ኢዮቤ ማጻፋ 31 - Geeshsha Maxaafa

Iyoobi Ba Wurseththa Haasaya Polides

¹ «Lo7o maccassako xeellada amottontta mala; tani ta ayfetara caaqo geladis.

² Bollan de7iza Xoossay asas ay qaada immandeesha? Salon diza Ubbaa Dandayza Xoossafe asas imettida gishay aazeeshaa?

³ Iita asa bolla qohoy, nagaranchcha asa bollaka dhayoy gakkanayssi erettidaaz gidennee?

⁴ Xoossay ta ooththizayssa ubbaa beyennee? Ta hemetakka shaakki erennee?

⁵ Tani wordo haasaydaa gidikko, asakka baleththidaa gidikko;

⁶ Xoossi tana suure geeddaran geeddaro. Tani xillo gididayssa shaakki ero.

⁷ Ta suure ogeppe ke7idaa gidikko, Ta ayfey be7ida ubbaa ta wozinay amottidaa gidikko, qasseka ta kushey nagaran tunidaa gidikko,

⁸ tani zeridayssa hara asi mo. Ta caarechchazikka kumeththi shodetti oletto.

⁹ «Ta wozinay hara macca amottidaa gidikko, ta shooroza machcho laymatanaas iza pengen ta zuggidaa gidikko,

¹⁰ ta machcha hara asas gaaccu; qasseka hara addey izira zin7o.

¹¹ Hayssika keehi tuna; Wogankka qaxxayssiza nagara.

¹² Ha nagaray tama mala xuuggiza gishshas ta hayssa ooththidaakko ta aqota xuuggi dhayssanakkoshin.

¹³ «Maccanne attuma gidida ta aylleti tana mootiin istta mootoza ta kadhada aggidaa gidikko,

¹⁴ Xoossi tana pirdiza wode tani waananee? Qasse izi tana oychchiza wode tani ay zaaro immanee?

¹⁵ Ta aayey ulon tana medhdhidayssi ta aylletakka medhdhiday iza gidennee? Nuna ubbatakka aayi ulon medhdhiday iza deennee?

¹⁶ «Manqoti tana woossiin ta digga erikke; Qasseka am7e maccassata minththeththontta agga erikke.

¹⁷ Yi7onne yitto nayta aggada ta kath tarkka mabeekke.

¹⁸ Tani ta yelagateththafe doommada tani istta aawa mala dichchadis, ta de7o layth ubbaan am7e maccassata maaddadis.

¹⁹ May7oy dhayiin meegoy wodhizaade; woykko metoppe dendidayssan kallo dizaade beyada,

²⁰ ta dorsata iskefe oosettida may7o ta mayziin, izaade ho7iin tana zaari galatontta aggida wodey deenna.

²¹ Tani mooton istta laththanayssa erada aaway baynda nayta naaqqidaa gidikko,

²² ta kushey hasheppe ke7o. Ta qeseykka kurezappe koldo.

²³ Tani Xoossa hanqos yayyiza gishshassinne iza teemateththaas yayyiza gishshas Hayssa mala yo7ota ooththanawu ta dandaykke.

²⁴ «Tani taas diza aqotan ammanettabeekke. Woykko payya worqqaka taas ammanettiza miish ooththabeekke.

²⁵ ‹Taas diza aqoy darides; Tani dureteththafe dendidayssan daro miish demmadis› gaada ufayetta erikke.

²⁶ Arshe poo7oza beyada, agina lo7eteththa beyada,

²⁷ ta wozinan istta geemara bonchchabeeke; qasseka ta kushe micca yeerada isttas goynnabeekke.

²⁸ Tani hayssa mala ooththidaakko salon diza xoossa kaddo gidida gishshas hayti ha oosoti ta bolla pirda ehiza nagarata.

²⁹ «Ta morkketa kundeththaan tani ufayettabeekke; iita miishshi istta bolla gakkishinkka miiccabeekke.

³⁰ ‹Ta morkketi dhayetto› ga qanggada nagara ooththabeekke.

³¹ Tani ubba wode imaththa mokkizayssa taso aylleti ta gishshas markkatteettes.

³² Tani ta keeththa kare ogera aadhdhi biza mandaras doya woththadis. Hessa gishshas gadey qammiin yida imaththi karen ayssa erikke.

³³ Tani ta mooro genththabeekke; hara asata mala ta nagaraakka qottabeekke.

³⁴ Tana asa daroy yashissininne soo asata kadhoy daganththiin tani tason co7u gaada qotettida wodey deenna.

³⁵ «Ta gizayssa siyizaadey beettereneshin! Tanikka teqe qaala shiishshanakkoshin! Ubbaa Dandayza Xoossay ta gizayssa zaaro izi immo! Tana mootiza mootanchchay tana mootizayssa xaafi shiishshiin ta beyarkinaashin!

³⁶ Woyto mala tani ta hashen tookkanakkoshin; kallachcha malakka ta hu7e bolla goxxana.

³⁷ Daannateththi diza asa mala Xoossa sinththan yayyontta eqqada ta ooththida ubbaa qonccisa yootanakkoshin.

³⁸ «Asa gade wogay baynda bonqqa ekkada tani goyidaa gidikko,

³⁹ he gadaa godata ta mishisidaa gidikko, aykkoka isttas immontta dashe mokkida kaththa tani midaa gidikko,

⁴⁰ he ta goyiza goshshason diza gistte gishshas agunththi, bangga gishshas sharafay mokko» gides. Iyoobi ba haasaya hayssan polides.