ኤርማሳ ቲንቢቴ 22 - Geeshsha Maxaafa

Ermaasi Yuhuda Kawo Keeththa Asaas Yootida Qaala

¹ GODAY, «Duge Yuhuda kawo soo baada,

² ‹Nenoo Dawite kawoteththa araata bolla uttida Yuhuda kawoo! Neninne ne shuumeti, ha pengetara geliza as ubbay GODAA qaala siyite› ga» gees.

³ GODAY, «Suure pirdanne xillo ooththite; bonqqettidayta un7eththizayta kusheppe ashshite; beteta, yi7otanne am7eta qohopite; ha sohonkka xillo suuth gussofte.

⁴ Hayta azazota intte lo7eththi naagikko Dawite kawoteththa araata bolla uttiza kawoti ba shuumetaranne ba dere asaara para-gaarenne para toggidi hayssa kawoteththa keeththa pengera gelananne kezana.

⁵ Gido attiin intte ta azazota naagontta ixxiko, ‹Ha kawoteththa keeththay mulera dhayana› gaada tani tarkka tanan caaqqays» gides.

⁶ GODAY Yuhuda kawo keeththas, «Neni taas Gala7aade biittanne Libaanoose zuma xeera mala lo7ikkoka tani nena addafe bazzonne asi izan baynda katama ooththana.

⁷ Tani nena olizayta hu7en hu7en ola miish oyththada ne bolla yeddana; istti zigappe masettida tuuqeta qanxxereththidi taman yeggana.

⁸ «Dumma dumma kawoteththafe yida asay ha katamayra aadhdhi bishe, ‹GODAY hanno gita katamayo ays hayssaththo ooththidee?› giidi ba garsan haasayettana.

⁹ «Istti, ‹GODAA bantta Xoossaara caaqettida caaqo aggidi eeqa xoossatas goynnida gishshassinne isttas ooththida gishshassa› gaana» gees.

Ermaasi Shaalume Gishshas Yootida Qaala

¹⁰ Hayqqida Kawo Iyosiyaasas yeekkofte woykko kayottofte; Hessa aggidi di7etti bida Shaalumes mishettidi yeekkite. Gaasoykka izi mulekka guye simmenna; ba yelettida biitta nam7anththo be7enna.

¹¹ Ba aawa sohon Yuhudan kawotidi dishe ha sohoppe bida Iyosiyaasa naa Shaalume gishshas GODAY, «Izi mulekka guye simmenna.

¹² Izi di7etti bida biittan heen hayqqana; simmi yiidi ha biittayo be7enna.

Ermaasi Iyo7aaqeme Gishshas Yootida Qaala

¹³ «Ba kawoteththa keeththa genen keexxizayssas, pirda geellasidi pooqe keexxizayssas, as coo mela oosisizayssas, iza wolqqa waaga ciggonttaades,

¹⁴ Izi, ‹Gita pooqenne aaho kawoteththa keeth taas keexxana› gizaades aayye ana! Izi ba keeththas gita maskooteta kessees; ziga miththan alleqissees; zo7o qalamekka tiyees.

¹⁵ «Ne kawoteththa keeththa daro ziga miththan keexxidayssi nees kawotidaa misatizee? Ne aaway suure pirdanne xillo ooththida gishshas mizaazinne uyizaazi paccidee? Izas ubbaa miishshika injjetides.

¹⁶ Izi manqotassinne metotanchchatas pirda geellasibeenna; hessa gishshas ubbaa miishshika izas eeno gides; taas ero guussi hessa gidennee?

¹⁷ Gido attiin ne ayfeynne ne wozinay shempiday haa hee shocechchon demmiza go7an, xillota suuth gusson, asaa un7eththoninne gene oosonna» gees.

¹⁸ Hessa gishshas GODAY Yuhuda Kawo Iyosiyaasa naa Iyo7aaqeme gishshas, «Woo ta ishawu! Waay waay ta michchee! Qasse, ‹Ta godawu woo woo! Ne gitateththaa woo woo!› giidi zilalettenna.

¹⁹ Harey moogettiza mala izi moogettana; Iza ahay Yerusalaame pengetappe gooshettidi kare olettana» gees.

Yerusalaame Gishshas Ermaasi Yootida Qaala

²⁰ GODAY Yerusalaame, «Pude Libaanoose baada waassa; Ne qaalakka Baasaanen sissa; Abaarimen eqqada waassa; gaasoykka nees ola laggeti ubbay wurida.

²¹ Neni saro dishin ta nees minththa yootadis; gido attiin neni, ‹Siyikke› gadasa. Yelagateththafe doommiin ne ogey hayssa; neni taas azazettontta ixxadasa.

²² Ne heenththanchchata ubbaa carkoy efana; ne laggeti ubbay di7etti baana; ne iitateththaa ubbaa gaason yeellatananne kawuyana.

²³ Hanne Libaanoosen dizaaree! Ne keeththaa ziga miththafe keexxidaaree! miixay oykkida maccassa mala metoy ne bolla yishin waana waassandii!» gees.

²⁴ GODAY, « ‹Tani ta de7on caaqqays› Yuhuda kawo Iyo7aaqeme naa Ikoniyaane neni taas ushachcha kushe qalabate maatame gididaakkoka ta nena kessa olana.

²⁵ Nena wodhanaas koyzaytas, neni yayyiza Baabiloone Kawo Nabukadanaxooressinne iza olanchchatas tani nena aaththa immana.

²⁶ Tani nenakka nena yelida ne aayeyokka intte yelettontta allaga biittan ola aggana; intteka heen hayqqana.

²⁷ Intte simmanaas laamotiza biittayo mulekka simmeketa» gees.

²⁸ Hayssi Ikoniyaaney kadhettidi meqqida oto mala oonikka koyontta miishshe? Izinne iza nayti ays kare oletti attidoo? Istti ba erontta allaga biittan ays yegetti attidoo?

²⁹ Hanne biittayee, hanne biittayee! GODAA qaala siya!

³⁰ GODAY, «Yuhuda ayssanaas asi baynda gishshas, Dawite araatan uttana issaadeyka ke7ontta gishshas, issi paxa asi kezontta gishshas izas de7o layththa ubbaan injjetontta dhonththa as giidi xaafte» gees.