ኤርማሳ ቲንቢቴ 6 - Geeshsha Maxaafa

Yerusalaamey Morkketan Doodeteth

¹ GODAY, «Intteno Biniyaame zaretoo! Pudeha baggafe iita miishshinne bashshi yaana giza gishshas intte shemppo ashshanaas baqatite! Yerusalaameppe kezite! Tequhe kataman zaye punnite! Beeti-Hakarimen malata bessite!

² Tani mala lo7onne ufayssiza Xiyoone nayo dhayssana.

³ Heenththanchchati bantta wude ekkidi izi bolla yaana; histtidi izi yuushon bantta dunkaane tokkana; bantta wude bantta sohon sohon heemmana.

⁴ Istti issoy issaa, ‹Yerusalaamera olettanaas giigettite! Dendite! Ane nuni izo seeta gallas oloos. Gido attiin aayye ana! Sa7ay qammees; omarsa kuway aduqqi aduqqi bees.

⁵ Hessa gishshas dendite! Ane omars oloos; histtidi izi miixaakka ane laalloos› giidi maqettida» gees.

⁶ Ubbaafe Wolqqama GODAY, «Miththata qanxxite. Yerusalaame gimbe lanqen biitta doorite; ha katamayn qohoy kumida gishshas izis qixaatey bessees.

⁷ Ollafe haaththi pulttiza mala izakka ba iitateththaa pulttisawus; Makkalla miishshinne bashsha miishshi izi giddon seetettees; ubba wode izi sakoynne madunththi taas beettees.

⁸ Hanne Yerusalaame naagetta; ne akkay giikko ta neeppe shaakettana; qasse ne biittaaka bulasana» gees.

Isra7eele Asaa Makkallateth

⁹ Ubbaafe Wolqqama GODAY, «Woyne teera issinokka ashshontta maxiza mala Isra7eele asaappe attidayta hessaththoka maxi shiishshite. Woyne teera maxiza asa mala intte kushe haggata giddo nam7anththoka yeddite» gees.

¹⁰ Tani oonas yootoo? Oona seeroo? Ooni ta gizaaz siyanee? hekko istta hayththi tulle gidida gishshas istti siyettenna; GODAA qaalay isttas qidhes kezides; istti izan ufayettettenna.

¹¹ Hessa gishshas GODAA hanqoy tanan kumi uttides; tani ha hanqoza ta ulon oykkana dandaykke. Histtiin GODAY tana, «Ta hanqoza ogen diza guuththa nayta bollanne shiiqida yelaga nayta bolla gussa; machchanne azinay, cimmida asatikka kessi ekki attettenna.

¹² Tani he biittan dizayta bolla ta kushe yeddiza wode istta keeththati, istta gadetinne istta machchetikka attontta ubbay haratas gidana» gees.

¹³ Qasseka GODAY, «Guuththayka gitaykka ubbay ba go7as yiiqetees. Nabetinne qeeseti ubbay as baleththeettes.

¹⁴ Istti ta deraa madunththaa qeeri miishsha mala xeellida; paxana mala koshshiza ooso ooththibeettenna; Saroy baynda, ‹Saro; saro› geettes.

¹⁵ Ha harassiza oosoza gishshas istti yeellatidoo? Akkay mulekka yeellatibeettenna; istti yeellay aazakko erettenna. Hessa gishshas istti kundizaytara issife kundana; tani istta qaxxayiza wode istti kawuyana» gees.

¹⁶ GODAY, «Daggala oge bolla eqqi xeellite; beni ogeyo oychchite; Lo7o ogey awaarii? Izira biite; intte intte shemppos shemppo demmana; intte gidikko, ‹Nu izira bookko!› gideta.

¹⁷ Ta inttena naagizayta woththadis; ‹Zayey punettishin siyite› gadis; intte gidikko, ‹Nuni siyokko› gideta.

¹⁸ Hessa gishshas kawoteththatoo, siyite! Intteno markkatoo! Istta bolla aazi gakkanaakko akeekite.

¹⁹ Biittayee siya! Istti ta qaala siyontta ixxida gishshassinne ta wogaakka kadhida gishshas tani deraa bolla istta iita qofaa mala bash ehana.

²⁰ Exaaney Saaba biittafe sawiza qimamey haako biittafe yiikko tana ay gaanee? Xuugettiza intte yarshozakka ta ekkike; intte shiishshiza hara yarshoyka tana ufayssenna» gees.

²¹ Hessa gishshas GODAY, «Tani ha deraa sinththan dhuphiza miish woththana; aawatinne attuma nayti izan dhuphettana; shoorotinne laggeti dhayana» gees.

Pudeha Baggafe Worajjiza Olanchchata

²² Qasseka GODAY, «Hekko pudeha baggafe olanchchati yeettes; gita kawoteththi sa7a gaxappe denththa bolla dees.

²³ Istti wondafenne toora oykkida. Istti menxe iitatanne qadhetay bayndayta; istti bantta parata toggiza wode abbay guummiza mala guummeettes. Intteno Xiyoone macca naytoo! Istti giigettidi inttena olanaas yeettes» gees.

²⁴ Nuni he yo7o siyiin nu qesey kim7ilish gides. Maccas miixay oykkida mala nuna ceecey oykkides.

²⁵ Morkkey mashsha gixxides; ubbason shiroy kumides; hessa gishshas kare kezopite; ogenkka hemettofte.

²⁶ Ta deretoo maaqa may7ite; bidinththa bolla bululettite; mexi issi nay hayqqida asa mala camo yeeho yeekkite; gaasoykka nu qoppontta dishin dhayssizay nu bolla yaana.

²⁷ GODAY Ermaasa, «Ermaasaa! Birata paaccizaade mala neni ta dereza ogenne istta hemeta paaccana mala ta nena woththadis;

²⁸ Istti ubbay zigirshe yuuyizaytanne yootiin ekkontta makkallanchchata; istti xarqimala malanne birata mala; istti ubbayka mooro ooththizayta.

²⁹ Birata seerisanaas womppiina lo7eththa punna; gido attiin iitati mulera pitetti kezontta gishshas hessi coo hada daabura.

³⁰ GODAY istta kadhida gishshas istti kadhettida bira geetetti xeygettana» gees.