ኤርማሳ ቲንቢቴ 50 - Geeshsha Maxaafa

Baabiloone Gishshas Yootettida Kiita

¹ Baabiloone biittanne Baabiloone asa gishshas Xoossi nabe Ermaasa baggara yootida qaalay hayssafe kaallizayssa;

² «Kawoteththata ubbaa giddon awajjite! Bandira dhoqqu histti oykkidi awajjite! Aykkoka ashshontta dishe, ‹Hekko Baabilooney oykettana; Beeley kawuyana; Mardukey shiron kumana; izi eeqa xoossati kawuyana; izi eeqa misleti meqerettana› giite.

³ Pudeha baggafe issi kawoteththay yiidi Baabiloone biitta olana; hessafe dendidayssan asinne mehey baqatana; biittayokka bula kessana; oonikka izin deenna.»

Isra7eelenne Yuhuda Asaa Simo

⁴ GODAY, «He wodeninne he gallassatan Isra7eele asaynne Yuhuda asay issife yaana; GODAA bantta Xoossa koyishenne yeekkishe yaana.

⁵ Istti Xiyoone efiza oge oychchana; bantta sinth hee zaarana; yiidi mulera dogettontta mernaa caaqo qaalan GODAARA oykettana.

⁶ «Ta derey dhayda dorsa mala gidides; istta heenththanchchati istta baleththidi wora kaaleththida; zumata bollanne zumbullata bolla toylattida; ba aqizasokka dogida.

⁷ Demmida ubbay istta qohees; istta morkketi, ‹Nu bolla mooroy baa; hayssi metoy istta gakkiday bantta aawatas hidota gidida GODAA, tumappe isttas duussaso gidida GODAA qohida gishshassa› gida.

⁸ «Baabilooneppe baqatite! Istta biittaaka yeddite! wude kaaleththiza deysha orge mala gidite.

⁹ Tani pudeha baggafe wolqqama kawoteththata Baabiloone bolla denththeththana; isttika izi bolla salfana; histtidi izo heeppe oykkana; istta wondafey yeddontta loohida olanchchata mala.

¹⁰ Baabiloone biittay bonqqettana; izo bonqqizayti baas gidanaashe gakkanaas bonqqana» gees.

Baabiloone Kundeth

¹¹ «Intteno ta xinxxo bonqqi ekkidaytoo! Intte ufayettida gishshassinne ufayssan maggulida gishshas, demban xikettiza ussa mala intte lifxettida gishshas, wodalla para mala intte caaggida gishshas,

¹² intte aaya keeha yeellatana; inttena yelidaarakka kawuyana; kawoteththata ubbaa giddon iza guuth gidana; iza asi bayndaso, haaththi baynda biittanne bazzo gidana.

¹³ GODAA hanqo gaason iza bazzo gidana attiin asi izin deenna; izi bolla gakkida bashsha gaason Baabiloonera aadhdhi biza ubbay malalettishe iza qidhana.

¹⁴ «Intteno yiishshan dukkizaytoo! Baabiloone olanaas izi yuushon salfte; nagara ooththida gishshas intte yiish issinokka ashshontta izi bolla yeddite.

¹⁵ Ubbaa baggarakka izi bolla maggulite! Iza inttes kushe immana; izi miixatinne gimbetti laalettana; hayssi GODAY halo kessiza oge gidida gishshas intte izi bolla halo kessite; iza harata bolla ooththida mala intte izi bolla ooththite.

¹⁶ Baabilooneppe zereththi zerizayssa, kaththa shiisho wode cakkanaas baaca oykkidayssa dhayssite; un7eththizayta mashshafe dendidayssan issoy issoy ba asaakko simmo; ba derekka baqato.

¹⁷ «Isra7eeley gaammoy gooddidi laallida wude mala gidides; koyro Asoore kawoy puuzerethi mides; guyeppe Baabiloone kawo Nabukadanaxoorey meqeththaa dhoggides» gees GODAY.

¹⁸ Hessa gishshas Ubbaafe Wolqqama GODAA Isra7eele Xoossay, «Asoore kawo tani qaxxayda mala Baabiloone kawonne iza biitta qaxxayana.

¹⁹ Gido attiin tani Isra7eele kase izi heemettizaso iza zaarana; Qarmelooseninne Baasaane deren izi heemettana; qasse izi Efreeme zumbullata bollanne Gala7aade zumbullata bolla kallanaashe gakkanaas maana» gees.

²⁰ He wodetaninne he gallassatan GODAY, «Isra7eele mooroy koyettana; gido attiin issinakka beettuku; Yuhuda nagaraykka koyettana; gido attiin mulekka beettenna; hayqoppe ta ashshida shoogeta ta maarana» gees.

Baabiloone Bolla Yaana Pirda

²¹ «Mirataymeninne Paqooden diza asaa gooddite; wodhitenne mulera dhayssite; tani inttena azazidayssa ubbaa ooththite.

²² He biittan ola shiroynne gita bashsha waasoy seetettides.

²³ Alame ubbaa liiqisiza madooshay waani meqqidee? Waani liiqidee? Kawoteththata giddon waana Baabilooney bula gidadee?

²⁴ Hanne Baabiloonee! Ta nees woximade woththadis; nekka erontta dashe oykettadasa; neni GODAARA eqettida gishshas beettada oykettadasa.

²⁵ GODAY ba ola massaraa woththiza minjja keeththaa doydes; ba hanqo ola massara kessides; GODAY Ubbaafe Wolqqama Xoossay Baabiloone biittan ooththiza oosoy dees.

²⁶ Yaara haara izi bolla worajjite; izi gootarata laallite; di7ettida miishsha kaththa mala doorite; mulera izo dhayssite; izin aykkoyka attofo.

²⁷ Izi wofanota ubbaa shukkite; duge shukettizaso wodhdhetto! Istti qaxxayettana wodeynne gallassay gakkida gishshas aayye ana!

²⁸ «GODAA nu Xoossay halo kessidayssa, Xoossa Keeththa gishshas halo kessidayssa Baabilooneppe betidaytinne goodettidayti Xiyoonen haasayzayssa siyite.

²⁹ «Wondafen olizayta Baabiloone bolla xeygite; issaadeyka kessi ekki bontta mala istta giddoththidi dunkaanite; GODAA Isra7eele geeshshaa kawushshida gishshas izi ooso mala izis zaarite; iza harata bolla ooththidayssaththo izi bolla ooththite.

³⁰ Hessa gishshas izi naateththa attuma nayti aadhdhooson aadhdhooson hayqqana; izi olanchchati ubbay he gallas kundana» gees GODAY.

³¹ GODAY Ubbaafe Wolqqama Xoossay, «Nenoo otoranchchazoo! Tani ne bolla dendadis; neni qaxxayettana wodeynne gallassay gakkides.

³² Otoranchchay dhuphettidi kundana; denththanaykka deenna; iza yuushon dizayta ubbaa miza tama iza katamata bolla yeddana» gees.

³³ GODAY Ubbaafe Wolqqama Xoossay, «Isra7eele asaynne Yuhuda asay issi bolla qohettides; di7idayti ubbay istta minththi oykkida; istta yeddanaas ixxida.

³⁴ Gido attiin istta wozzizay mino; iza sunththayka GODAA Ubbaafe Wolqqama Xoossaa; istti biittas shemppo immanaas keehi baaxetees; gido attiin Baabiloonen dizaytas shemppo dhayssees» gees.

³⁵ GODAY, «Mashshay Baabiloone asaa bolla yides; izin diza asata bolla, maatay diza asata bollanne aadho eranchchata bolla siifanaas shodettides.

³⁶ Mashshay wordo gidida izi nabeta bolla yides; istti eeyata gidana; mashshay istta olanchchata bolla shodettana; isttika shirotana.

³⁷ Istta parata bollanne istta para-gaareta bolla qasse izi giddon diza hara dere wottadarata bolla mashshay yaana; isttika maccassata mala gidana; mashshay izi aqota ubbaa bolla yaana; isttika bonqqettana.

³⁸ Biittaya babisizanne as gooshshiza eeqa xoossatan kumida gishshas izi haaththata bolla arshey kezana; isttika melana.

³⁹ «Hessa gishshas bazzo do7atassinne godares duussaso gidana; guttos aqoso gidana; hayssafe guye oonikka izin deenna; yeletappe yeleta gakkanaas izin uttanay beettenna.

⁴⁰ Sodoomenne Gamoora katamaa istta yuushon diza dereta asi dontta mala ooththides; hessaththoka oonikka heen deenna; izin uttanaykka beettenna» gees.

⁴¹ «Be7ite! Pudeha baggafe asay yeeththa bolla dees; issi wolqqama kawoteththinne daro kawoti sa7a gaxappe dendida.

⁴² Istti wondafetanne mashshata oykkida; istti maarontta menxe iitata, maarokka ooththettenna; istti parata toggishin istta giirissay abba dambala mala guummees; hanne Baabiloone macca nayee! olas giigettida olanchchata mala ne bolla yaana.

⁴³ Baabiloone kawoy istta gishshas siyides; iza kushetikka doccida; iza ceecey oykkides; miixay oykkida maccassa mala sakettides.

⁴⁴ Gaammoy Yordaanoose woratappe mehe heemmiza demban kezi wodhdhiza mala tanikka Baabilooney qoppontta dishin keza wodhdhana; izi biittafe ta izo gooddana; ta dooridayssa izi bolla shuumana; ta malay oonee? tanara eqettana dandayzay oonee? tanara eqettana dandayza heenththanchchay oonee?

⁴⁵ Hessa gishshas GODAY Baabiloone bolla halchchida halchcho, Baabiloone biitta bolla qoppida qofaa siyite! guuththa wudey gooshetti baana; istta gaason heemmizasohoza mulera dhayssana.

⁴⁶ Baabiloone kundeththa giirissi biitta qaaththana; izi waasoy kawoteththa ubbaa garsan kooshumana» gees.