ኢዮቤ ማጻፋ 30 - Geeshsha Maxaafa

¹ «Istta aawati taas dorsa wudeza heemmiza ta kanatara montta mala istti ta kadhiza asatakkoshin; ha7i gidikko layththan taappe naatiza asati ta bolla qilcceettes.

² Isttas wolqqay ixxida gishshassinne istta bollay gilqida gishshas aykkoka tana go7ettenna.

³ Metoppenne kosha daroppe dendidayssan bazzo biitta bi biidi miththa xapho maxeththi gancceettes.

⁴ Maxine mala mal7iza bazzon mokkiza dumma dumma miththa hayththata maxeettes; mal7ontta sankkara xapho qorereththi meettes.

⁵ Asi kaysota waassidi gooddizayssa mala isttika deraa giddofe gooddeettes.

⁶ Istti bantta duussaso haaththi baynda shaafa giddon, asi baynda bazzo biittaninne kelka giddon bookettida gongolotan dosay baynda de7ida.

⁷ Woray dizaso yuuyi yuuyi wora do7ata mala waasseettes; wora garsan issi bolla shiiqetti aqeettes.

⁸ Bantta biittafe xurqafen shocetti goodettida gishshas lo7o sunththinne wozinay bayndayta gididi deettes.

⁹ Ha7i qasse istta nayti yeththan tana qidheettes; tani istta giddonkka miiceteththas attadis.

¹⁰ Tana shaatettidi taappe haakkeettes; aykko yeellayka baynda ta sinththan cutetteettes.

¹¹ Xoossay ta wolqqa daabursidi tana kawushshida gishshas istti qasse bixalay baynda para mala ta bolla dhoodhu dhoodheettes.

¹² Taappe ushachcha baggara yeda diccidayti ta bolla dendida; tana oykkanaas woximade woththida; tana giddoththida.

¹³ Taas aadhdhizaso dhayssidi tana wodhana koyeettes. Istti hayssaththo ooththanayssa digganaadey deenna.

¹⁴ Di7oy menththi gelizayssa mala isttika tana cuggi gelida; ubbaaka menththereththidi ta bolla yida.

¹⁵ Gita dagamay tana gakkides; taas diza bonchchoy carko mala aadhdhides; ta attana giza hidotay shaara mala dendi dhaydes.

¹⁶ «Ta shemppoya keeha ceecadus; hayqoska matadus.

¹⁷ Omars kumeth ta meqeththati hargen waayetteettes; sakozikka taas shemppo immenna.

¹⁸ Tana sakkiza wolqqama sakoza gaason ta may7oy gundi moorettides; qoodhe xunththa shamize mala tana cuulli oykkides.

¹⁹ Xoossi tana duge biittan olida gishshas tani gudullanne bidinth misatadis.

²⁰ Xoossoo, ta nena woossadis; gido attiin ne taas zaarabeekka; ta eqqada neekko woossadis; neni gidikko ne sinththa taakko zaarabeekka.

²¹ Ne taas addafe menxe iitadasa; neni ne gita wolqqankka tana gooddadasa.

²² Ne tana denththada carko bolla woththadasa; izi tana yuushshana malakka ooththadasa; gote carkoyka tana shirechchi shirechchi yeggees.

²³ Asa ubbaas qaada gidida hayqos ne tana aaththada immanayssa ta erays.

²⁴ «Issi metotida uray maado demmanaas ba kushe miccidi woossishin tumappe ay asikka iza qohenna.

²⁵ Tani metotida asatas yeekkabeekkinaa? Manqotaska mishettabeekkinaa?

²⁶ Lo7o miish demmana ga ta naagishin iita miishshi tana gakkides; poo7oy yaana ga ta naagettishin taas gallassay dhumides.

²⁷ Ta wozinay daro ceecides; ay saroka demmabeekke; meto gallassatikka ta bolla gakkida.

²⁸ Ta bollay awa xuussan gidontta muuzoteththan karexxides; duulata asa sinththan eqqada maado taas oychchays.

²⁹ Asappe shaakettada worakanatas isha, guttotas lagge gidadis.

³⁰ Taas galbazi karexxidi dendides; taas bollazikka mishan xuugettides.

³¹ Tani ta ufays isttan qonccisiza bagananne zayey ha7i ta kayottada kessiza zilassa qaala sissiza miish gidida.