ኢዮቤ ማጻፋ 11 - Geeshsha Maxaafa

Zoofaare Haasaya

¹ Na7imaane dere as Zoofaarey hizgides;

² «Hayssa ha hada qaalatas ubbaas zaaro immizay baye? Asi haasaya daron xillo gidana dandayzee?

³ Iyoobee! Ne haasayda hada haasayatas zaaroy imettontta misatizee? Ne hayssa mala qilccishin nena seerana asi bayndaz misatizee?

⁴ Ne qofan, ‹Tani xillo› gaasa; Xoossaska, ‹Ne sinththan tani geeshsha› gaasa.

⁵ Xoossi nees haasaydaakkonne likke zaaro immidaakko aazee dizay!

⁶ Erateththas ogey daro gidida gishshas, Xoossay nees erateththa xuura qonccisidaakko aazee dizay! Hessa gishshas Xoossi nena qaxxayizay nees bessizayssafe guuththara gididayssa era.

⁷ «Neni Xoossas ciimma gidida xuura eranaas dandayay? Ubbaa Dandayza Xoossa pilggada gakkanawu dandayay?

⁸ Iza gitateththay saloppe bolla; neni ay ooththanawu dandayay? Iza ciimmateththayka si7ooleppeka ziqqa; neni ay eray?

⁹ Xoossa gitateththay biittafe darees; abbafe aakkees.

¹⁰ Xoossi yiidi qachchiko, gede pirda keeth shiishshidaakko oonee iza digganay?

¹¹ Xoossi go7ontta asata erees; izi qoho beyishe co7u giidi xeellenna.

¹² Eeya asi eranchcha gidanaappe harey as gididi yelettanayssi kawuyana;

¹³ Gidikkoka neni ne wozina suurisikko, ne kusheza miccada pude Xoossako woossiko,

¹⁴ Neni nagarappe haakkiko, iita miishshika neson beettontta mala ne ooththiko,

¹⁵ he wode dhoqqu gaada yeellay baynda ubbaa miish ne beyana; yeellay baynda minna eqqanawu dandayaasa.

¹⁶ Ne metoza ubbaa ne dogana; ne akeekizaykka aadhdhi bichchida haro haaththa mala gidana.

¹⁷ Ne shemppoya seeta gallassa awappe aadhdhada poo7ana; dhumaykka wontta poo7o mala gidana.

¹⁸ Nees hidotay diza gishshas nenikka ammanettada daana; Xoossi nena naagiza gishshas neni hirgay baynda woppu gaada daana.

¹⁹ Ne oonaska babbontta ichchana; daro asatikka ne sinththan bonchcho demmanaas koyana.

²⁰ Iitata ayfey qooqana; istti attana ogeti ubbay gorda gidana; istta wurseththayka hayqo.»