ኤርማሳ ቲንቢቴ 18 - Geeshsha Maxaafa

Mana Keeththan Ermaasa

¹ GODAA matappe Ermaasakko,

² «Dendada manaso ba; heen ta nees ta kiita yootana» giza qaalay yides.

³ Tanikka duge manazaso badis; izi ba medhdhiza irzo bolla oto medhdhishin be7adis.

⁴ Izi medhdhishin otozi iza kushen moorettides; histtiin izi he urqqaa zaaridi ba koyida mala medhdhides.

⁵ He wode GODAA qaalay,

⁶ «Isra7eele asawu! Manazi ooththizayssaththo ta inttena ooththanaas dandaykkinaa? Isra7eele asawu! Urqqay mana kushen dizayssaththo intteka ta kushen deeta.

⁷ Tani issi derey woykko issi kawoteththi shodettana mala, laalettana malanne dhayana mala yootikko,

⁸ he tani yootida kawoteththay ba iitateththaafe aggidi simmiko, tani istta bolla ehana gida iita miish ehontta aggaagana.

⁹ Qasse hara wodekka tani issi dere woykko issi kawoteth minththa essanaas yootikko,

¹⁰ ta sinththan iita miish ooththikonne taas azazettontta ixxiko, ‹Ta izas ooththana› gida lo7o miishsha ubbaa ooththontta aggaagana» gees.

¹¹ GODAY, «Hessa gishshas, Ermaasa ha7i Yuhuda asatassinne Yerusalaamen dizaytas baada, ‹Hekko tani intte bolla bash giigso bolla days; intte bolla iita miish medhdhashe days; hessa gishshas intte ubbayka intte biza iita ogeppe simmite; intte ogenne intte ooso suurisite› ga yoota.

¹² Gido attiin isttas, ‹Daaburoppa; nu halchchida ogera baana; nuni issoy issoy nu iita wozina qofa kaallana› geettes» gides.

¹³ Hessa gishshas GODAY, «Ane kawoteththata, ‹Hayssa mala miishshi intte giddon seetetti erizee?› gi oychchite. Geela7oya Isra7eeley harassiza iita miish ooththadus.

¹⁴ Shuch xalla gidida Libaanoose zumata bollafe shachchi dhayi erizee? Ladde bollafe duge goggiza irxxa haaththi gogeth aggi erizee?

¹⁵ Ta derey gidikko tana balides; istti go7ontta xoossatas exaane cuwaseettes; bantta ogera biidi dhuphettida; beni ogeppe kare kezida; baasettontta diza kundukurcco ogera bida.

¹⁶ Istta biittay bulanne mernaas kadhettidaaz gidana; heera aadhdhiza ubbay malalettana; ba hu7ekka qidhishe qaaththana.

¹⁷ Arshey mokkiza bagga carko mala tani istta istta morkketa sinththan laallana. Istti dhayza gallas ta isttas zokko zaarana attiin ta ayfeso bessike» gees.

Ermaasa Bolla Maqettida Maqqo

¹⁸ Isttika, «Ane haa yiite; Ermaasa bolla maqettoos; wogay qeeseta achchan, zorey aadho eranchchata achchan, qaalaykka nabeta achchan dhayenna; ane haa yiite; nu inxarsan iza toochchoos; izi gizayssaka ubbaa siyokko» gida.

¹⁹ Abeet GODAWU! Ta gizaaz siya; ta morkketi ta bolla haasayzayssa ezga.

²⁰ Lo7o ooththidaades iita zaarizoo? Istti gidikko taas olla bookkida; ne hanqoy isttafe simmana mala ne sinththan eqqada istta gishshas ta yootidayssa qoppa.

²¹ Hessa gishshas istta nayta koshassinne mashshas aaththa imma; istta maccassati maynnenne am7eta gidetto; istta attumasatikka para hayqon wuretto; istta naateththa nayti olason mashshas gidetto

²² Istti tana kundisanaas olla bookkiza gishshassinne ta tohoska woximade woththida gishshas istti qoppontta neni istta bolla bonqqizayta yeddiin istta keeththan waasoy kezo.

²³ Gido attiin abeet GODAWU! istti tana wodhanaas maqettidayssa ubbaa neni eraasa; neni istta iitateththaa atto gooppa, woykko istta nagara ne sinththafe quccofa; istti ne sinththan xoonettidi kundetto; Ne hanqo gallas ne istta maaroppa.