ኢዮቤ ማጻፋ 4 - Geeshsha Maxaafa

Elfaazey Koyro Haasayda Haasaya

¹ Temaane dere as Elfaazey hizgi zaarides;

² «Iyoobee! Issi asi ne bolla wolqqaththi haasaykko izaade ne dandayan ezganee? Haasayanaappe attiin ooni agganee?

³ Neni daro asata tamaarsadasa; daaburda qesetakka minththadasa.

⁴ Kase ne qaalati dhuphettizayta maaddeetteskoshin; neni kokkoriza gulbatetakka minththaasakkoshin.

⁵ Ha7i gidikko metoy ne bolla gakkida gishshas hidotay bayndaade gidadasa; metoykka ne bolla minnida gishshas hidota qanxxadasa.

⁶ Xoossaas ne yayyiza yashshay ammanththizaaz gidennee? Ne suure ogetikka nees hidotata deettennee?

⁷ Xillo as gidi dishin iza metoy gakkidaadey, suure as gidi dishe tim7i gi dhaydaadey, diikko ane qoppa.

⁸ Tani akeekida mala, iitateth goyidi meto zerizayti heytantti ba ooththooro shiishshana.

⁹ Istti Xoossa peenon dhayana; iza hanqo dambalan istti dippi gi dhayana.

¹⁰ Iitati gaammo mala xaaggana; ba qaala dhoqqu ooththidi waassana; Xoossi gidikko isttas achchaa menththereththana.

¹¹ Gaammoy shankkatidi mizaaz dhayda wode hayqqiza mala isttika hayqqana; gaammo maratikka laalettiza mala istta naytikka laalettana;

¹² Gallassafe issi gallas xuura gidida kiitay taakko yides; hessa he kiitaza saasukeththan ta siyadis.

¹³ Asay omars wolqqama dhisko seerida wode, tana iita agumoy agunththides.

¹⁴ Baboynne kokkorsi tana oykkiin, taas meqeththati ubbay kokkorana mala ooththides.

¹⁵ Ayanay ta sinththara aadhdhides; dagamappe dendidayssan ta hasay eqqides.

¹⁶ Heenkka issi miishshi eqqi dizayssa beyadis; tishshi ooththa xeelladis shin izi aazakko shaakka eranawu dandayabeekke. Hessafe guye co7u gidasohoppe hizgiza qaala siyadis,

¹⁷ ‹Xoossa sinththan xillo gidi beettanaas dandayza asi dizee? woykko bana medhdhidayssa sinththan geeshsha asi beettanee?

¹⁸ Xoossi baas ooththizaytan ammanettontta aggiko, ba kiitanchchata bollaka izi mooro miish demmizaaz gidikko,

¹⁹ histtiin haradhdhoy montta dishin laalettiza istta yochchay biittafe gidida urqqafe oosettida keeththa giddon dizayta bolla waani ammanettanee?

²⁰ Maaladoppenne omarsafe giddon istti meqerettana; erettontta dishin istti mernaaskka dhayana.

²¹ Tole dhishkey shodettichchida dunkaane mala istti erateththi baynda hayqqana.›