ኢዮቤ ማጻፋ 17 - Geeshsha Maxaafa

¹ «Ta ayanay daaburdes; ta daana layththayka polettanawu matides; duufoykka tana naagees.

² Tana qidhizayti tana yuuyi aadhdhida; ta ayfeykka istti ixxizayssa xeellees.

³ Ta Xoossawu! Neeppe attiin taas eqqanay haray deenna; neni ne hu7era taas waase gida.

⁴ Istti pilggidi akeekanawu dandayontta mala istta qofa gordadasa; hessa gishshas istti xoonana mala ooththofa.

⁵ Miishshe demmanawu giidi ba laggeza aaththi immiza asa nayta bolla gomey gakkana.

⁶ «Xoossi tana asas kaassa miish ooththides; asay izaade bolla cuttiza asa mala gidadis.

⁷ Afunththafe dendidayssan ta ayfeti doljumida; kumeththa ta asateththayka eesho mala gidides.

⁸ Xillo asati hayssan dagamettida; geeshshati Xoossa ammanontta asata bolla hanqettida.

⁹ Gido attiin xilloti tuma ogeppe kare ke7ettenna; geeshshati minoteththa bolla minoteththi gujettees.

¹⁰ «Intte ubbayka nam7anththo yiidi ta sinththan marshettiko; intte giddofe issi akeekara diza as demmike.

¹¹ Ta layththay wurides; ta qofaynne taas wozina amoy hada gidi attides.

¹² Hayti ha asati omarsa gallas geettes; poo7oza qasse dhumana hanees geettes.

¹³ Hayssafe guye taas diza qaaday duge hayqqida asati dizaso duufon wodheththa; yaan dhumason tani ta hiixa ongana.

¹⁴ Duufo, ‹Ta aawawu!› gaada ta xeygana; tana miza guxuneta tani, ‹Ta aayee, ta michcheyee!› gaada xeygana.

¹⁵ Histtiin taas ay hidotay dizee? taas hidota gidiza miish oonee taas xeellanay?

¹⁶ Tani duge si7oole wodhishin hidotay tanara issife wodhanee? Issifekka duge duufon nu gelanee?»