe diggikii? Ta duufon gelana wodey gakkides; hayssafe guye ne tana koyidaakkoka ta beettike.»