ኤርማሳ ቲንቢቴ 17 - Geeshsha Maxaafa

Yuhuday Ooththida Nagara Gishshas Imettida Qixaate

¹ GODAY, «Yuhuda nagaray birata bi7ireninne hoxe almaaze xeeran xaafettides; istta wozina bollanne istti yarshizason diza kaceta bolla xaafettides.

² Isttas naytikka attontta cilila miththata garsaninne dhoqqa zumbullata bolla diza yarshosotanne Asheero geetettiza eeqa misleyo qoppeettes.

³ Ne biittan oosettida nagara gaason zumata bollanne zumbullata bolla diza ne aqota, ne dureteththinne ne goynosota tani di7os aaththa immana.

⁴ Ne mooro gaason ta nees immida xinxxozappe ne mela attana; nena tani ne erontta biittan ne morkketas ayllesana. Gaasoykka mernaas tama mala eexxiza ta hanqoza ne denththeththadasa» gees.

Dumma Dumma Leemisota

⁵ GODAY, «Asan ammanettizay, asho may7ida asan ceeqettizay, ba wozina GODAAPPE haassizay qanggettidaade.

⁶ Izi bazzon diza qeeri wora mala gidana; izi lo7o miish be7enna; izi asi baynda maxine biittan bazzon mela sohon uttana.

⁷ Gido attiin GODAAN ammanettiza asi, izi ammanettizay GODAA gididaadey anjjettidaade.

⁸ Izi haaththa lanqen tokettidi, ba xapho duge haaththan yeddida miththa mala. Awa seelaskka yayyenna; iza hayththay cililida mala daana; away darida layththika babbenna; ayfe imoppeka paccenna.

⁹ Asa wozinay ubbaa miishshafekka gene; izas paxateththika deenna; iza eranaas ooni dandayanee?

¹⁰ Tani GODAY as ubbaas iza oge malanne iza ooso mala immanaas asaa wozina pilggayssinne iza kaha paaccays» gees.

¹¹ Bessontta ogera aqota dagasiza asi ba phuqisontta ciye haphphiza kuracho mala. Iza layththay buro baggattishin izi aqota aggi baana; wurseththan iza eeyateththi qoncce kezana.

¹² Nu Xoossa Keeththi dizasoy benippe doommidi dhoqqu gida bonchcho araata.

¹³ Isra7eeles hidota gidida GODAWU! nena aggi bida ubbay yeellatana; nena de7o haaththa pultto gidida GODAA aggida gishshas ba ayfeso neeppe haraso zaarizayti gudulla bolla xaafettidayssa mala gidana.

Ermaasa Woosa

¹⁴ Abeet GODAWU! Tana paththa; tanikka paxana; tana ashsha; tanikka attana; gaasoykka ta galatay nena.

¹⁵ Asay tana zaari zaaridi, «GODAA qaalay awan dizee? Ane ha7i poletto!» geettes.

¹⁶ Heenththanchcha gidada nees ooththanaappe guye gabeekke; ta isttas iita gallas amottonttayssa ne eraasa; ta doonappe kezizayssi ne sinththan qoncce.

¹⁷ Tana daganththizaade gidoppa; neni taas meto gallas ta baqata attizasoho.

¹⁸ Tana yedeththizayti yeellatetto; tana yeellasoppa; istti dagammetto; gido attiin tana dagamappe qotta; istta bolla iita gallas eha; istta bolla dakko bash eha.

Sambata Bonchcho

¹⁹ GODAY tana, «Yuhuda kawoti katama gelizaasoninne kezizaaso deraa pengeninne hara Yerusalaame pengeta ubbaan baada eqqa.

²⁰ Histtada isttas, ‹Ha pengetara geliza Yuhuda kawoto! Yuhuda asatoo! Yerusalaamen diza as ubbatoo GODAA qaala siyite!› ga» gees.

²¹ GODAY taas, «Sambata gallas tooho tookkidi Yerusalaame pengetara gelontta mala inttes naagettite!

²² Sambata gallassan intte keeththafe tooho tookkidi kessofte; woykko aykko oosonne ooththofte. Kase intte aawata tani azazida mala, Sambata gallas dummasidi bonchchite.

²³ Istti gidikko siyibeettenna; wozinankka woththibeettenna; istti siyontta malanne simmontta mala ba wozina muumisida.

²⁴ Gido attiin intte tani GODAY yootizayssa naagetti azazettiko, Sambata gallassan ay miishshika tookkidi hanno ha katamay pengetara gelontta aggiko, Sambata gallas dummasidi izan ay oosonne ooththontta bonchchiko,

²⁵ Dawite kawoteththa araatan uttiza kawotinne istta shuumeti ha katamay pengera gelana; istti ba parataninne ba para-gaareta bolla uttidi Yuhuda asaynne Yerusalaame asay azhabiin yaana; ha katamaya mernaas asi diza katama gidana.

²⁶ Asay xuugettiza yarshonne hara yarsho, kaththa yarsho, exaanenne galata yarsho ekkidi, Yuhuda katamatappe, Yerusalaame yuushon diza mooththatappe, Biniyaame biittafe, gadhappenne gezzefe qasseka Negebe biittafe GODAA Keeth yaana.

²⁷ Gido attiin intte Sambata gallassata dummasontta ixxidi sambata gallas tooho tookkidi Yerusalaame pengetara gelidi ta azazo menththiko tani Yerusalaame pengeta bolla izi miixata miza to7ontta tama ta eeththana» gides.