ኢዮቤ ማጻፋ 24 - Geeshsha Maxaafa

¹ «Ubbaa Dandayza Xoossay ays ba pirda immana gallassa baribeennee? Izas ammanettidayti awude gakkanaas iza pirda qaala naagettandettoo?

² Iita asati zawa laalleettes; kaysi ehida dorsata heemmeettes.

³ Yi7ota hare bonqqeettes; am7e maccassaya boora oyththadus giidi banttas ekkeettes.

⁴ Manqota shaatettidi coo ogeppe gooddeettes; istta sinththafe baqatidi qotettana mala ooththeettes.

⁵ Manqoti bazzon diza hardida mala, bantta naytas kath koyana ke7idi daabureettes.

⁶ Unetidi haratas kath shiishshizayta gideettes; iita asata haaro gidida woyne tokkizasohozan geedon attida pushulo maxeettes.

⁷ Kumeththa omars kallo ichchi aqeettes; mooce ashshiza may7oy isttas deenna.

⁸ Zuma bolla bukkiza iran istta asateththay musees; aqizasoy dhayiin zaalla gars shiiqi aqeettes.

⁹ Aaway hayqqida nay isttas aylle gidana mala aayey dhanth diggidi bonqqeettes; metotidayssa naaza ba aco gishshas giidi oyso ekkeettes.

¹⁰ Manqoti aykko may7oy baynda paxa kallo ooson geleettes. Kaththa shiisho wode mirqqeza tookki miiyishe banttas gafan hayqqeettes.

¹¹ Iita asata gaden wogara ayfeppe zayte kesseettes; woyne miththa ayfeppe cajje ageettesseshin istti gidikko saametteettes.

¹² Katamatan hayqqanaas tooqiza asati gootareettes; madunxida asatikka maado oyshon waasseettes. Xoossi gidikko istta bolla oosettida geneza beyibeenna.

¹³ Poo7o ixxiza asati deettes; poo7oy aazakko erontta gishshas poo7o oge kaallettenna.

¹⁴ Shempo wodhiza uray wonttontta dendidi manqotanne metotanchchata wodhees; omarsika kaysos kezees.

¹⁵ Layma uray gadey omarsanayssa naagettees; oonikka be7ontta mala ba sinththa goozeettes.

¹⁶ Kaysoti kaysotanaas omarsara keeth bookki geleettes; gallas gidikko qotetti pe7eettes. Poo7oka ixxeettes.

¹⁷ Dhumara shiroteththi istta ufayssiza gishshas ubbaasikka girdi gida dhumay isttas wontta maalado mala.

¹⁸ «Gidikkoka istti haaththa bolla beettiza hoomo mala guuththa wodes xalla istti beettana. Istta biittayka qanggettidayssa gidana; istti woyne miththa tokkizasohoza oonikka beenna.

¹⁹ Shachchi ho7on maayidi dhayzayssa mala si7ooleykka nagaranchchata baakko bonqqa ekkana.

²⁰ Istta aayeti ubbay istta dogana; istta ashozakka guxuney maana; iita asati qofettokona; hessaththoka miththa mala meqerettana.

²¹ Hayssi ubbay istta bolla gakkiday istti yelontta maynida maccassata bonqqida gishshassinne istta azinati hayqqida maccassatas aykko qadheteththika bessontta gishshassa.

²² Gido attiin Xoossi ba wolqqan daannateththan diza asata diggana; isttas de7oy giiga misatikkoka istta duussas ammanththiza miishshi deenna.

²³ Xoossi istta saron daana mala ooththikokka, istti biza oge ubbaa tishshi histti xeellees

²⁴ Iita asati guuththa wodes duretana; gido attiin eesora sharafa mala shulli dhayana; shulla kaththa mala buucettana.

²⁵ «Hayssa mala gidenna geetettiko tani wordanchchatanne ta haasayda qaalay likke gidonttayssa oonee ammanththanay?»