ኢዮቤ ማጻፋ 27 - Geeshsha Maxaafa

Iyoobe Haasaya

¹ Iyoobikka ba haasaya sinththawu gujjidi hizgides;

² «Suure pirda diggidi ta shemppoyo addafe camo ooththida; Ubbaa Dandayza De7o Xoossa sunththan caaqqays;

³ Xoossi tana shemppora woththida wodey gakkanaas,

⁴ ubbaaka iita qaalay ta doonappe ke7enna; ta inxarsankka wordo haasaykke.

⁵ Intte haasaydayssi wuri likke gaada mulekka ekkike; ta hayqqanaashe gakkanaas suureteththan minna eqqanayssa aggike.

⁶ Tani ta xilloteththan minna eqqana attiin xilloteththa aggike; shemppora paxa diza layththa ubbaan ta wozinay ha miishshan sidhenna.

⁷ «Nagaranchchata bolla pirdettiza mala ta morkketa bolla pirdetto; tana ixxizayta bollaka gene asata bolla pirdettiza mala pirdetto.

⁸ Xoossi istta shemppoyo istta ashoppe shaakkidi istta layththa qanxxida wode Xoossa kaddida asatas ay hidotay daandee?

⁹ Metoy istta bolla yiza wode Xoossi istta waasoza siyandee?

¹⁰ Ubbaa Dandayza Xoossan istti ufayettandettoo? Woden wodenkka Xoossa sunththa xeygandettoo?

¹¹ «Xoossa wolqqay ay mala gitakko ta inttena tamaarsana; Ubbaa Dandayza Xoossay qoppi woththoyssa ta inttefe qottike.

¹² Inttenikka hayssa ubbaa ereeta; histtiin hayssa hada miish ays haasayeetii?

¹³ «Hekko Ubbaa Dandayza Xoossay iita asinne genanchchati ekkana laatay hayssafe kaallizayssa.

¹⁴ Iza nayti tiripikkoka olan wurana; iza zereththatikka kaththi dhayiin koshattana.

¹⁵ Hessafe attidayti hargen wurana; am7etikka isttas yeekkettenna.

¹⁶ Iita asi bira biitta mala shiishshanawu, may7oka mana biitta mala dooranawu dandayees.

¹⁷ Gido attiin iita asi shiishshida may7oza xillo asi may7ana; izi shiishshida biraakka geeshshati gishetti ekkana.

¹⁸ Izi keexxiza keeththatikka achcharo keeththa malanne kath naagizaadey aqiza gaabba mala laalettana.

¹⁹ Iita asi wurseththa wode dure gididi ichchees; izi beeggiza wode gidikko iza aqotay ubbay dhaydes.

²⁰ Dagamay iza bolla di7o mala qoppontta dishin gakkana; giddoththika gote carkoy iza denththi efana.

²¹ Arshey mokkizaso bagga carkoy izasoppe iza pitti dhayssana.

²² Izi baqatidi atti baanaas baaxetikkoka carkozi qadheteththi baynda iza bolla gede minnana.

²³ Carkozi iza bolla kushe baqqides; izi dizasoppe wayqeththan pixiri yeggides.