ኢዮቤ ማጻፋ 3 - Geeshsha Maxaafa

Iyoobi Ba Yelettida Gallas Qanggeth Iyoobe Haasaya

¹ Hayssafe guye Iyoobi haasaya doommides; ba yelettida gallassaa,

^2-3 «Tani ta aayey ulon medhettida omarsayanne tani yelettida gallassaya qanggettidayta gidetto!

⁴ He gallassay dhuman laametto; Salo Xoossay iza qoppofo; Poo7oy mulekka izan beettofo.

⁵ Shaarumaninne girdi gida dhuman kamettidayssa gido; shaaray kammiin dhumay iza poo7o mitto.

⁶ He gallassa omarsayo girdi gida dhumay kammo; layththa gallassatara issife taybettofo; aginata qoodan geli qofettofo.

⁷ He gallassa omarsay aykkoy bayndaaz gido; ufayssa qaalaykka izan seetettofo.

⁸ Lewataane geetettiza do7a qaaseththanaas dandayzayti, gallassata qanggizayti, he gallassayo qanggetto.

⁹ He gallassa omars bakkale xoolintteti dhumetto; poo7o hidotay izan beettofo; wontta xalqqey izan xalqqofo.

¹⁰ Ta ayfetappe meto genththana, ta aayey ulo ta bolla gordontta aggida gishshas he gallassay qanggettidayssa gido.

¹¹ «Ta aayey ulon dashe haaththe gida attidaakko aazee! Ta aayey uloppe ke7ida mala ays hayqqabeekkinaa?

¹² Gulbateti tana mokki ekkanaas, dhanththatikka tana dhanththanaas ays beettidoo?

¹³ Ha7i tani saron ichchidaakko, dhiskadakka shemppo demmanakkoshin.

¹⁴ Ha7i laaletti beettizayta baas keexxida biitta kawotaranne zorizaytara ta dhiskada shemppo demmanakkoshin.

¹⁵ Ba keeththa worqqaninne biran kunththida; daannatara ta issife shempanakkoshin.

¹⁶ Qasseka ays biitta garsan moogettida awucaya, woykko issi gallassa poo7o mulekka be7ontta naa mala ays gidabeekkinaa?

¹⁷ Heen iitata waayisoy attana; daabursiza ooson de7idayti shempana.

¹⁸ Qashetti diza asatikka saro demmana; bana oosisiza asata hanqo qaala siyanayssafekka attana.

¹⁹ Laafatinne gita asati issife beettana; aylletikka heen ba godatappe wozzettana.

²⁰ «Xoossi un7o bolla dizaytas poo7o, duussazi camo qofan kumidaades de7o ays immizee?

²¹ Hayqo laamotizaytassinne qotetti diza aqoppe aaththi koyidi demmonttaytas de7o ays immizee?

²² Duge duufon gelishe ufayettizaytas de7oy ays imettizee?

²³ Izi biza ogey izaadefe geemettidaadessinne Xoossi gordi woththida asas poo7oy ays imettizee?

²⁴ Yeehoy taas kath gidides; waasoykka taas goggiza haaththa mala gidides.

²⁵ Ta yayyida miish ta bolla yides; ta dagammidayssika ta bolla gakkides.

²⁶ Ta giddon hirgay xalla diza gishshas saroy, woppaynne shemppoy deenna» gi qanggides.