ኤርማሳ ቲንቢቴ 2 - Geeshsha Maxaafa

Isra7eele Asay Ooththida Nagara

¹ GODAA qaalay yiidi taas,

² «Ba! Baada waassa; Yerusalaame asaa hayththan sissa; GODAY, ‹Neni naateteththan ay keena ammanettidaakko, qasse neni buro mishiran dashe tana ay keena siiqidaakko, zereththi zerettontta bazzo biittan ne wostta kaallidaakko ta akeekays.

³ He wode Isra7eeley GODAAS geeshsha, koyro shiishshiza xeera kaththa mala; izo mittidayti mooranchcha gidida; istta bolla bashshi yides› » gees.

⁴ Intteno Yaaqoobe keeththa asatoo! Isra7eele zare ubbatoo! GODAA qaala siyite!

⁵ GODAY, «Kase intte aawati taappe haakkiday, hada yo7o kaalliday, ba hu7esikka go7ay bayndayta gididay taappe ay mooro demmidii?

⁶ Isttika, ‹Nuna Gibxeppe kessiday, bazzon samida ogera, kundukurcco biittara, melanne dhuma biittara, asi aadhdhonttasora nuna kaaleththi ehida GODAY awan dizee?› gi oychchibeettenna.

⁷ Intte izi ayfenne izi anjjo maana mala tani inttena aradda biitta ehadis; gido attiin intte yiidi ta biitta tunisideta; ta xinxxoyo harasettana mala ooththideta.

⁸ Qeesetikka, ‹GODAY awan dizee?› gi oychchibeettenna; Ta wogay istta kushen diza asatikka tana eribeettenna. Dere kaaleththizaytikka ta bolla makkallida. Nabeti Ba7aale sunththan tinbite yootida; go7ontta miishshatakka kaallida» gides.

⁹ Qasseka GODAY, «Hessa gishshas tani inttenara buro pirdettana; intte nayta naytarakka mootettana.

¹⁰ Kiitime pinni xeellite; Qeedaare kiittidi lo7eththi xomosite; Histtidi ane hayssa mala hanoy kase hani erizaakko be7ite.

¹¹ Istti tumu xoossata gidontta aggikokka ba eeqa xoossata laammida kawoteththi dizee? Ta derey gidikko isttas bonchcho gididayssa hada gidida eeqa xoossatan laammides» gees.

¹² Qasseka Ubbaafe Wolqqama GODAY, «Salotoo, ‹Hanno Poora!› giite; keehi dagammidi kokkorite!

¹³ Ta derey nam7u iita miishshata ooththides; de7o haaththa pultto gidida tana aggides; haaththa oykkanaas dandayontta lukettida ollata baas bookkida.

¹⁴ Isra7eeley kareppe yida ayllee? woykko soon yelettida ayllee? Histtiin ays bonqqas aadhdhi imettidee?

¹⁵ Gaammoti iza bollan xaaggida; istti bantta qaala dhoqqu histtidi iza bolla garmamida; istti iza biitta bula kessida; iza katamatikka xuugettidanne kayzida.

¹⁶ Qasseka Memppisanne Xaafinaase asati ne hu7e bulusida.

¹⁷ Oge nena kaaleththizayssa GODAA ne Xoossa aggada hayssa ne bolla ehiday nena gidikkii?

¹⁸ Shihoore shaafappe haath uyanaas, ay ekkanaas duge Gibxe wodhdhadii? Woykko Efiraaxise shaafappe haath uyanaas duge Asoore beeth ays koshshidee?

¹⁹ Ne iitateththi ne bolla qixaate gaththana; ne tana kaddoyssi ne bolla hanqo ehana. GODAA ne Xoossaa ne aggishin, taas yashshateth ne wudu gontta ixxishin ay mala iitaynne camo miishshi ne bolla gakkanaakko qoppa; ane akeeka» gees.

²⁰ Ubbaa Haariza GODAY, «Benippe doommada tani ne qambara menththadis; nena qachchida miishshika duuththadis. Histtiinkka, ‹Tani nees ooththike› gadasa. Histtada dhoqqa zumbullata achchan miththa garsan laymatanaas ichchadasa.

²¹ Tani nena muuruta zereththafe ekkada, lo7o woyne tura mala tokkadis. Histtiin neni waana guye simmada woran mokkidi moorettida woyne tura mala gidadii?

²² Neni hadinccen meecettikokka, woykko daro saamunan meecettikokka ne mooro qitay ha7ikka ta sinththan dees» gees Ubbaa Haariza GODAY.

²³ Neni waanada, «Tani tunabeekke; tani Ba7aale eeqatas goynnanaas woxxabeekke» gaanaas dandayay? Neni shoobban ooththidayssa ane qoppa; neni ooththidayssa ane akeeka; neni yaanne haa woxerettiza gaamella mala gidadasa.

²⁴ Neni bazzo biittan baas dose histtada ziita keza singeththashe woxxiza hardida mala gidadasa; Iza birassas kezaychchiko oonee izo teqqanaas dandayzay? Iza biras keziin izo koyzayti ubbati waayontta demmeettes.

²⁵ Ne tohoy argacana gakkanaas woxxofa; ne doonay saamon melana gakkanaas toylattofa; ne gidikko, «Coo daaburoppa; tani eeqa xoossata dosadis; tani istta kaallana» gadasa.

²⁶ «Kaysoy oykettidi yeellatiza mala Isra7eele asay yeellatides; isttika, istta kawoti, istta shuumeti, istta qeesetinne istta nabeti ubbay hessaththo yeellatana.

²⁷ Istti mith, ‹Neni ta aawaa› geettes; qasse shuch, ‹Neni tana yeladasa› geettes. Istti taas ba sinth zaaranayssa aggidi zokko zaarida; gido attiin istta metoy gakkida wode, ‹Yaada nuna ashsha› geettes.

²⁸ Histtiin ane intte inttes medhdhida xoossati awan dizoo? Yuhudaa, intte metotiza wode istti inttena ashshanaas dandaykko ane inttena yiidi ashshetto! Intteno Yuhuda asatoo! Intte xoossati intte katamata mala cora» gides.

²⁹ GODAY, «Intte tanara ays mootetteetii? Intte ubbayka ta bolla makkallideta.

³⁰ Tani intte nayta coo mela qaxxayadis; istti gidikko baaybeettenna; gafida gaammo mala intte mashshay intte nabeta mides» gees.

³¹ Intteno ha wode yeletatoo! GODAA qaala yuushshi qopite; «Tani inttes Isra7eele asaas bazzo mala woykko sakkanna dhumay diza biitta mala gidadinaa? Histtiin ays ta asay, ‹Nuni nu shene mala hanana; simmidikka neekko yookko› gizee?

³² Geela7oy ba alleqo woykko mishiraya ba mishirateththa may7o bala erazee? ta derey gidikko tana daro wode gakkanaas balides.

³³ Ziitan as oykkanaas ne ay mala eranchchaa? Huskku huskkiza iita maccassatikka ne hanoteththaafe daro iita miish tamaareettes.

³⁴ Ne istta kaysoteththan oykkontta xillo manqota suuththi ne may7o bolla beettides. Neni hayssa ubbaa ooththa woththadakka,

³⁵ ‹Tani xillo; tumappe iza hanqoy tana gakkenna› gaasa. Neni, ‹Tani nagara ooththabeekke› giza gishshas tani ne bolla pirdana.

³⁶ Histtiin ne oge laamma laamma ays woxxay? Kase nena Asoore biittay kawushshida mala Gibxe biittay nena kawushshana.

³⁷ Neni ammanettizayta GODAY kawushshida gishshassinne isttafekka maado demmontta gishshas hayssafekka ne hu7e kushen baqqa oykkada kezana.