ኢዮቤ ማጻፋ 14 - Geeshsha Maxaafa

¹ «Asho may7ida asas layththay qaanththa; hessika meton kumides.

² Ciishsha mala beettidi heerakka qokkees; eesho mala daro gam7ontta heera aadhdhees.

³ Histtiin neni hayssa mala asa medheteththa kaalettay? Ne sinththika pirdas shiishshanee?

⁴ Tuna miishshafe geeshsha miish demmanaas dandayzaadey oonikka deenna.

⁵ Asa layththas wodhida zaway dees; asi daana aginatikka ne matan qoodan deettes; nenikka woththida layththa zawappe aadhdhizaadey deenna.

⁶ Uneti aqizaadey ba ooththana gallassa oosoyo polidi ufayettiza mala, asikka ba daabura gallassan ufayettana mala ne ayfe iza bollafe denththa.

⁷ Qanxxettida miththa uththaska hidotay dees; nam7anththo simmi aacanaassinne haggata kessanaas dandayees.

⁸ Aykkoka xaphoti biitta giddon cimmikokka, anoykka biitta giddon musikko,

⁹ Irxxa demmiko nam7anththo aacees; oorath tokettida miththa mala haggata kessees.

¹⁰ Asi gidikko hayqqidi kase baynda mala hanees; hayqqidaappe guye awan beettanee?

¹¹ Abba haaththi wuriza mala, shaafa haaththika meliza mala,

¹² asikka hessa mala hayqqidaappe guye haa simmenna; saloy aadhdhanaashe gakkanaas dendenna; dhiskofekka beeggenna.

¹³ «Hayqqidayta giddon ne tana qottidaakko aazee dizay! Ne hanqozi aadhdhana wodey gakkanaas ne tana qottidaakko! Qaxaro gallas qachchada ne tana qoppidaakko!

¹⁴ Asi hayqqidaappe guye ashora paxa daanaas dandayzee? Taas wodey laamettana gakkanaas, ta hayssa baaxe layththaa gencca aaththana.

¹⁵ He wode neni tana xeygana; tanikka nees ‹Yee› gaana; ne medheta gidida tana beyanaas ne laamotana.

¹⁶ Hekko ha7i ne ta hemeta kaalettaasa; gidikkoka ta nagara qoppaka.

¹⁷ Ta qohoy karaxiiten xunttettana; ta nagarakka ne kammana.

¹⁸ «Zumay harottiza malanne woddiza mala, zaallayka ba dizasoppe dhoqallettiza mala,

¹⁹ haaththi shuch woocidi ongiza mala, di7oy biitta meecciza mala nenikka asa hidota dhayssaasa.

²⁰ Ne wolqqay mernaas izaade bolla minnees; izikka kase baynda mala hanees; ne iza medhaka laammada ne sinththafe dhayssaasa.

²¹ Iza nayti bonchcho demmidaakkoka izi erenna; kawuyizaakokka izi xeellenna.

²² Izas iza asateththa waayezi siyettees; izikka ba metoza gishshas xalla yeekkees.»