ኢዮቤ ማጻፋ 34 - Geeshsha Maxaafa

¹ Eelihuy ba haasaya gujjidi hizgides;

² «Intteno aadho eranchchatoo! Ta inttes haasayzayssa siyite; intteno eranchchatoo ta haasaya ezgite.

³ Inxarsi kaththa mal7o shaakki erees; hessaththoka hayththi yo7o shaakki erees.

⁴ Tumu gidida yo7o ane shaakki eroos; lo7o gidida miishshika issife tamaaroos.

⁵ «Iyoobi, ‹Tani xillo shin Xoossi tana suure pirda diggides.

⁶ Tani tumanchchashin wordanchcha mala qoodettadis; ta aykkoka moorontta dashe paxontta madunththan waayettays› gides.

⁷ Iyoobe mala Xoossa bolla qilccizaadey beettandeesha?

⁸ Izi iita ooththizaytara laggetees; izas peyshayka iita laggetara.

⁹ ‹Xoossa ufayssana giidi oosoy as aykkoka maaddenna› gees.

¹⁰ «Akeekiza asatoo ane tana ezgite! Iita oosoy Xoossafe; bala oosoy Ubbaa Dandayza Xoossafe haakko!

¹¹ Xoossi asas izaade ooso mala immees; izas izaade hemeththa mala ooththees.

¹² Ubbaa Dandayza Xoossay mulekka iita miish ooththenna; ay asaska suure pirda geellasenna.

¹³ Xoossasi biitta hadara immidaadey deenna; iza alame bollaka shuumidaadey deenna.

¹⁴ Xoossi ba ayanazanne ba shemppoza; baakko zaari ekkana koyidaakko,

¹⁵ asho may7iday kumeth dhayana; asa zereththika duge biittan simmana.

¹⁶ Neni akeekizaa gidikko hayssa siya; ta nees haasayzayssa ezga.

¹⁷ Suure pirda ixxizaadey dere ayssanaas dandayzee? Neni xillonne wolqqama Xoossa nagaranchcha kessay?

¹⁸ Kawota intte dhalleketa; shuumetakka intte iita gaanay oonee?

¹⁹ Ubbatikka iza medhetata gidida gishshas izi shuumeta shaakki maaddenna; duretakka manqotappe shaakkenna.

²⁰ Istti leela giddoth qoppontta hayqqana; ubbay kokkori dhayana; wolqqamatikka oona kusheykka bochchontta kichchana.

²¹ «Xoossi asa ubbaa tanggoza xeellees; issaa issaa hemeth kaalleettes.

²² Iita asati qotettana mala girdi gida dhumay deenna.

²³ Xoossi asa bolla pirdanaas bare immenna.

²⁴ Wolqqama daannata daannateththafe denththanaas, isttasohon hara woththanaas, aykko oyshay shiiqontta izi hessaththo ooththees.

²⁵ Izi istta oosaa eriza gishshas issi omars istta daannateththafe dhayssana.

²⁶ Istti ooththida makkallateththa gaason ubbaa asa sinththan makkallanchchata qaxxayees.

²⁷ Izi istta qaxxayizayssi istti iza kaallizayssa aggida gishshassa; iza azazotakka istti kadhida gishshassa.

²⁸ Istti manqota un7eththida; pude Xoossako waassana mala ooththida. Xoossika manqota waasoza siyides.

²⁹ Xoossi co7u giikko oonee iza bolla pirdanay? Izi ba zokko zaarikko oonee iza beyanay?

³⁰ Hessaththoka Xoossas yayyontta deraa un7eththiza kawoy deraa bolla dendiko iza oonee digganay?

³¹ «Iyoobee! Neni ne nagara Xoossas paaxada zaara nagara ooththike ga qaala geladii?

³² Ta ooththida nagaray awayssako tana tamaarsa; ta mooridaa gidikko zaarada izaththo ooththike! gadii?

³³ Histtiin neni maarettanaappe ixxis gaada neni shiishshiza qofa mala Xoossi ne amoza nees polana mala ne koyay?

³⁴ «Tana siyiza asati akeekiza eranchchatikka,

³⁵ ‹Iyoobi erateththi baynda haasayees; hu7ey baynda haasayata haasayees› geettes.

³⁶ Iita asata zaaro mala zaariza gishshas Iyoobi wurseththi gakkanawu paacettidaakko aazee dizay!

³⁷ Nu giddon wogappe kare ke7ides; Xoossa bolla kadhe darssides; ba nagara bollaka makkallateth gujjides» geettes.