ኢዮቤ ማጻፋ 15 - Geeshsha Maxaafa

Elfaaze Haasaya

¹ Temaane dere as Elfaazey hizgides;

² «Tumu era asi carko mala kushen oykettontta miish haasayi erizee? Iza ulon qohiza qofay daanaas bessizee?

³ Era asi aykko go7ontta qaalataninne go7ay baynda haasayan marshettizee?

⁴ Neni Xoossas yayyizayssa aggadasa; Xoossas bessiza goynnozakka diggaasa.

⁵ Ne qohanchcha gididayssi ne haasayan erettees; gido attiin cinccateththa haasayan kammanaas baaxetaasa.

⁶ Ne bolla pirdizay ne doonappe attiin tana gidikke; ne haasayay nenateththaa qonccisees.

⁷ «Asappe sinththan yelettiday nenee? Zumati medhettanaappe sinththan ne yelettadii?

⁸ Tumu Xoossa xuura siyadii? Asa erateth erizay nena xalla nees misatizee?

⁹ Nuni erizayssafe dumma miish ne erizayssi aazee? Nu erizayssafe nees qonccida dumma miishshi aazee?

¹⁰ Yeletan ne aawappe cimmiza hu7ey pulumida cimati qofan nunara deettes.

¹¹ Nu baggara nees yootettiza Xoossafe imettida minththeththoy nees gidennee?

¹² Nena ne wozinay ays haraso efizee? Ays hanqon dereqa xeellay?

¹³ Hayssaththo ooson Xoossa bolla ne ayana denththeththadasa. Hayssa mala hanqo qaala haasayanawu gakkadasa.

¹⁴ «Asi geesh gidanaas dandayzee? Asho may7iday xillanaas dandayzee?

¹⁵ Xoossay ba kiitanchchata bolla ammanettenna; saloykka iza sinththan geesh gidenna.

¹⁶ Moorettidaynne tuniday nagarakka haaththa mala uyiza asi ay mala iitaa?

^17-18 «Istta aawati qottontta isttas ooththidayssa, eranchchati qonccisidayssa, tanikka pilggidayssa ta nena erisays; ta nees yootays.

¹⁹ Biittaya isttas xalla imettadus; imaththatikka istta giddon walakettibeettenna.

²⁰ As waayisishe de7iza iita asi ba layththa kumeththan waayettishe daana.

²¹ Daganththiza giiris izi ba hayththan siyana; ubbaa miishshi saro misatidi izas beettiza wode iza dhayssiza miishshi iza bolla yaana.

²² Izas qaaday mashshan hayqo gidida gishshas, dhumappe attana hidotay izas deenna.

²³ Kafos wora attida kaththa mala izi wora attana; izi dhayana dhuma gallassay izaakko matidayssa izi erees.

²⁴ Metoynne ceecey iza yashshana; olas giigettida kawo mala iza bolla minnana.

²⁵ Hayssi hananay Xoossa bolla ba kushe denththida gishshassa; Ubbaa Dandayza Xoossa bolla xalida gishshassa.

²⁶ Izi ba ordenne mino gondalle ekkidi Xoossara eqettana kezides.

²⁷ «Iza ayfey moodhen goozettides; iza xeessayka ordides.

²⁸ Hayssi ha addezi mulera kundidi dhayda katamatan, laalettanaas matida kayssa keeththata giddon dees.

²⁹ Duretenna; iza haaroykka daro wode gam7enna; biitta bollaka aakkenna.

³⁰ Dhumappe atti baanawu dandayenna; tama lacoy haggata melissidayssa malanne ciishshatikka carkon qokkida miththa mala gidana.

³¹ Hada miishshan ammanettishe bana barkka baleththofo; hessankka izi go7ay bayndayssa gidi attana.

³² Izi wodey gakkontta dishin uththay meliza malanne haggatikka cililontta miththa mala hanana.

³³ Izi buron kaxxontta dishe ayfezi qoqofettiza woyne miththa malanne ciishshay qoqofettiza wogara miththa mala gidana.

³⁴ Xoossa Xoossateththa erontta asatas zereththi de7enna; gubbon oosettida keeththatikka taman dippi gi xuugettana.

³⁵ Hayssa mala asati gene miish qoppeettes; metokka medhdheettes; istta wozinaykka baleththon kumides.»