ኢዮቤ ማጻፋ 6 - Geeshsha Maxaafa

Iyoobe Haasaya

¹ Hayssafe guye Iyoobi hizgi zaarides;

² «Ta muuzoteththi geeddaretti uttidaakko aazee dizay! ta metoy ubbay geeddaran geeddaretti uttidaakko aazee dizay!

³ Abba lanqen diza aceppe aadhdhi deexxanakkoshin; hessa gishshas dandayay paccida ta haasayay nena malalisanaas bessenna.

⁴ Ubbaa dandayza Xoossay tana ba yiishshatan caddides; istta marzetikka ta asateththa giddon laalettida; daganththiza Xoossa boshay ta yuushon yuuyi aadhdhides.

⁵ Tumappe hardiday cilila maata demmidi caaggi erizee? Booraykka basso maata demmiko xaaggi erizee?

⁶ Maxiney gelontta mal7ontta kaththi meetettizee? Phuuphphulle haaththi mal7izee?

⁷ Hayssa mala kath maanaas koykke; muusi attiin kushenkka bochchike.

⁸ «Ta amottizayssa Xoossi taas immidaakko aazee dizay! Izi ta waaso siyidaakko aazee dizay!

⁹ Hayssa ubbaafe izas shene gidiin izi tana menththereththi yeggizaakko! Ba kusheza yeddidi izi tana dhayssidaakko!

¹⁰ Shempo immontta ay hargey tana sakkikokka tani ufayssan guppana; tani Geeshshaza qaala ay wodenkka kaddabeekke;

¹¹ «De7on de7ana mala dandayza ay minoteththi taas dizee? Hidotay baynda aggiko ays de7azinaa?

¹² Tani shuchcha mala minoo? Ta asateththayka xarqimalaththo minoo?

¹³ Tana maaddanaas taas aykko wolqqay deenna; taas diza wolqqay ubbay eketichchides.

¹⁴ «Ubbaa Dandayza Xoossas yash aggidaadessinne daaburdaadeska iza laggey izas kiyateth bessanaas koshshees.

¹⁵ Ta ishati gidikko haroy harotti wodhidaappe guye meliza ammanththontta shaafata mala baleththizayta.

¹⁶ Shaafatan balgo balgo shachchi kumees.

¹⁷ Bone aginatan gidikko maayi dhayees; shaafatikka haaththi baynda melata gideettes.

¹⁸ Caana meheta laaggi ogera biza asati haath koshshas ogeppe ke7i bazzo biitta gelidi toylu toylishe dhayeettes.

¹⁹ Teema biittafe biza mandara asati haaththe koyeettes; Saaba dere zal7anchchatikka haaththe demmanaas hidota ooththeettes.

²⁰ Banti ammanetti uttida shaafati melidayssa be7idi hidota qanxxeettes; haaththaako gakkiza wode yiilloteettes.

²¹ Intteka taas hayta ha shaafata mala; ta bolla gakkida metoza be7idi gede guye baqatideta.

²² Histtiin ta inttena hessa woykko hayssa taas immite, woykko intte haarozappe kessidi tana ashshite gadinaa?

²³ Qasse ta morkketa kusheppe tana ashshite; woykko tana waayisizayta kusheppe tana kessi ekkite gadinaa?

²⁴ «Tana tamaarsite; tanikka co7u gaana; ta moorozakka tana bessite.

²⁵ Tuma qaalay camo gidikkoka ekettees; intte walassay gidikko aykkoska go7enna.

²⁶ Intte ta haasaya carko mala qoodeeta; histtiko hidota qanxxida taas zaaro immanaas ays koyeetii?

²⁷ Yi7o nayta bolla saama yeggeeta; intte intte siiqo laggeta bayzanaas miishshan marshetteetii?

²⁸ «Ane tana haa xeellite; intte sinththan ta wordotadinaa?

²⁹ Inttes qoho gidontta mala simmite, tani likke asakko!

³⁰ Tumukka ta inxarsan qohoy beettanee? Ta doonaykka gene miish shaakki eranaas dandayennee?