ኢዮቤ ማጻፋ 21 - Geeshsha Maxaafa

Iyoobe Haasaya

¹ Iyoobikka hizgi zaarides;

² «Ane ta haasaya wozinappe ezgite; hayssi intte tana minththeththida mala inttes qoodettana.

³ Issito haasayana mala taas gishi immite; hessafe guye intte koyida mala tana qidhanawu dandayeeta.

⁴ «Tani asho may7ida asa bolla mishettazinaa? Histtiin taas dandayontta aggiko izan aazi malalisizee?

⁵ Ane taakko ha xeellite; haasayay inttena xoonanaashe gakkanaas ta hanozi inttena shaaphees.

⁶ Tani qoppishin tanakka daganththees; ta asateththaaka yashshan kokkorisees.

⁷ «Ays iita asata layththay aduqqidi istta haaroykka daridi biitta bolla dizee?

⁸ Ays istta naytinne nayta nayti diccidi lo7i dishin beyizoo?

⁹ Istti aykko hirgay baynda saron deettes; Xoossafe boshay istta bolla gakki erenna.

¹⁰ Istta mehetikka issi metoy baynda yeletteettes; isttas miizatikka awucayontta yeleettes.

¹¹ Bantta nayta dorsa wude mala heemmeettes; istta naytikka guppi guppi kaa7eettes.

¹² Karabe baqqishe, diiththi diixxishe, dinke punnishe ufayssan yexxeettes.

¹³ Bantta layththa wogeteththaninne ufayssan aaththeettes; waayettontta ha biittafe hayqon shaaketteettes.

¹⁴ «Hessi hessaththo gidi dishin istti Xoossa, ‹Nuuppe haakka; ne oge eranaas nu koyokkon› geettes.

¹⁵ ‹Nu izas goynnana mala Ubbaa Dandayza Xoossay izi oonee? Nu iza woossiin izi nuna ay maaddanee?› geettes.

¹⁶ Istti hessa gizay istta kushen diza haaroy wuri istta wolqqan isttas shiiqida misatiza gishshassa. Tani gidikko iita asata qofa ekkike.

¹⁷ «Histtiin iita asatas xomppey to7i erizee? Boshay istta bolla gakki erizee? Xoossika istta bolla hanqetti erizee?

¹⁸ Istti happa mala carkon bidasoy gudulla mala gote carkon istti pitetti dhayda wodey dizee?

¹⁹ Intte, ‹Aawati qohida qohon Xoossi nayta hanqettees› geeta; ane Xoossi nagaranchchata qaxxayo; hessaththo hankko bantta qoho istti akeekanawu dandayeettes.

²⁰ Nagaranchchati bantti ooththida qohon bantta qixaate ekketto; ubbaa dandayza Xoossi ba hanqoza istta bolla eho.

²¹ Asi hayqqidaappe guye ba naytas qoppi erizee?

²² «Xoossi gita asata bollaka pirdana; histtiin asi iza pirda tamaarsana dandayzee?

²³ Issi issi asati bantta layththa wurseththi gakkanaas aykko metoy istta bolla gakkontta minotanne hargey bayndayta gididi

²⁴ istta bollay ordidi kayshida mala, istta meqeththaykka shicida mala hayqqeettes.

²⁵ Harati gidikko yiillonne camon kumida mala meton oykettida mala aykko lo7o miish be7ontta hayqqeettes.

²⁶ Ubbayka duge duufon gelidi biitta gideettes; guxuneykka istta laattana.

²⁷ «Be7ite! Intte tana qohanaas qoppidi intte qachchida geneza ta erays.

²⁸ Intte, ‹Hayssa gita addaasoy awanee? Nagaranchchaza duussasoy awanee?› geeta.

²⁹ Mandara asata oychchibeekketii? Istti inttes markkattida markkateththaa intte ekkeketii?

³⁰ Heyti, ‹Iita asata bolla boshay yiza wode qohoy istta gakkenna; Xoossa hanqoy qoncciza wode istti atti baana› giidi haasayda.

³¹ Iita as iza iitateththaa gishshas walassizay oonee? Iza iita oosoza gishshas iza qaxxayanay oonee?

³² Izi hayqqidaappe guye iza aha tookki ekkidi duufon efeettes; iza duufoykka naageettes.

³³ Shoobban diza biittay izas giiga gidees; asati ubbayka iza kaalleettes; addafe daro asatikka izappe sinththara beettes.

³⁴ «Histtiin intte hada gidida yo7ora tana minththeththanaas ays qoppeetii? Intte taas immiza zaaroti ubbay wordo.»