ኤርማሳ ቲንቢቴ 3 - Geeshsha Maxaafa

Ammanettontta Ixxida Isra7eele

¹ «Issi asi ba keeththaayo anjji yeddiin iza baada hara azina gelikko, kase anjji yeddidaadey simmi izikko bizee? izi biikko he biittaya mule tunekkee? Neni gidikko ne siiqiza cora laggetara laymatadasa; histtadakka ha7i neni taakko simmana koyay?» gees.

² «Ane dhoqqu gaada aykkoy baynda zumbullata xeella; neni laymas ichchonttasoy hessan dizee? Bonqqana bazzon uttida panga mala oge doonan uttada ne laggeththota naagadasa; histtada neni laymateththaninne iitateththan biittayo tunisadasa.

³ Hessa gishshas puuseykka puusontta mala digettides; balgo iraykka bukkontta aggides; ne gidikko hanno gakkanaas laymateth aggabeekka; neni yeellatonttaka ixxadasa.

⁴ Ha7i neni tana, ‹Ta aawawu, taas naateteththa laggezoo!

⁵ Neni ubbato ta bolla hanqettanee? Ne hanqoy mernaassee?› gadasa. Ee neni hizgaasa; gido attiin neni dandayda keena iita miish ubbaa ooththaasa» gees.

Maaroteththas Isra7eelenne Yuhuda Xeygeteth

⁶ Kawo Iyosiyaasi kawotida layth GODAY taas, «Hanna ammanoy baynda Isra7eeley ooththidayssa neni be7adii? Iza dhoqqa zumbullata bolla kezada daashsha miththata garsan laymatadus.

⁷ Iza hayssa ubbaa ooththadakka taakko simmana gaada qoppadis shin simmabeekku. Qasse ammanettontta izi michcho Yuhudaykka hessa beyadus.

⁸ Ammanoy baynda Isra7eele dereti laymatida gishshas anjjo waraqata imma yeddadis; Isra7eele michcho ammanettontta Yuhudaykka hayssa be7ashe yayyontta kezada laymatishin be7adis.

⁹ Ba kawushshateththan biitta tunisadus; miththarakka shuchcharakka laymatadus.

¹⁰ Hessan ubbaankka izi michchiya, ammanettontta Yuhuday coo simmidaa misatawusife attiin kumeththa wozinappe taakko simmabeekku» gides.

¹¹ GODAY taas, «Ammanettontta Yuhudappe ammanoy baynda Isra7eeley xilla beettadus.

¹² «Ba; baada pudeha baggas, ‹Hanne ammanoy baynda Isra7eelee simma! Tani maarotay kumidaade gidida gishshas nena iita ayfen xeellike; mernaaskka hanqettike› gees GODAY.

¹³ Gidikkonne neni, ‹GODAA ne Xoossaa bolla makkallateththan, ne bonchchoka allaga xoossatas daashsha miththata garsan aaththa imoninne taas azazettontta ixon neni mooranchcha gididayssa xalla ammana› gees GODAY» gides.

¹⁴ Qasseka GODAY, «Intteno ammanettontta asatoo, simmite; tani inttes azina; Tani intte giddofe issi katamappe issaa, issi qommofe nam7ata doorada Xiyoone ehana.

¹⁵ «Hessafe guye tani ta wozina mala inttena erateththaninne akeekan heemmiza heenththanchchata inttes immana.

¹⁶ Qasseka GODAY intte qooday biitta bolla corattiza wode, ‹GODAA Caaqo Qaala Taabotaa› gi xeygekketa. Izi isttas qofettennanne akeekettenna, dhayennanne haray oosettenna.

¹⁷ He woden istti Yerusalaame, ‹GODAA araata› gi xeygana. Kawoteththa ubbaafe asay GODAA sunth bonchchanaas Yerusalaame shiiqana. Hessafe istti bantta iita wozina hanoteththaa kaallettenna.

¹⁸ He gallassatan Yuhuda asati Isra7eele asatara gayttidi pudeha bagga biittafe tani kase intte aawatas xinxxo histta immida biitta issife yaana» gees.

Xoossa Derey Eeqa Misletas Goynnida Goyno

¹⁹ GODAY, «Tani nena attuma nayta mala wostta woththanaakko, doorettida biittayonne ay kawoteththika demmontta lo7o biittayo nena laatissana qoppadis. Qasse tana, ‹Ta aawawu!› gaada xeygana misatides; tana kaallizasoppe guye simmontta misatadasa;

²⁰ Gido attiin Isra7eele asawu! Intte ba azinaas ammanettontta maccassa mala taas ammanettibeekketa» gees.

²¹ Istti GODAA bantta Xoossaa balidi bantta oge geellasida gishshas Isra7eele deraa waasoy, misha yeehoy aykkoy baynda zumbullata bolla siyettees;

²² Istti, «Intteno ammanoy baynda asatoo! Taakko simmite. Intte ammanettana mala, tani inttena paththana» gides. Histtiin isttas, «Ero, nuni neekko simmana. Ays giikko neni GODAA nu Xoossa.

²³ Nuni zumbullata bollanne zumata bolla eeqa xoossatas goynoy tumappe nuus bala; tumappe nuus Isra7eeletas atoteththi GODAA nu Xoossaafe.

²⁴ Nuni yelagateththafe doommiin nu aawati daaburi demmida ayfeta, istta dorsatanne meheta, istta macca naytanne attuma nayta tuna xoossati mi dhayssida.

²⁵ Nuni yelagateththafe doommidi hach gakkanaas, nunikka nu aawatikka GODAA nu Xoossa bolla nagara ooththidos; GODAAS nu Xoossaas azazettibeekko; hessa gishshas ane nuni yeellateth gullunttidi ichchoos; qasse kawushshateththi nuna afala mala kammo» geettes.