ኤርማሳ ቲንቢቴ 13 - Geeshsha Maxaafa

Laynoppe Oosettida Dancco

¹ GODAY tana, «Baada laynoppe oosettida dancco shammada ne xeessan dancca; gido attiin haaththan boshisoppa» gides.

² Hessa gishshas tani GODAY azazida mala dancco shammada ta xeessan danccadis.

³ GODAA qaalay nam7anththo taakko yiidi,

⁴ «Neni shamma danccida danccoza ekkada Efiraaxise Shaafa ba; histtada zaalla za7a giddon qotta» gides.

⁵ Histtiin tani GODAY taas yootida mala efada Efiraaxise Shaafa lanqen qottadis.

⁶ Daro gallassafe guye GODAY, «Denda Efiraaxise Shaafa baada tani nena, ‹Heen qotta› gida danccoza kessa» gides.

⁷ Histtiin tani Efiraaxise Shaafa ba bookkada danccoza ta qottidaasoppe kessadis; gido attiin he danccozi moorettidi mulera go7onttaaz gidides.

⁸ Hessafe guye GODAA qaalay taakko yiidi,

⁹ «GODAY tani Yuhuda asaa otoreteththinne Yerusalaame asaa ceeqeteth hessa mala dhayssana.

¹⁰ Ta qaala siyontta ixxidi, bantta wozina muumeteththa kaallidi, eeqa xoossatas ooththanaassinne goynnanaas biza ha iita asay hayssa danccoza mala mulekka go7onttayssa gidana.

¹¹ Danccoy asa xeessa baqqi oykkiza mala Yuhuda asay ubbaynne Isra7eele asay ubbay taakko shiphphi gaana malanne ta sunththas galatanne bonchcho immana mala ta ooththiin istti ta gizaaz siyibeettenna» gees.

Woyne Ushsha Oto

¹² Qasseka GODAA Isra7eele Xoossay, «Ermaasa! Asaas, ‹Oto ubbaan woyne ushshay kumana› gees. Istti nees zaaridi, ‹Oto ubbaan woyne ushshi kumanayssa waani nu erokkonii?› giikko,

¹³ neni isttas, ‹GODAY tani ha biittan diza asaa ubbaa, Dawite kawoteththa araatan uttiza kawota, qeeseta, nabetanne Yerusalaamen diza asaa ubbaaka ta woyne ushshan maththosana.

¹⁴ Tani issi as hara asara, aawa naara ooshshana; tani istta dhayssana attiin isttas mishettike; qadhettikenne maarikke› gees ga» gides.

Otoreteththi Ehiza Ayfe

¹⁵ GODAY yootides; wozinan woththi siyite; aggite otoranchcha gidopite.

¹⁶ Izi dhuma ehontta dishin dhumida zumata bolla intte tohoy dhuphettontta dishin GODAAS intte Xoossas bonchcho immite; Intte, «Poo7oy yaana» giidi naageeta; gido attiin izi dhuman laammana; sakkanna dhuma ooththana.

¹⁷ Intte siyontta ixxiko, intte otoreteththaa gishshas ta shemppoya geeman yeekkana; GODAA wudey di7etti bichchida gishshas tani camo yeeho yeekkays; ta ayfeppe afunththi haaththa mala goggees.

¹⁸ GODAY tana, «Kawozasinne iza aayo godatteys, ‹Intte bonchcho kallachchay intte hu7eppe wodhdhana gishshas, intte kawoteththa araataappe duge wodhdhite.

¹⁹ Negebe biittan diza katamati ubbay gordettana. Istta doyanaadeyka deenna; Yuhuda asay ubbay di7ettidi baana; istta ogeykka gordettana› ga» gides.

²⁰ Qasseka GODAY, «Ane dhoqqu giidi pudeha baggafe yizayta xeellite; inttes imettida wudey, intte ceeqettiza dorsati awan dizoo?

²¹ Neni nees dabbo gidana mala koyidayti nena xoonidi haariza wode ne ay gaanee? Yelo miixay oykkida maccassa mala nena miixay oykkennee?

²² Neni ne wozinan, ‹Hayssi ubbay ta bolla ays gakkidee?› giikko, ne may7oy qaarettiin ne sugettiday, ne asa kushen waaye be7iday ne nagaray darida gishshassa.

²³ Tumu Tophphiya asi ba medha, woykko maahey ba masarateththaa laammanaas dandayzee? Intte iita ooththi meezetidayti lo7o ooththanaas dandayekketa» gides.

²⁴ GODAY, «Bazzo carkoy suulla laalliza mala tanikka inttena laallana.

²⁵ Intte tana dogida gishshassinne wordo xoossatan ammanettida gishshas intte saamaynne intte qaaday hayssa.

²⁶ Intte kalloy beettanaashe gakkanaas tani intte may7o qaarada intte sinth kammana.

²⁷ Intte zumbullata bollanne demban ooththida harassiza ooso tani be7adis; intte laymateththanne intte ziita hanota ta be7adis; Yerusalaame nees aayye ana! Neni ayde gakkanaas ne tunateththaafe geeyontta daanee?» gees.