ኢዮቤ ማጻፋ 40 - Geeshsha Maxaafa

¹ Qasseka Xoossi Iyoobes,

² «Iyoobee! Asi Ubbaa Dandayza Xoossara marshettidi laththana nees misatizee? Tanara Xoossara marshettizay nena gidida gishshas ane taas zaara» gides.

³ Iyoobi zaaridi,

⁴ «Godoo! Tani aykko maaddontta laafa asa, hannife guye ta kushen ta doona gordada; co7u guussafe attiin nees ta zaarana zaaroy taas deenna.

⁵ Tani issito gaanayssa gadis; gido attiin taas zaariza miishshi baawa; hayssafe guye ubbaaka ta haasaykke» gides.

⁶ Hessafe guye GODAY gote carko giddon gididi Iyoobes hizgides,

⁷ «Ane adde gidikko dendada gixeta; ta oychchizayssa taas zaara.

⁸ Tana pirda geellasizaade kessada nena xillo as kessanaas dafettay?

⁹ Xoossa wolqqa mala mino wolqqay nees dizee? Xoossa qaala gunththa mala ne qaalay guummanawu dandayzee?

¹⁰ Hessa mala gidikko ane ne bonchchoninne ne gitateththan denda! Ne teemateththinne gitateththa may7a.

¹¹ Otoranchchata beyada kawushsha; ne hanqoza istta bolla guussa.

¹² Ane lo7eththa xeellada otoranchchata ubbaa yeellachcha; iita ooththizayta istti dizason heen dhayssa.

¹³ Istta ubbaa moogo may7on xaaxada issi bolla duufon mooga.

¹⁴ Hessafe guye neni ne wolqqan xoonizayssa tani nees markkattana.

¹⁵ «Tani nena medhdhidayssaththo Horiqe geetettiza do7a medhdhadis; izikka boora mala maata mees.

¹⁶ Izas xeessan diza wolqqa beya; izas ulo giddon diza shaya minoteththa xeella.

¹⁷ Izas goynay Libaanoose ziga miththa mala sitti gidayssa; izas gedaa xaphotikka minonne ordeta.

¹⁸ Iza meqeththatikka xarqimalanne birata marco mala minota.

¹⁹ Ta medhdhida medheta ubbaafe wolqqama; taappe attiin iza xoonanay haray deenna.

²⁰ Wora do7ati ubbay kaa7iza zumay, izas miza miish mokisees.

²¹ Kuway diza miththa garsan, maqqa giddoninne haaththi dizaso care giddon ichchees.

²² Kuway diza miththati iza bantta kuwan genththeettes; shaafa doonan dicciza miththati iza kammeettes.

²³ Shaafa haaththa kixas izi dagammenna; Yordaanoose shaafay keehi kumidi goggiinkka izi yayyenna.

²⁴ Iza ayfeta toyssidi iza oykkana asi dizee? iza siidhekka dafon qachchidi iza oykkanaas dandayzay oonee?