ኢዮቤ ማጻፋ 29 - Geeshsha Maxaafa

Iyoobi Wurseththan Shiishshida Magana

¹ Iyoobikka ba haasaya sinth gujjidi hizgides;

² «Taas ha7i de7ozi kase Xoossi tana naagiza wodeza mala gididaakko tana ay mala ufayssandeeshaa!

³ He wode dhuma giddora ta bishin Xoossi taas poo7isishin tani poo7on hemettaysikoshin.

⁴ Xoossa maadoy ta keeththaa kase naateteththa wode naagizayssaththo ha7ikka naagidaakko aazee dizay?

⁵ Ubbaa Dandayza Xoossay tanara diza gishshas ta nayti ubbay ta yuushon deetteskoshin.

⁶ Tani toho maaththan meecettanaashe gakkanaas daro maath demmayskoshin; wogara miththati mela biittankka tokettidi di7o mala goggiza daro zayte taas immeetteskoshin.

⁷ Katama penge achchan diza dubbusha baada duulatan ta uttiza wode,

⁸ naateththa nayti tana be7idi, bonchchos ta sinththafe issi bagga geettesishin; cimatikka ta bonchcho gishshas ba uttidasohoppe dendi eqqeettesishin.

⁹ Haasayshe diza dere kaaleththizayti tana be7idi bantta kushetan ba doona doona oykkidi co7u geetteskoshin.

¹⁰ Dere daannatikka tani dizason co7u geettesishin; isttas inxarsi oykettiin haasayaykka istta xooneeskoshin.

¹¹ Tana siyida ubbay nashshides; tana be7ida ubbay galatides.

¹² Hayssika haniday tani manqota woosa siyada istta ashshizayssanne yi7o nayta ta maaddiza gishshassa.

¹³ Hayqqana matida asata ta maaddiza gishshas tana istti anjjida; am7e maccassata ta maaddiza gishshas ufayssan yexxida.

¹⁴ Xilloteth may7o mala may7adis; suure pirdaka kaabba mala gopha may7adis; qoobe malakka hu7en woththadis.

¹⁵ Qooqetas ayfe, wobbetaskka toho gidadiskoshin.

¹⁶ Manqotas aawa, ta erontta asataskka apakatokoshin.

¹⁷ Gene asa banqila menththadis, izi bonqqi ekkidayssaka iza doonappe yegisadis.

¹⁸ «Tani, ‹Ta layththay ancco mala dariin tani tason diza mala bonchchon hayqqana› gadiskoshin.

¹⁹ Xaphoti ubba wode haaththe demmiza malanne haggatikka xaazan cililiza miththa malakkoshin.

²⁰ Ubba wode ta bonchchettida mala dayskoshin; ta wolqqayka ubba wode ooraxeskoshin.

²¹ Asay ta zoreza laamotan co7u giidi ezgees.

²² Ta haasayay istta aliza gishshas taappe guyera haasayza asi deenna.

²³ Goshshanchchay badhdhesa ira demmanawu amottizayssa mala isttika ta haasaya siyanawu bantta doona doydi naageetteskoshin.

²⁴ Ta miicca bessishin istti ufayettetes; ta sinththay poo7ishin xirphotida istta sinththay birshettees.

²⁵ Kase ta istti koyida mala ayssayskoshin; ba ola asa kaaleththiza kawo mala ta istta kaaleththadiskoshin; istti muuzottishin tani istta minththeththayssikoshin.