ኤርማሳ ቲንቢቴ 15 - Geeshsha Maxaafa

Yuhuda Asaa Bolla Gakkana Pirda

¹ Hessafe guye GODAY taas, «Museynne Sameeli ta sinththan eqqidaakkoka ta wozinay ha deraas mishettenna; istta ta sinththafe digga; istti betto.

² Qasse istti nena, ‹Nuni awa biinoo?› gi oychchiko, ne isttas, ‹Hayqos pirdettidayti hayqqana; mashshas pirdettidayti mashshan shukettana; koshas pirdettidayti koshan wurana; di7ettanaas pirdettidayti di7etti baana.›

³ «GODAY, ‹Tani oyddu qommo bash istta bolla ehana; heytikka istta wodhanaas mashsha, istta aha goochchanaas kanata, istta ashoza miidi dhayssanaas salo kafotanne sa7a do7ata.

⁴ Hizqiyaasa naa, Yuhuda Kawo Minaasey Yerusalaamen ooththida pala gishshas tani istta bolla sa7a kawoteththata ubbaas daganththizaaz ooththana› gees gaada yoota» gides.

⁵ «Hanne Yerusalaamee! Nees oonee qadhettanay? Nees mishettanay oonee? Ne lo7eteththa geli oychchanay oonee?» gees.

⁶ «Ne tana aggadasa; guye guye baasa; hessa gishshas tani ne bolla ta kushe denththada nena dhayssana; hayssafe guye nees qadhettike.

⁷ Tani istta kath suraggiza mala suraggada katamata pengen laallana; istti ba ogeppe simmontta aggida gishshas tani ta dereza kayon kunththana; istta bollaka bash ehana.

⁸ Tani istta am7eta qooda abban diza aceppeka darsana; mino aayeta dhayssizaaz seeta gallas ta istta bolla ehana; istti qoppontta dishin dagamanne shiro ta istta bolla yeggana.

⁹ Laappun nayti hayqqida aaya dagaman daaburana; peenora dhayana izis gallassay qammana; iza yeellatananne kawuyana; attidaytakka morkketa mashshas aaththa immana» gees GODAY.

Ermaasi Ba Metto Godaas Magannides

¹⁰ Ta aayee! Hanno poora! Tani as ubbaas ooshshasinne palamas gidana mala ays tana yeladii? Tani oonaska tal7e immabeekke; oonappeka tal7e ekkabeekke; gido attiin asi ubbay tana qanggees.

¹¹ GODAY, «Tumappe tani nena lo7o miishshas ashsha ekkana; Tumappe ne morkketi meto wodenne waaye wode nena shoobbana mala tani ooththana.

¹² Asi birata, pudeha baggafe yida birata woykko xarqimala menththana dandayzee?

¹³ Ne dere ubbaan oosettida nagara gishshas ne aqota ubbaa di7izaytas coo aaththa immana.

¹⁴ Ta hanqoy intte bolla tama mala eexxana; hessa gishshas neni ne erontta biittan ne morkketas tani nena ayllesana» gides.

¹⁵ Abeet GODAWU! Ne eraasa. Tana qoppa; mokkaka xeella; tana yedeththizayta bolla halo kessa; ne dandayanchcha gidida gishshas tana dhayssofa; ne gaason tana gakkiza kadheza ne qoppa.

¹⁶ Abeet Ubbaafe Wolqqama GODAWU! tani ne sunththan xeygettida gishshas ne qaalay taakko yiin madis; histtiin ne qaalay taas pashkanne wozina ufays immides.

¹⁷ Guppizaytara uttabeekke; isttarakka guppabeekke. Neni ne kushe ta bolla denththida gishshassinne ne hanqo ta bolla yeddida gishshas tani tarkka uttadis.

¹⁸ Ta bolla hargey ays minnidee? Ta madunththay ays dari dari bidee? Ays paxontta ixxidee? Neni taas baleththiza shaafa malanne cimmiza pultto mala ays gidadii?

¹⁹ Hessa gishshas GODAY, «Neni simmiko ta nena zaara essana; nekka taas ooththana. Hada yo7o aggada bonchcho qaala xalla haasaykko neni ta doona gidana. Istti neekko simmana attiin ne isttako simmaka.

²⁰ Ta nena ha deraas gimbe ooththana; xarqimalappe oosettida gimbe mala histtana; tani nena ashshanaassinne woththa ekkanaas nenara diza gishshas istti nenara olettana shin nena xoonettenna.

²¹ Iitata kusheppe tani nena wozzana; menxe iitata qohoppeka ta nena ashshana» gees.