ኢዮቤ ማጻፋ 28 - Geeshsha Maxaafa

Aadho Erateth Nashshanaas Shiiqida Ginxo

¹ «Tumappe biitta garsan diza ma7idineti bookettidi bira ke7izasoynne worqqay seeri oosettizasoy dees.

² Biratay biittafe beettes; xarqimalay ma7idine shuchchafe seeridi ke7ees.

³ Asay dhuma kanththidi, duge biitta giddo bookki gelidi haakki dizasoza duge wodhdhidi girdi gida dhuma giddon ma7idine shuchcha koyeettes.

⁴ Asi dizasoppe haakkidi, asa tohoy yedhdhi eronttaso gakkeettes. Heenkka ciimma olla bookkeettes; wodoro bollara kuulloti kuulloti wodhidi asappe shaaketti barkka ooththeettes.

⁵ Biittay meetettiza kath immees. Izas giddoy taman seeridi shiretti shiretti wodhdhees.

⁶ Semppere geetettiza al7o shuchchay biittan diza shuchchata giddon beettees; he biitta giddonkka worqqay beettees.

⁷ Gede ma7idinezakko efiza oge xilloyka erenna; ankkota ayfeykka beyibeenna.

⁸ Iita do7ati he sohoza yedhdhibeettenna; gaammoyka iza baggara aadhdhibeenna.

⁹ Asi gade goyishe mino shuchchata ba kushen denththees; zumatakka xaphoppe shiri yeggees.

¹⁰ Zaallaka phalqidi iza giddora aadhdhanaas oge kessees; al7o gidida ma7idine shuchchatakka demmees.

¹¹ Shaafata pulttota teqqees; biitta giddon qotan diza miishshata qoncce kessees.

¹² Histtiin aadho erateththi awappe beettizee? Akeekasikka dizasoy awaa?

¹³ Aadho erateththi shemppora paxa diza medhetati diza biittan beettuku; izis tuma waagakka eriza asi deenna.

¹⁴ ‹Wogga gita abbayka ta giddon duukku; abbayka tanara duukku› gees.

¹⁵ Erateththi geeshsha worqqan shamettuku; izi waagaykka biran heregettenna.

¹⁶ Aadho erateththi ofire geetettiza worqqafe, margidenne semppere geetettiza al7o shuchchatappe aadhdha bonchchettidaaro.

¹⁷ Worqqaynne geeshsha heregay izira ginattettenna; xintta worqqafe oosettida geexeykka izo laammana.

¹⁸ Bonchchettida heleloynne almaaze geetettizayti aadho erateththara ginattettenna; aadho erateththa gatey luule geetettizayssafekka bolla.

¹⁹ Tophaaziyoone geetettiza Tophphiya biitta inqquyka izira ginenna; keehi geeyida worqqafekka aadhdhawus.

²⁰ «Histtiko erateththi awappe yazee? Akeekaykka awappe beettazee?

²¹ Shemppora paxa diza medhetatappe geemmidaaro; salora piradhdhiza kafotikka koyidi izo demmettenna.

²² Dhayoynne hayqoy, ‹Nu izi gishshas erizay woren xalla› geettes.

²³ Aadho erateththako efiza ogezanne iza dizasoza erizay Xoossa xalla.

²⁴ Izikka sa7a gaxa kumeth demmees; saloppe garsan dizayssa ubbaa beyees.

²⁵ Izi carko wolqqa ooththida wode wogga gita abba izi makkida wode,

²⁶ irassinne wolqqanththara diza dadas woga woththida wode,

²⁷ Xoossi erateth be7ides; paacci xeellidi izo bonchchides; pilggi be7idi minththi woththides.

²⁸ He wode asas, ‹Hekko erateth guussi Xoossas yashshateththa; akeeka guussi iitappe haako› gides.»