ኢዮቤ ማጻፋ 19 - Geeshsha Maxaafa

Iyoobe Haasaya

¹ Iyoobi hizgi zaarides;

² «Intte tana awude gakkanaas waayisandetii? Awude gakkanaas yo7on taas meqeth menththandetii?

³ Hekko intte tana tammuto cayeeta; tana kawushshishekka yeellatekketa.

⁴ Tumukka tani balettidaa gidikko ta balay tana xalla qohana.

⁵ Tumu intte inttena dhoqqisidi ta kawushshateththaa inttes marshe miish ooththeeta.

⁶ Gidikkoka hayssa ubbaa metoza ta bolla gaththidaynne, gite giddo tana yeggiday Xoossa gididayssa intte erana mala ta koyays.

⁷ Ta qohettadis gaada woossiin tana siyiza as demmabeekke; ta qaala dhoqqu ooththada magannikokka suure pirda demmabeekke.

⁸ Xoossi taas ogeza gordida gishshas aadhdhanaasoy deenna; ta baanaasozakka dhuman gordides.

⁹ Ta bonchchoza ta hu7eppe qaaridi tana kawushshides.

¹⁰ Ta asateththa Ubbasora qoxereththidi mulera laallides; taas diza hidota xaphoppe shodettidi kundiza miththa mala ooththides.

¹¹ Xoossi tana hanqettidi gita meto ta bolla gaththides; baas morkke mala tana qoodides.

¹² Tana dhayssanaas ba oosanchchata kiittides; taas dunkaaneza yuuyi aadhdhidi tana giddoththida.

¹³ «Xoossi ta ishati taappe haakkana mala ooththides; tana eriza asati ubbay tana asa dere as kessida.

¹⁴ Ta dabboti taappe haakkida; ta laggetikka tana balida.

¹⁵ Tani tason imaththateth mokka ekkidayti ubbay tana balida; ta garadeti tana imaththa mala qoodida; allaga malakka xeellida.

¹⁶ Tani ta oosanchchaza xeygishin izi taas koyenna; «tana maaddarkkii» ga ta waassishinkka ero geenna.

¹⁷ Ta machcha taappe ke7iza peenoza shaatettadus; ta ishatikka hararettida.

¹⁸ Qeeri naytikka tana kadheettes; tana be7iza wode ta bolla qilcceettes.

¹⁹ Taas mata laggetikka tana shaatettida; ta siiqoti ta bolla morkke gidi dendida.

²⁰ Taas ashozi wuriin galbazi meqeththara oykettides; tana shiishshiin attadis.

²¹ «Ta siiqotoo! Xoossa kushey tana shocida gishshas ane zay taas mishettite! Taas qadhettite!

²² Xoossi tana gooddoyssa mala intteka tana aazas gooddeetii? Hayssa gakkanaas intte tana waayisidayssi gidennee?

²³ Hayssa gakkanaas ta haasayda qaala akeekizaynne maxaafan xaafiza asi dizaakko tana ay mala ufayssaneeshin!

²⁴ Iskirtoninne irsaasen xaafettidi woykko shuchcha bolla woocetti uttidi mernaas daana mala ooththidaakko ay mala tana ufayssandeeshin!

²⁵ Gido attiin tana ashshizayssi paxa de7iza mala wurseththa woden tana wozzanaas biitta bolla izi eqqanayssa tani erays.

²⁶ Taas galbazi meetetti wurikkoka tani ta asateththafe shaakettada tani Xoossaa beyanayssa erays.

²⁷ Hara as gidontta izakka tani ta hu7en ta ayfera beyana; ta wozinayakka he gallassayo keehi laamotees.

²⁸ «Ta siiqotoo! Tana walassidi waayisanaas ‹Hayssa metoza izi barkka baas ehides› gidi haasayeeta.

²⁹ Xoossa hanqoy mashshan qaxxayeteththan gaththiza gishshas mashshay inttena montta mala naagettite. Xoossa pirday dizayssaka erite.»