ኢዮቤ ማጻፋ 36 - Geeshsha Maxaafa

¹ Eelihuy ba haasaya gujjidi hizgides;

² «Xoossa gishshas tani haasayana haray diza gishshas guuth dandayada ta gizayssa siya.

³ Tani darosoppe demmida erateththan, tana medhdhida Xoossi Xillo gididayssa tani nees erisays.

⁴ Ta qaalay wordo gidonttayssa neni lo7eththa era; nenara haasayana taas kumeththa erateththi dizayssa era.

⁵ «Tumukka Xoossi wolqqama; gido attiin oonakka kadhenna; izi ubbaaka akeekees.

⁶ Izi iita asata paxa woththenna. Metotida asatas gidikko suure pirda pirdees.

⁷ Xoossi xillo asata naagees; kawota mala bonchcho algan utisees; mernaas istta dhoqqu dhoqqu histtees.

⁸ Gido attiin asi sansalatan qashettiko, woykko meto giten oykettiko,

⁹ istti ba otoreteththan ooththida nagara qonccisees.

¹⁰ Istti seera siyana mala istta hayththaa doyees; istti bantta iita oosaappe simmidi maarettana mala azazees.

¹¹ Istti Xoossas azazettidi ooththiko, banttas attida layththa dureteththaninne ufayssan ongana.

¹² Gido attiin iza siyontta ixxiko istti olan wurana; istti bantta eeyateththan dishe hayqqana.

¹³ «Bantta wozinara Xoossa kaddizayti qaxxayettida mala daana; izi istta qaxxayshinkka istta kaaleththizayti woossettenna.

¹⁴ Istti ba poliza iita laymateththa boshan dhayana; bantta yelagateththa layththankka mulqqetti hayqqana.

¹⁵ Xoossi meton un7ettizayta istta metaappe ashshana; istta gakkida metaan isttas timirte immana.

¹⁶ «Hayssa ha wodezan Xoossi nees qoppizay nena ne diza metaappe kessidi lo7o kaththi kumida maaddan efanaassa.

¹⁷ Ha7i gidikko ne ooththida mooraappe dendoyssan ne bolla pirdettida gishshas, nees bessiza qixaate eko bolla daasa.

¹⁸ Oonikka nena dureteththa daron cimontta mala; matta7enkka nena baleththontta mala naagetta.

¹⁹ Nees diza aqotaynne godateththi daro gidikkoka nena metoppe ashshettenna.

²⁰ Deraa dizasoppe dhayssiza dhuma wodey yaana mala amottofa.

²¹ Neni meto giddon paacettizay hessa gaason gidida gishshas simmada nagara ooththontta mala naagetta.

²² «Xoossa wolqqay ay mala gitakko akeeka; Xoossi ubbaafe aadho astamaare.

²³ ‹Hayssa ooththa› giidi Xoossa azaziza asi woykko, ‹Iita ooso ooththadasa› giidi iza walassizay oonee?

²⁴ Izi ooththiza oosaa gishshas asay ubba wode mazamuren galatizayssa mala, nenikka iza oosaas yeththan galata.

²⁵ Asa zereththi ubbay Xoossa oosaa be7ides; asay tishshi ooththi haakon be7ides.

²⁶ Xoossa gitateththa pilggidi gakkanaas nuni dandayokko; iza layththa qoodaykka nu erappe bolla.

²⁷ «Xoossi haaththa abbafe pude salo efees; zaaridikka ira saloppe duge bukisees.

²⁸ Ira shaarappe kessidi wolqqama ira asas bukisees.

²⁹ Gido attiin Xoossi shaara wostti miccizaakko, wolqqanththa giddon uttidi izi waani haasayzaakko ooni eranawu dandayzee?

³⁰ Xoossi abba ciimmateththa kammidi izi ba yuushon wolqqanththa wostti laallizaakko xeella.

³¹ Hayssa mala ooththidi Xoossi ba deraa ayssees; asay miza daro kaththaaka mokisees.

³² Wolqqanththa izi ba kushen oykkees; oykkidi ba dosida bagga baana mala azazees.

³³ Daday wolqqama iray yaanayssa malatees; mehetikka ira uushoy yizayssa ereettes.