ኢዮቤ ማጻፋ 23 - Geeshsha Maxaafa

Iyoobe Haasaya

¹ Iyoobikka hizgi zaarides;

² «Ha7ikka ta wozinay camo qofaninne zuuzunththan kumides; gencecan ta woossiinkka iza kushey ta bolla deexxida mala dees.

³ Izi dizasota eridaakko ay mala dosazinaashin; gede izi dizaso gakkidaakko ta ay mala ufayettaneeshin;

⁴ ta maganaa ta izas shiishshanakkoshin; ta mishaza maarara ta izs shiishshanakkoshin.

⁵ Taas imettiza zaarozakka ta eranakkoshin; tana izi ay gaanaakko ta eranakkoshin.

⁶ Histtiin Xoossi ba gita wolqqara tana pirdandeshaa? Akkay; ta gizayssa izi ezgana.

⁷ Heenkka suure asi izara marshettana; taas pirdiza Xoossay mernaas tana naxa kessana.

⁸ «Gido attiin ta arshey mokkiza bagga biikko heen izi deenna; arshey wulliza baggaka simmiko iza demmanawu dandaykke.

⁹ Izi gidikko pudehan ba oosaa ooththees; tani gidikko iza beyanawu dandayabeekke; duge bagga simmadakka iza demmanawu dandayabeekke.

¹⁰ Izi ta tanggo ubbaa erees; tana izi paaccikokka tani worqqa mala geesh gida dishin izi tana demmana.

¹¹ Ta tohoti izi dosiza ogetara beettes; baleththon hadirsika ushachchika giikke.

¹² Tani iza azazotappe ke7ikke; iza qaalaakka ta miza qumappeka aaththada ta wozinan naagadis.

¹³ «Izi barkka bana danday dees; izara eqettanay deenna; izi ba dosidayssa ubbaa ooso dandayees.

¹⁴ Ta bolla izi qoppidayssa ubbaa polana; hayssa misatiza daro qofati deettes.

¹⁵ Hessa gishshas iza sinththan eqoy keehi tana keehi yashshees; ta hayssa qoppada yayyadis.

¹⁶ Xoossi taas wozinay daaburana mala ooththides; Ubbaa Dandayza Xoossay tana daganththides.

¹⁷ Girdi gida dhumay ta ayfeta goozikkoka; sakkanna dhumay ta haasayontta mala tana diggibeenna.