ኤርማሳ ቲንቢቴ 4 - Geeshsha Maxaafa

Maarettanaas Xeys

¹ GODAY, «Isra7eele asawu! simmiko haa taakko simmite. Intte harassiza miishshata ta sinththafe diggiko, yayyontta minni eqqiko,

² intte tuman, suureteththaninne xilloteththan, ‹De7o GODAY beyiin!› giidi caaqqiko, he wode kawoteththati izan anjjettananne bonchchettana» gees.

³ GODAY Yuhuda asaassinne Yerusalaamen dizaytas, «Oththa gade goyite; agunththa giddon zeropite.

⁴ Intteno Yuhuda asatoo, Yerusalaamen dizaytoo! GODAAS intte qaxxarettite; intte wozina iitateththaa diggite; histtontta aggiko intte ooththida iitateththaa gishshas ta hanqoy tama mala eexxi kezana; oonikka iza toyssanaas dandayenna» gees.

Pudeha Baggafe Yaana Bash

⁵ GODAY, « ‹Biitta ubbaan zaye punnite!› giidi Yuhudan yootite. Yerusalaamenkka awajjite; ‹Issife shiiqite! Ane gimbettida katamatakko baqatoos!› gi waassite.

⁶ Xiyoone gelanaas bandira oykkite! eeson baqati attite; Ays giikko tani pudeha baggafe hanqonne bash ehana.

⁷ Gaammoy ba dizasoppe kezides; kawoteththata dhayssizay kiitettides; ne biittayokka bulasanaas ba dizasoppe kezides; ne katamati laalettana; kundidikka kayzi attana.

⁸ Hessa gishshas maaqa may7ite; kayottishe, ‹Wuu! Wuy› gi yeekkite. Ays giikko GODAA hanqo seelay nu bollafe simmibeenna» gees.

⁹ Qasseka GODAY, «He gallas kawo wozinaynne shuumeta wozinay taahana; qeeseti dagammana; nabetikka kokkorana» gees.

¹⁰ Histtiin tani, «Abeet Ubbaa Haariza GODAWU! Mashshay istta qoodhen wodhdhiin, ‹Inttes sa7ay saro gidana› gaada ha asaanne Yerusalaame ays keeha baleththadii?» gadis.

¹¹ He woden ha asaassinne Yerusalaames, «Bazzon diza aykkoy baynda zumbullatappe xuuggiza carkoy ta deraa bolla carkana; gido attiin hessi kath suragganaassinne geeshshanaas gidenna.

¹² Hessafekka keehi wolqqamiza carkoy ta azazon carkana; ha7i tani istta bolla pirdana» geetetti yootettana.

Morkken Yuhuda Doodeteth

¹³ Be7ite! Morkkey shaara mala biitta kumides; iza para-gaaretikka gote carko mala yeettes; iza paratikka golle kafota mala eesoteettes; aayye ana nu dhayana goos!

¹⁴ Nenoo Yerusalaamee! Ne attana koykko ne wozina iitateththaa meecetta; Iita qofay ne wozinan ayde gakkanaas gam7anee?

¹⁵ Cenggurssi Daaneppe seetettees; Efreeme zumata bolla bashshi awajjeettes.

¹⁶ «Kawoteththatas yootite; Yerusalaameskka, ‹Dooddi un7eththizayti haaho biittafe yaana; Yuhuda katamata bollaka ceeqettana;

¹⁷ Iza ta bolla makkallida gishshas kath naagiza asa mala istti Yuhuda giddoththana› giite.

¹⁸ Ne hanoynne ne oosoy hessa ne bolla ehides; hessi nees qixaate; hessika ay mala cammizaazee! ay mala wozina menththizaazee!» gees GODAY.

¹⁹ Waanoo tanii! Tani hayssa wostta dandayanee! Tana metides! Ta wozinay hirgees; tani co7u gaanaas dandaykke. Ays giikko tani zaye cenggurssinne ola cenggurs siyadis.

²⁰ Iita miishshi iita miish kaallees; mule biittay moorettides; ta dunkaanetinne magalashati eeson dhayda.

²¹ Tani ayde gakkanaas ola malata xeellanee? ta ayde gakkanaas zaye giiris siyanee?

²² GODAY, «Ta asay eeya; istti tana erettenna. Istti yuushshi qopponttayta; istti akeekay bayndayta; istti iita miish ooththanaas eranchchata; lo7o ooththanaas eray paccidayta» gees.

²³ Tani sa7a xeellada sa7ay lo7i giigonttayssanne coo mela dizayssa be7adis. Qasse salota xeellada isttan poo7oy bayndayssa be7adis.

²⁴ Tani zumata xeellada istti kokkorishininne zumbullati ubbay yon7iyon7ishin be7adis.

²⁵ Tani xeelladis shin ay asikka be7abeekke; salo kafotikka ubbay piradhdhidi dhayda.

²⁶ Aradda biittay bazzo gididayssa be7adis; GODAA sinththan, iza suule hanqo sinththan he katamatikka laalettida.

²⁷ GODAY, «Mule biittay bulattana; gido attiin tani izo mulera dhayssike.

²⁸ Hessa gishshas sa7ay yeekkana; saloykka dhumana. Ays giikko tani gadis; he qofaa ta laammontta mala qachchadis» gees.

²⁹ Para asatanne wondafe asata kachcha gaason asay katama ubbaafe baqatana. Baggay woxxidi wora gars gelana; baggay qasse zaalla bolla kezana; katamay ubbay asi baynda kayzi attana.

³⁰ Hanne bashshas uttidaaree! Neni ay ooththay? Ne zo7o may7o ays may7ay? Worqqa alleqokka ays aaththay? Ne ayfe ciro ays tiyay? Neni coo mela nena lo7eththaasa; Ne laggeththoti nena kadhida; istti nena wodhanaas koyeettes.

³¹ Tani koyro bayra naa yelanaas miixattiza maccassa mala ne waassishin ta siyadis; Yerusalaame macca naya peenoy tucettanaashe gakkanaas waassishininne ba kushe miccada, «Ta waanoo! Hekko tana wodhana geettes!» gishin siyadis.