ኤርማሳ ቲንቢቴ 31 - Geeshsha Maxaafa

¹ GODAY, «He wode tani Isra7eele qommo ubbatas Xoos gidana; isttika ta dere gidana» gees.

² GODAY, «Mashshafe attida derey bazzo biittan taappe kiyateth demmana; tanikka Isra7eeles shemppo immanaas yaana» gees.

³ GODAY nuus haahosoppe qonccidi, «Tani inttena mernaa siiqon dosadis; hessa gishshas ta qadheteththan inttena taakko shiishshadis.

⁴ Isra7eele derezoo! Tani inttena zaara keexxana; intteka keexettana. Intte karabe zaari denththidi ufayssan hombocizaytara intte hombocana.

⁵ Intte zaaridi Samaariya zumbullata bolla woyne tokkana; goshshanchchati tokkana; istti ayfiza ayfezankka ufayettana.

⁶ Efreeme zumbullata bolla naagizayti, ‹Haa yiite; GODAA nu Xoossaako pude Xiyoone ane kezoos› gi xeygana wodey yaana» gees.

⁷ GODAY, «Yaaqoobe deraas ufayssan yexxite; kawoteththata halaqas ilili giite; intte galatakka sissite; ‹GODAWU Isra7eeleppe casha attida ne deraa ashsha› giite.

⁸ Be7ite tani istta pudeha baggafe ehana; biitta gaxappeka tani shiishshana; istta giddon qooqetinne wobbeti, abbey baynda maccassatinne miixattizayti daana; keehi daridi bantta dere simmana.

⁹ Tani istta zaarada ehiza wode istti yeekkishenne woossishe yaana. Tani istta pultto haaththa achchara suure ogera kaaleththana. Gaasoykka tani Isra7eeles aawa; Efreemeykka taas bayra naa.

¹⁰ «Intteno kawoteththatoo GODAA qaala siyite! Haahon diza abba gaxatankka, ‹Isra7eele laalliday izi istta zaari shiishshana; ba wudezakka heenththanchcha mala izi heemmana› giidi awajjite.

¹¹ Gaasoykka GODAY Yaaqoobe wozzana; izappe minnizayta kusheppe iza kessi ekkana.

¹² Istti yiidi Xiyoone zuma bolla ufayssa mazamure yexxana; istti GODAA kiyateth gidida kaththan, woyne ushshan, zayten, deyshaninne dorsa laaqqatan, wofanotaninne ussatan ufayettana; istti haaththi paccontta atakilte soho mala gidana; hayssafe guye istti muuzottettenna.

¹³ He wode geela7oti ufayettidi yexxana; wodallatinne cimati guppana; ta istta yeehoza ufayssan laammana; ta istta muuzoteththafe minththeththana; ta isttas ufays immana.

¹⁴ Tani qeeseta keeha anjjana; ta derezakka kiyateththi kaallana» gees.

¹⁵ GODAY, «Waasoynne camo yeehoy Eraama katamappe seetettides; izi nayti wurida gishshas Eraheela yeekkadus; minetonttaka ixxadus» gees.

¹⁶ GODAY, «Yeekkofanne afunxxofa; ne daaburay coo hada attenna; morkketa biittafe istti simmana.

¹⁷ Sinththafe nees hidotay diza gishshas ne nayti bantta biitta simmana» gees.

¹⁸ «Efreemey camo milas milalishin addafe ta siyadis; ‹Loohontta wofano mala tana qaxxayadasa; tanikka qaxxayettadis; neni GODAA ta Xoossa; neni tana zaara; tanikka simmana.

¹⁹ Ta neeppe haakka bidaappe guye simmada modhettadis; ta akeekida wode ta hu7e baqqadis; ta yelagateththaa kawushshateth tookkadis; yeellatada guuxxadis› gides.

²⁰ Efreemey ta dosada ufayettiza ta naaza gidennee? Daro wode ta izara eqetta haasaykkoka zaarada iza gishshas ta qoppays; ta maracey kokkorees; ta izas keeha qadhettays» gees GODAY.

²¹ GODAY, «Ogen malata essa; bizaso bessiza malata tokka; ne baana wogga ogeza akeeka; geela7oye Isra7eele simma; histtada ne katamata gela.

²² Hanne kaddida nayee! Ne ayde gakkanaas toylattanee? GODAY sa7a bolla ooraththa miish medhdhana; hessika maccay adde dooddana» gees.

Xoossa Deres Sinththafe Yaana Ishalo De7o

²³ Ubbaafe Wolqqama GODAA Isra7eele Xoossay, «Tani isttafe di7ettida miishshaa ta isttas zaariza wode istti Yuhuda biittaninne izi katamatan, ‹Nenoo xilloteththi aqiza geeshsha zumazoo! GODAY nena anjjo!› giza qaala zaari go7ettana.

²⁴ Goshshanchchatinne mehe haaron aqizayti Yuhudaninne Yuhuda katamatan issife daana;

²⁵ Tani labbanida shemppoyo ooraxissana; daaburdaarokka minththana» gees.

²⁶ He wode tani dhiskofe beeggada yuushsha xeelladis; tani mal7o dhisko dhiskadis.

²⁷ GODAY, «Tani Isra7eele biittaninne Yuhuda biittan asinne mehe kunththiza wodey yaana.

²⁸ Istta dhoqallanaas, laallanaas, shira yegganaas, dhayssanaassinne bash istta bolla ehanaas keeha tani minnida mala istta zaara keexxanaassinne tokkanaas keeha minnana» gees.

²⁹ «He wode asay, ‹Aawati woyne miththa teera caalidayssa miin istta nayta achchi zil7ides› geetettiza leemiso nam7anththo haasayettenna.

³⁰ Gido attiin asay issoy issoy ba nagaran nagaran hayqqana; woyne teera qawu7e mida asa achchi ubbay zil7ana» gees GODAY.

³¹ GODAY, «Tani Isra7eele deraaranne Yuhuda deraara ooraththa caaqo caaqettana wodey yaana.

³² He caaqozi tani istta Gibxeppe kessanaas istta kushe oykkada istta aawatara caaqettida caaqoza mala gidenna; tani isttas azina mala gida dishin istti tanara diza caaqo qaalaza laallida» gees.

³³ «Gido attiin tani GODAY he wodeppe guye Isra7eele deraara ta caaqettana caaqoy hayssa; tani ta woga istta wozinan xaafa woththana; tanikka isttas Xoossa gidana; isttika ta dere gidana.

³⁴ Hayssafe guye oonikka ba lagge woykko ba isha, ‹GODAA era› giidi tamaarsenna; gaasoykka guuththafe doommidi gita gakkanaas istti ubbay tana erana; tanikka istta qoho atto gaana; istta nagarakka nam7anththo zaara qoppike» gees GODAY.

³⁵ Gallassan poo7isana mala arshe woththiday, omarsan poo7isana mala aginanne xoolintteta azaziday, dambalay guummana mala abba qaaththizay iza sunththay GODAA Ubbaafe Wolqqama Xoossa geetettizayssi,

³⁶ «Ha eqqidi diza medheta wogay ta sinththafe kichchiko he wode Isra7eele zereththati ta sinththan mernaas kawoteth gididi duussay attana» gees GODAY.

³⁷ GODAY, «Bollan diza salota gakki wadhdhanaas dandayettiko, woykko garsan diza biitta xapho gakki pilggi eranaas dandayettiko he wode tani Isra7eeley ooththida ooso ubbaa gishshas ta istta yegga aggana» gees.

³⁸ GODAY, «Hanani7eele Gimbefe doommidi gula penge gakkanaas katamaya taas GODAAS oosettana wodey yaana.

³⁹ Wadha wodorozi heeppe doommi sitti giidi Gaareebe zumbullatara aadhdhidi Go7aha gakkanaas micettana.

⁴⁰ Ahaynne bidinththi yegettiza shoobba ubbay arshey mokkiza Qediroone shoobbara biidi Para Penge gakkanaas diza tidhdhi gida dembay ubbay GODAAS dummatidaaz gidana; hessafe guye he katamaya shodettukunne laalettuku» gees.