ኤርማሳ ቲንቢቴ 48 - Geeshsha Maxaafa

Mo7aabe Gishshas Yootettida Kiita

¹ Mo7aabe gishshas Ubbaafe Wolqqama GODAA Isra7eele Xoossay, «Neboy dhayana gishshas izis aayye ana! Qiriyaataymey kawuyananne oykettana; miixatikka oykettananne laalettana.

² Hayssafe guye Mo7aabey bonchchettuku; asay Haseboonen uttidi, ‹Haa yiite! Hanno katamayo ane dhayssoos› giidi izi bolla duulatana. Hanne Madimeenee! Nena buro co7u histtana; mashshay nena gooddana.

³ Horonaymeppe keziza dhayssa waasonne gita bashsha waaso giiris siyite;

⁴ Mo7aabey meqqana; izi naytikka waaso sissana.

⁵ Camo yeeho yeekkana; Luhite pudunth kezana; bana gakkida iita metoppe dendidayssan camo yeeho yeekkishe Horonayme dugunththa wodhdhana.

⁶ Baqatidi intte shemppo ashshite; bazzon tusha wora gidite.

⁷ Intte ooththida oosoninne intte aqotan intte ammanettiza gishshas intteka di7ettana; Kamoosheykka ba qeesetaranne ba shuumetara di7etti baana.

⁸ Katama ubbaa bolla dhayssizay yaana; issi katamaykka kessi ekki attenna; GODAY yootida gishshas shoobbay dhayana; dembatikka dhayana.

⁹ Mo7aabey piradhdha attana mala izis qefe immite; izi katamati aykkoy baynda bula gidana.

¹⁰ «GODAA oosos wudu gonttaadey qanggettidaade gido! iza mashshay suuth gussontta mala diggizaadey qanggettidaade gido.

¹¹ «Mo7aabey yelagateththafe doommidi gacettontta tocera diza woyne ushsha mala woppan dees; otoppe oton laamettibeenna; izi di7etti bi erenna; iza mal7oy kase diza mala dees; iza sawoykka laamettibeenna.

¹² Gido attiin otoza laammiza asata ta kiittana wodey yaana; isttaka wora gussidi otaa xalla ashshana; duuqqiza miishshatakka menththereththi yeggana.

¹³ Isra7eele asay Beetelen ammanetti dishe yeellatidayssaththo Mo7aabe asaykka ba xoossan Kamooshen yeellatana.

¹⁴ «Intte, ‹Nuni mino olanchchata› gaanaas waani dandaydetii?

¹⁵ Be7ite Mo7aabe biittay dhayana; izi katamatikka worajjettana; doorettida izi yelaga naytikka shukettanaas duge wodhdhana; iza sunththay GODAY Ubbaafe Wolqqama Xoossay,

¹⁶ «Mo7aabes kundeththa wodey gakkides; bashshi iza bolla eeson yaana.

¹⁷ Iza yuushon diza ubbay iza gitateth erizayti ubbay izas yeekkite; intte, ‹Mino iza cikkay, bonchchettida xanbaroy waani meqqidee?› giite.

¹⁸ «Mo7aabe dhayssanay ne bolla yaana; gimbettida ne katamata izi dhayssana; hanne Diboone nayee! Ne bonchchozappe duge wodhdha; mela biitta bolla wodhdha utta.

¹⁹ Hanne Aaro7eeren dizaaree! Neni oge doonan eqqada xeella; baqatiza attumas, kessa ekka biza maccas, ‹Aazee medhettiday?› gaada oychcha.

²⁰ Mo7aabey laalettidi kawuyides; ‹Wu! Wuy› giidi waassite; Mo7aabey mulera dhaydayssa Arnoone Shaafa achchan awajjite!

²¹ Pirday bolla gezze biittan Holoone bolla, Yahaaxe bollanne Mefa7aate bolla,

²² Diboone bolla, Nebo bollanne Beeti-Dibilaatayme bolla,

²³ Qiriyaatayme bolla, Beeti-Gaamule bollanne Beeti-Ma7oone bolla,

²⁴ Qiriyaate bollanne Booxira bolla, haahoninne matan diza Mo7aabe katamata ubbaa bolla yides.

²⁵ Mo7aabe kacey qanxxettides; iza qeseykka meqerettides.

²⁶ «Izi GODAA kadhida gishshas Mo7aabe ushshan maththosite; Mo7aabey ba cooshsha bolla genderetto; qidhes atto.

²⁷ Neni kase Isra7eele qidhabeekkii? Izi gishshas ne haasayza wode neni ne hu7e qaaththabeekkii? Iza kaysotara kaysotashe oykettadee?

²⁸ Intteno Mo7aaben dizaytoo! katamappe kezi biidi zaalla giddon diite; aafo doonan ba keeth keexxiza haraphphey mala gidite.

²⁹ Mo7aabe otoreteth, bana dhoqqu histteth, ceeqeteththinne wozina muumeteth nu siyidos.

³⁰ Tani iza wolqqa erays; gido attiin hessi hada; iza ceeqeteththaas go7ay deenna.

³¹ Hessa gishshas tani Mo7aabes yeekkays; Mo7aabe dere ubbaas, ‹Wuu! Wuy› gays; Qiire-Hereese asaasikka yeeho cenggurs sissays.

³² Nenoo Seebama woyne miththazoo! Iyaazeeres yeekkoyssafe aaththada tani nees yeekkays. Ne haggati daayidi Abba pinnidi Iyaazeere gakkida; gido attiin nees maxa gakkida kaththa ayfenne woyne dhayssanay yides.

³³ Mo7aaben atakiltesoppenne goshsha gadeppe hashshu histtizaazinne ufayssi dhaydes; woyne ushshi gum7iin wodhdhontta mala melissadis; oonikka iza ililishe gum7enna; heen asa qaalay siyettikokka ililisa cenggurssa gidenna.

³⁴ «Hasebooneppe biidi El7eelenne Yahaaxe gakkanaas, Zo7aareppe biidi Horonayme, Egilaate-Shalishiya gakkanaas istta waasoy keehi seetettees; Nimiriime haaththi melides.

³⁵ Dhoqqasohota bolla yarshizaytanne bantta eeqa xoossatas exaane cuwasizayta tani Mo7aabe biittafe dhayssana.

³⁶ «Ta wozinay Mo7aabessinne Qiire-Hereese asaas zayen yeekkiza asa mala yeekkees; gaasoykka istta dureteththi dhaydes.

³⁷ As ubbaa hu7eynne buuchchi meedettides; bantta kushekka cadereththida; qasse maaqa may7ida.

³⁸ Mo7aaben diza keeththa ubbaaninne dabaaban yeehoppe attiin haray deenna; gaasoykka tani Mo7aabe dere mooho oto mala menththereththa yeggadis.

³⁹ «Mo7aabey ay meqo meqqidee! Asay ay yeeho yeekkizee! Mo7aabey ay mala yeellatidi zokko zaaridee! Mo7aabey ba heeran diza asa ubbaas cashshassinne shabarsas malata gidides» gees GODAY.

⁴⁰ GODAY, «Golley ba qefe piddi histti piradhdhi wodhdhiza mala, Mo7aabe bolla wodhdhana.

⁴¹ Iza katamatinne iza miixati oykettana; He gallas Mo7aabe olanchchata wozinaykka miixa oykettida maccassa wozina mala gidana.

⁴² Mo7aabey GODAA kawushshida gishshas dhayana; iza kawoteththayka attana.

⁴³ Nenoo Mo7aabe derezoo! Nena shabarsi, ollaynne woximadey naagees.

⁴⁴ «Shabarsafe baqati attida ubbay ollan gelana; ollafe keziday woximaden oykettana; tani Mo7aabey qaxxayettiza layth ehana gishshassa.

⁴⁵ «Hasebooneppe Mo7aabe liiphe, ceeqettizayta piidhe xuuggiza tamay, tama lacoy Sihoone keeththafe kezides; baqati bidayti Haseboone kuwa garsan baanaaso dhaydi eqqida.

⁴⁶ Mo7aabe nees aayye ana! Kamooshes goynniza derey wuri wurides. Ne attuma nayti ubbay di7ettida; macca nayti ubbayka di7etti bida.

⁴⁷ «Gido attiin wurseththan Mo7aabeppe di7etti bidayta ta zaarana» gees. Mo7aabe bolla pirdettida pirday hessa.