ኢዮቤ ማጻፋ 22 - Geeshsha Maxaafa

Elfaaze Haasaya

¹ Temaane dere as Elfaazey hizgi zaarides;

² «Asi Xoossa go7anawu dandayzee? Haray attoshin era as gidikkoka go7azi izaadesafe attiin Xoossas gidenna.

³ Ne xilloteththi Ubbaa Dandayza Xoossaa ay go7anee? Wosoy baynda ne de7ozi iza ay maaddanee?

⁴ Histtiin ne bolla izi pirdidaynne hayssaththo nena hanqiday neni Xoos yayyiza gishshassee?

⁵ Hayssi ubbay nena gakkiday ne iitateththi darida gishshassinne ne nagaray zaway bayndayssa gidida gishshas gidennee?

⁶ Issi gaasoykka baynda ne ishatappe oyso ekkadasa; qasse istta may7o qaara ekkada istta kallo ashshadasa.

⁷ Gafidinne saamettidi daaburdayta kaththinne haath diggadasa.

⁸ Ne gadaadenne wolqqama as gidada izan diza bonchcho as gidikkoka,

⁹ Neni am7e maccassata mela kushe yeddadasa; yi7o naytikka bana ayssana de7oza dhayssadasa.

¹⁰ Hayssa gaason nena oykkana woximadey nena yuuyi aadhdhides; ne ezgontta metoy nena daganththana.

¹¹ Nena Xeeloy metana gakkanaas nees dhumides; di7o haaththika nena meeccides.

¹² «Xoossay dhoqqa salon dizayssa gidennee? Xoolintteti aykkoka dhoqqasohon diikkoka izi isttafe bollara diidi istta xeellees.

¹³ Neni gidikko, ‹Xoossi ay erizee? Girdi gida dhuman izi waani nu bolla pirdanawu dandayzee?

¹⁴ Salo bollan izi simerettishin dhippi gida shaaray iza kammiza gishshas izi beyanawu dandayenna› gaasa.

¹⁵ «Nagaranchchati simerettiza beni ogeza ne kaallay?

¹⁶ Isttika wodey gakkontta sinththara boshan shocettida; di7onkka meecettidi xaphora dhayda.

¹⁷ Isttika Ubbaa Dandayza Xoossa, ‹Nuuppe ne haakka; ne nuus ay ooththanaas dandayay?› gida.

¹⁸ Gidikkoka istta keeththa dureteththan kunththiday Xoossa. Hessa gishshas tani iita asata qofa ekkike.

¹⁹ «Kiya asati iita asati qaxxayettishin be7idi ufayetteettes; suure asati istta bolla qilcceettes,

²⁰ ‹Tunkka nu morkketi dhayda; istta haarozi kumeth taman xuugettides.›

²¹ «Hessa gishshas Iyoobe nenateththaa Xoossas haarisa; izarakka ne saron da; ne hayssa ooththiko lo7o miish demmana.

²² Xoossi nees immiza timirtaa ekka; iza qaalakka ne wozinan woththa.

²³ Nenateththaa ne Ubbaa Dandayza Xoossaako ne zaaridaakko, ne kase mala hanana; ne sooppe iita ooso digga.

²⁴ Worqqa gudullan ola; ofire worqqa shaafa shuchcha mala wora ola.

²⁵ He wode Ubbaa Dandayza Xoossay nees worqqanne muuruta bira gidana.

²⁶ He wode Ubbaa Dandayza Xoossaan neni ufayettana; izan ammanettada ne daana.

²⁷ Ne izakko woossiza wode izi ne woosaa siyana; ne adinettidayssa izas gaththana.

²⁸ Ne qofay ubbay nees polettana; nees oge ubbay poo7o gidana.

²⁹ Xoossi otoranchchata kawushshana; ashketa gidikko izi ashshana.

³⁰ Nenikka suure wozinay dizaade gidikko Xoossi iita ubbaafe nena naagana; ne kushetikka qoho oosoppe geesh gidikko Xoossi nena ashshi ekkana.»