ኢዮቤ ማጻፋ 41 - Geeshsha Maxaafa

¹ «Neni lewataane geetettiza abba giddon diza do7a mole oykkiza manxakon oykkanaas dandayay? Woykko iza inxarsaa wodoron qachchanaas dandayay?

² Iza siidhezan dafo aaththada, woykko iza gacoza manxakon gelththada, oykkanaas dandayay?

³ Izi, ‹Tana maararkkii!› gi nena woossanee? Woykko lo7o qaalan nena oychchandee?

⁴ Nees mernaas aylle gididi nees ooththanawu izi nees qaala gelanee?

⁵ Asara meeze kafo mala ne iza nenara meezesanee? Woykko nees macca nayta kaassana mala ne qachcha woththanee?

⁶ Mole zal7anchchati iza shammanawu miishshan marshettanee? Woykko qanxxereththidi iza banttas gishettanee?

⁷ Iza galbakka ne koyidasora tooran cadda daakkanaas dandayay? Woykko iza hu7eza hoxe miishshan cadda lukkanawu dandayay?

⁸ Ane neni iza dandayana gidikko kushen bochcha! Izara ne baaxetida baaxe wodenawukka balakka; nam7anththo izara ne baaxetanaas kajjalakka.

⁹ Lewataane geetettiza abba giddo do7ara baaxetidi iza xoonana kajjalos dhaley deenna. iza be7iza ubbay babon kokkorees.

¹⁰ Iza bolla meto gaththana guussi, hessa keena deexo gidikko, histtiin tanara eqettanaas xalizaadey izi baas oonee?

¹¹ Saloppe garsan diza miishshi wurikka taassa; histtiin ta izas zaarana mala taas tal7iday oonee?

¹² Lewataane geetettiza abba do7a gishshas, iza mino wolqqa gishshassinne izas lo7iza bolla gishshas, ta qonccisontta aggike.

¹³ Orde gidida iza galba shooqanaas, woykko iza banqila poqqanawu dandayzay oonee?

¹⁴ Keehi yashissiza achchati diza iza banqilata pooqqana dandayzay oonee?

¹⁵ Izas zokko galbay maarara uttida gondalleta mala; addafe shiddi oykettidayta.

¹⁶ Istti issoy issaara shiphi gida gishshas Istta giddora haray attiin carkoyka aadhdhenna.

¹⁷ Istti ubbayka issoy issaara oyketti uttida gishshas ay miishshika istta shaakkanawu dandayenna.

¹⁸ Izi dhishiza wode xoxolqu giza poo7oy beettees; iza ayfetikka wontta maalado arshe mala poo7eettes.

¹⁹ Iza doonappe tama lacoy kezees; tamaa pinxeththika laalettishe beettes.

²⁰ Penttiza disttey uttida coocen diza afiray cuwattiza mala; iza siidheppe cuway kezishe beettes.

²¹ Izi shempiza shemppoza seelay xiixinththa oyseththees; tama lacoykka iza doonappe kezees.

²² Iza morgen wolqqay kumida gishshas iza sinththay yashissees.

²³ Iza ashoy dila7a gidida gishshas iza bollay birata mala minnees.

²⁴ Izas tiray shuchcha mala mino; gaacciza woxa malakka mino.

²⁵ Ha do7azi dendiza wode wolqqamati attontta babon kokkoreettes.

²⁶ Ay mashshaninne tooran woykko wondafeninne caddizaazan, iza istti caddikokka xoonettenna.

²⁷ Izi birata maqa mala menththereththees; Xarqimalakka musa miththa mala tiifereththees.

²⁸ Iza bolla wondafe xongikokka izi yayyidi baqatenna; Yanbarsha shuchchika iza sinththan ishina mala.

²⁹ Koxe maata mala qoodees; asi iza bolla toora xongishin qidhe miich miiccees.

³⁰ Izas ulo galba hanchchazi izi urqqa giddora bishin biitta maarasha mala bookkees.

³¹ Abba haaththa pentta mala pocisees; oton penttiza zayte mala podhisees.

³² Izi aadhdhi biza ogey poo7isees; abba haaththaaka hoomo coppu histtees.

³³ Izi yash erontta medheta; biitta bolla iza misatiza medhetay mulekka deenna.

³⁴ Keehi gita gidida medhetatakka izi kadhees; izi do7a ubbaa bolla kawo.»