ኢዮቤ ማጻፋ 5 - Geeshsha Maxaafa

¹ «Iyoobee! Ne xeygiin nees koyanaadey diikko xeyga; nees maado immana mala kiitanchchatappe awayssako xeellay?

² Eeya as yiilloy wodhana; qanaateykka as dhayssana.

³ Eeya asi minnidi dishin beyadis; gido attiin iza aqoy qoppontta dishin Xoossa hanqon laalettides.

⁴ Iza naytikka ba de7ozas ammanththizaaz demmettenna; dubbushankka istta gishshas haasayza as istti demmontta gishshas istta bolla qohoy gakkana.

⁵ Izi zerida kaththaaka koshattida asati maana; haray attiin agunththa giddon mokkidayssaka izas ashshettenna; Saametti uttida asati iza haaroza ekkanaas amotteettes.

⁶ Metoy coo biittafe dendenna; waayeykka gadeppe coo kezenna.

⁷ Tama finxeththi bonqofe dendidi pude finxiza mala, asikka waayes yelettees.

⁸ «Tani nena gididaakko Xoossa woossana; ta meto ubbaa izas qonccisana.

⁹ Izi qooday baynda malalisiza miish, pilggiin gakettontta gita miish ooththees.

¹⁰ Biitta bolla ira bukisees; goshshatakka haaththan shugisees.

¹¹ Kawuyidayta bonchchon dhoqqu histtees; muuzottizayta minththeththidi ufayssees.

¹² Istta oosoy polettontta mala gene asata qofa hada ooththees.

¹³ Cinccata istta gene oosozan zaari oykkees. Gene asata qofaakka eesora dhayssees.

¹⁴ Gallassay isttas dhuma gidees; buro seeta gallassan omars dhuma giddon diza mala istti tattafettana.

¹⁵ Manqota istta morkketa mashshafe ashshees; metotanchchatakka waayisizayta kusheppe kessi ekkees.

¹⁶ Manqotas hidota immees; makkallateththika biitta bollafe dhayssees.

¹⁷ «Xoossi seeriza asi anjjettidayssa; hessa gishshas Ubbaa Dandayza Xoossa seera leqqofa.

¹⁸ Xoossi madunththikokka zaaridi paththees; izi menththees; ba kushen zaaridi koolees.

¹⁹ Usuppun qommo boshappe nena ashshi ekkana; laappunththazanka ay qohoykka ne bolla gakkenna.

²⁰ Kosha layththan izi nena shemppora paxa woththana; ola layththankka izi nena hayqoppe ashshana.

²¹ Xoossi nena iita inxarsafe naagana; boshay ne bolla yiikkoka yayyaka.

²² Wolqqamata qohoynne koshay nena daganththenna; biitta do7ataska ne yayyaka.

²³ Ne goyiza gaden nena shuchchi waayisenna; do7atarakka ne saron daana.

²⁴ Ne keeththan saroy kumanayssa ne shaakka erana; ne mehe xeellishin aqoppe paccenna.

²⁵ Ne zereththay daranayssa ne erana; ne zereththayka demban diza maata mala darana.

²⁶ Kaththi kaxxidi maxettizayssa mala nekka lo7eththa cimmada duufon baana.

²⁷ Nuni hayssa ubbaa pilggidi tumu gididayssa eridos; nenikka akeekada hayssa ooson peysha.»