ኢዮቤ ማጻፋ 39 - Geeshsha Maxaafa

¹ «Genessati yeliza wode ne eray? Wusha geetettiza do7ay miixattidi yelishin beya eray?

² Istti seebbatidi ay lagge wode gam7izaakko awude yelizaakko ne eray?

³ Gulbati miixattishe bantta marata istti yelizay awudekko ne eray?

⁴ Istta marati woran diccidi minneettes; isttafe shaakettidi beettes; bidaappe guye bantta aayetakko simmettenna.

⁵ Hardiday yeda daana mala ooththiday oonee? Istta qashoppe birshiday oonee?

⁶ Bazzoza isttas dizaso histta immadis; maxiney diza demban istta woththadis.

⁷ Kachchi dariza katamatappe haakkidi deettes; guyera laaggizayti qoodizayssa dosettenna.

⁸ Zumata bollan pe7eettes; heen baas gidiza cilila maata koyeettes.

⁹ «Menththi nees ooththanaas eeno gaandee? Woykko ne zedhen eeno gi eqqandee?

¹⁰ Menth waaxada gosh goyanawu dandayay?

¹¹ Iza minoteththan ne ammanettay? Nees deexxiza oosoza izi ooththana mala izas agga eray?

¹² Izi neekko simmi yaana mala, ne kath bukkiza baley dizaso miiyanayssa ammanettay?

¹³ «Yanchchay ba qefe eeson miccawus; gido attiin sangano kafo mala piradhdhuku.

¹⁴ Yanchchay ba phuuphphulle biittan yeggawus; biitta giddon uttidi ho7ana mala ooththawus.

¹⁵ ‹Heera aadhdhizaadey ba tohon menththees; wora do7atikka yedhdhi liiqiseettes› gaada qoppuku.

¹⁶ Ba ciyetas allaga mala menxe iitawus; izi daaburay hadan attikokka wuda guukku.

¹⁷ Hayssaththo izis cinccateth dhayssada iza erontta mala ooththiday tana.

¹⁸ Iza dendada woxxiza wode, banara gaade woxxiza togata bolla miiccawus.

¹⁹ «Iyoobee! Paratas wolqqa immidaynne adussa gamma istta morgen mayziday nenee?

²⁰ Parata boole mala guppizay istti harbuqishe asata daganththana mala ooththizay nenee?

²¹ Parati ola demba togetti bishe, bantta wolqqankka ceeqettishe, loddan adaraaso doommeettes.

²² Yash giza miish mulekka erettenna; ay miishshika istta daganththenna; istta bolla giththa mashsha; denththidaakkoka guye simmettenna.

²³ Istta toggiza olanchchati oykkida ola miishshati, wawaci gishe bantta giddon giirettishe siyetteettes.

²⁴ Zayey zayetishin co7u gi eqqanawu dandayettenna; yiilloninne hanqon kumidi ola demba woxxeettes.

²⁵ Zayey punettida taybon ufayssan wayqeettes; haakon dishe ola peeno ereettes; Ola kaaleththizayti immiza azazozanne olanchchata ceeqeteththa siyeettes.

²⁶ «Xiloy salo bolla paallizay, izi ba qefeza dugeha miccizay ne erateththanee?

²⁷ Golley pude ke7idi dhoqqasohon ba keeth keexxizay ne azaziinee?

²⁸ Golley zaallata giddon aqees; kelka giddon ba keeth keexxees; zaallatikka izas qotettizaso gideettes.

²⁹ Heen uttidi baas miza miish xeellees; iza ayfetikka haakon dizaaz demmeettes.

³⁰ Hayssa malan golleti mizaazi dizaso shiiqeettes; istta ciyetikka suuth uyeettes» gides.