ኢዮቤ ማጻፋ 18 - Geeshsha Maxaafa

Belidaade Haasaya

¹ Shuha dere as Belidaadi hizgi zaarides;

² Iyoobee! Ne ays hayssa mala haasaya darsay? Ane ezga; nunikka haasayoos.

³ Neni nuna ays meheta mala qooday; neni ays nuna tulleta mala akeekontta as ooththa xeellay?

⁴ Neni hanqettiko nena qohaasa attiin ne hanqozan biittay mela attenna. Zaallatikka ba dizasoppe qaaxxettenna.

⁵ Nagaranchcha xomppey to7ana; tama lacoykka nam7anththo beettenna;

⁶ Iza dunkaane giddon diza poo7oy to7ana; poo7ozikka dhumana.

⁷ Izas mino tanggoy qaammi qaammi baana; gene qoppizaade qofay iza zaari kundisana.

⁸ Izi barkka biidi woximaden gelana; iza tohoykka giten qaxettana.

⁹ Woximadey iza qirphe oykkana; heenkka waaxi ashshana.

¹⁰ Sa7a bolla yarde wodoroy micettides; iza ogenkka woximadey giigettides.

¹¹ «Yashshi iza giddoththides; guyera kaalli kaalli goodereththees.

¹² Iza wolqqay koshan wurides; boshaykka iza dhayssanaas giigettides.

¹³ Hargey iza asateththa gilqisana; hayqoykka mulera ekki baana.

¹⁴ Hirgay baynda ammanetti diza keeththafe izi goodettana; as ubbaa haariza hayqoy iza ekkana.

¹⁵ Iza keeththan ay miishshika attenna; izi aqizasozankka diine tamay laalettana.

¹⁶ Xaphoppe meliza miththa malanne haggatikka meqerettiza miththa mala gidana.

¹⁷ Biitta bolla iza qoppiza asi deenna; iza goobateththika biittafe dhayana.

¹⁸ Izi Poo7osoppe gede dhuman goodettana; biitta bollafe izi kichchana.

¹⁹ Iza dabbota giddofe iza laattana yeletay beettenna; iza baachchanka zarey izas attenna.

²⁰ Ushachcha baggaranne hadirsa baggara diza asay; iza bolla gakkida metoza gishshas keehi babbidi kokkorana.

²¹ Ay wodekka iita asata wurseththay hessa mala; Xoossas yayyontta asa qaaday hayssa.»