ኢዮቤ ማጻፋ 12 - Geeshsha Maxaafa

Iyoobe Haasaya

¹ Iyoobi hizgi zaarides;

² «Tumukka intte keehi eranchchata; intte hayqqishinkka erateththi inttenara issife hayqqana misatees.

³ Gido attiin taaska intteyssa mala akeekay dees; tani inttefe ay miishshankka guuxxike; intte haasaydayssa asi ubbay erees.

⁴ «Ta Xoossa xeygiin taas izi zaarida wodey dees; ha7i tani ta laggetas qidhes gidadis; mooroy baynda xillo tani asa ubbaas qidhes attadis.

⁵ Metoy iza bolla gakkontta asa matan metotida asa meto leqqanayssi kawushsha miishsha; gido attiin kundanaas gandigarzaade sugi yeggeeta.

⁶ Ba eeqa xoossata goynnizayti, kaysotinne xoossa kaddida asatikka saron deettes.

⁷ «Gidikkoka medosata oychcha; istti nena tamaarsana; salo kafota oychcha; istti nees yootana.

⁸ Woykko biittays yoota; izakka nena tamaarsana; abba giddo moletikka nees yootana.

⁹ Hayssa ubbaa giddofe Xoossa kushey hayssa ooththidayssa eronttay oonee?

¹⁰ Shemppora paxa diza medheteththi ubbaynne issi issi asa shemppoy Xoossa maata giddon dees.

¹¹ Inxarsi kaththa qaana shaakki erizayssa mala, hayththika haasaya qommota shaakki erees.

¹² Erateththay cimateththan, akeekaykka layththa adussateththan beetteettes.

¹³ «Xoossas gidikko aadho erateththinne wolqqay dees; zoreynne akeekay iza matappe beetteettes.

¹⁴ Xoossi laallidayssa oonikka zaari keexxanawu dandayenna; Xoossi qachchidayssa oonikka birshanawu dandayenna.

¹⁵ Xoossi ira diggiko kosha gidana; ira bukisikko qasse biittay haron meecettana.

¹⁶ Xoossi minonne xoonizaade; balettizaadeynne baleththizaadey, nam7atikka iza godateththa garsanna.

¹⁷ Izi zorizayta erateth diggana; dere kaaleththizayta izi eeya ooththana.

¹⁸ Izi kawota kawoteththa araataappe woththana; qasho asa mala dancco birshisana.

¹⁹ Qeesetappe istta qeeseteththaa woththi ekkidi istta gooddana; godateththa bolla dizayta istta godateththafe diggana.

²⁰ Ammanettida asata co7u ooththana; cimatappeka akeeka diggana.

²¹ Gita asata yeellachchana; wolqqamata wolqqa diggana.

²² Dhumason qotettida xuura qonccisana; sakkanna dhuma poo7on laammana.

²³ Kawotakka gitasana; zaaridikka dhayssana; kawoteththaaka darsana; zaaridikka laallana.

²⁴ Kaaleththizaytas akeekay paccana malanne ogey baynda bazzo biittan toylattana mala izi ooththana.

²⁵ Poo7oy baynda dhumason istti dhuphettana malanne maththottida asa mala istti gadigadana mala ooththana.