ኢዮቤ ማጻፋ 16 - Geeshsha Maxaafa

Iyoobe Haasaya

¹ Iyoobikka hizgi zaarides;

² «Tani hayssa mala haasaya daro wode siyadis; intte saleththiza zoranchchata.

³ Hayssa intte hada haasayas wurseththi bayee? Hayssa lagge tanara marshettana mala inttena denththeththiday aazee?

⁴ Intte ta sozan gidiin tani intte sohon gididaakko kadhen tani hu7e qaaththada ha7i intte gizayssa ubbaa intte bolla lo7eththa haasayanakkoshin.

⁵ Hessa malakka ta doonan inttena minththeththananne minththanaas daro haasayanakkoshin.

⁶ «Gido attiin daro haasaykkoka ta hargey haa lo7enna; co7u ga dandaykkoka ta waayey taappe kichchenna.

⁷ Xoossawu! Tana asateththafe kare kessadasa, ta dere asaa ubbaa dhayssadasa.

⁸ Ta asateththay gundoyssi ta bolla dendidi neni nagaranchcha giidi ta bolla markkattees.

⁹ Xoossi tana hanqidi ta asateththa qanxxereththides; tana ixxidi ba ach ta bolla garccides; ta morkkey ba ayfe ta bolla maxi kessides.

¹⁰ Asay ta yuushon shiiqettidi ta bolla ceeqettides; tana qidhe qaalan baqqida.

¹¹ Xoossi tana iita asatas aaththi immides; makkallanchchata kushen yeggides.

¹² Ta saron daysikoshin gidikkoka Xoossi ba hanqozan tana menththereththides; ta qoodhe cuulli oykkidi daaburissides; ba qofa ta bolla polides.

¹³ Wondafanchchati tana giddoththida; qadheteththi baynda ta kilahota qanxxereththida; ta ciyezakka biitta bolla gussida.

¹⁴ Izi tana zaari zaari madunxides; mino olanchcha mala ziizimi yiidi tana shocides.

¹⁵ «Ta kayoteththas maaqa sikka may7adis; gudulla bolla gufannadis.

¹⁶ Ta ayfesoy yekon zo7ides; sakkanna dhumay ta siphinth kammides.

¹⁷ Hayssi ubbay hanshin ta ooththida qohoy deenna; tani ta woosa Xoossako shiishshizay wozina geeshshateththanna.

¹⁸ «Biittazoo! Tana gakkida qohoza ne kammofa! Suure pirda gishshas ta shiishshiza maganay kametti attana mala ne ooththofa!

¹⁹ Hekko taas markkattizaadeynne afakaato eqqizaadey salon dees.

²⁰ Ta laggeti tana leqon xeelleettes; tani gidikko pude Xoossas yeekkays.

²¹ As asara gaththi haasayssidi maqayinththizaadey dizayssa mala; as Xoossara gaththi maqayinththiza asi didaakko aazee dizay?

²² «Ta layththas wurseththay gakkees; ta haa simma yonttaso baanaas guuththa wodey xalla attides.