ኢዮቤ ማጻፋ 10 - Geeshsha Maxaafa

¹ «Duussi tana saleththides; ta de7iza camo de7oza qonccen sissana.

² Tani Xoossa hizgana; ta bolla nees lancey diikko taas qonccisa attiin ta bolla pirdofa!

³ Hayssa likke ne tana metoththoyssi nees wogaa? Neni nerkka medhdhida asaa ne kadhanaas nees bessizee? Iita asata duulatay nena ufayssizee?

⁴ Ne ayfey asa ayfe malaa? Woykko ne asaththo xeellay?

⁵ Ne wodeti asayssa malaa? Woykko ne layththati asa layththa mala qaanththee?

⁶ Ays ne ta qohoza xeellay? Ays ne ta nagarakka kaalla kaallada aggontta ixxay?

⁷ Tani qohonttayssanne ne kusheppe oonikka tana ashshonttayssa ne eraasa.

⁸ Taas medhanne mala immi medhdhiday ne kusheta; histtiin ha7i ha kusheti tana zaari laalli dhayssanee?

⁹ Mana miishsha mala ne tana biittafe medhdhoyssa qoppa; histtiin ha7i ne tana gudulla mala liiqisanee?

¹⁰ Tana maaththa mala tigada, meqo maaththa mala irkkisa ooththadasa.

¹¹ Ta asateththa galbaninne ashon kammadasa; meqeththaninne shayan gaththa oyththadasa.

¹² De7onne mernaa siiqo taas immadasa; ne naagoykka ta ayana minththides.

¹³ «Hekko hayta ha miishshata ne wozinan qotta woththada daasa; ne qofaykka hayssa gididayssa ta eradis.

¹⁴ Ta qohidaa gidikko ne ayfeti beyana; ta nagara gishshas tana qaxxayontta aadhdhaka.

¹⁵ Ta nagara ooththidaakko eesora meto giddon kundana; lo7o miish ooththidaa gidikkoka galatetikke; ta gilqiin yeellay tana gakkides.

¹⁶ Ta otorettidaakko ne tana gaammo mala shankkatada oykkana; ne tana qohanaas zaara zaara shankkatana.

¹⁷ Ta bolla markkattiza asata ne ubbaa gallas demmana; ta bolla ne hanqoy gede dari dari baana; neni tana qohanaas ubba gallas ooraththa qofata ola asata mala ta bolla denththaasa.

¹⁸ «Ta Godaa Xoossawu! Ays ta yelettana mala ooththadii? Oonikka tana be7ontta ta hayqqaychchidaakko lo7okkoshin!

¹⁹ Ta medhettontta attarkina; tani ta aayey uloppe duufon bidaakko taas lo7o gidanakkoshin!

²⁰ Ta daana layththaya qaanth gidekkee? he qaanththa layththayn guuththara ta ufayettana mala tana aggarkkii!

²¹ Hessika tani nam7anththo haa simmanaas dandayontta girdi gida dhumaso baanaappe sinththana.

²² Ta baanaasozi dhuma kuwaynne shiroy kumida biitta; heen diza poo7ozi dhuma mala.»