ኤርማሳ ቲንቢቴ 12 - Geeshsha Maxaafa

Ermaasa Oysha

¹ Abeet GODAWU! Tani nenara palamettiza wode ubbaankka ne xillo. Iita asati ooththizayssi isttas ays injjetizee? Ammanettonttayti ays ishalo duus dizoo?

² Neni istta tokkadasa; histtiin xapho yeddida; diccidi ayfe ayfida. Istti nena doonappe yeggettenna; neni gidikko istta wozinappe haakon daasa.

³ Gido attiin abeet GODAWU! Neni tana eraasa. Tana be7aasa; tani nees ay qoppizaakko paaccaasa. Shukettana biza dorsata mala neni istta laagga! Shuka gallassas istta dumma shaakka woththa!

⁴ Iray dhayiin biittay ayde gakkanaas melanee? Maataykka ayde gakkanaas melanee? Asaa iitateththaafe dendidayssan medosatinne kafoti dhayda. Hessa bollaka asay, «GODAY nuni ooththizayssa demmenna» gees.

Goday Ermaasa Oyshaas Immida Zaaro

⁵ GODAY Ermaasas, «Neni tohon woxxiza asatara woxxada daaburkko parara waana gaadde woxxanee? Neni saro biittan dhuphettiko, Yordaanoose wora garsan waana hemettanee?

⁶ Ne ishatinne ne soho asati nena hilida; ne bolla waassida; hessa gishshas istti nees lo7o haasaykkoka ne istta ammanoppa.

⁷ Tani ta keeththaa aggana; ta xinxxoyokka yegga aggana; tani ta siiqiza asaa istta morkketa kushen aaththa immana.

⁸ Ta xinxxoya wora giddon diza gaammo mala ta bolla dendadus; ta bollaka xaaggadus; hessa gishshas tani izo ixxadis.

⁹ Ta xinxxoya phircoti maana giddoththida kafo mala gidabeekkee? Biidi wora do7ata ubbaa shiishshite; istti izo duuththeththi maana mala xeygite.

¹⁰ Daro heenththanchchati ta woyne tura soho moorida; tani izan ufayettiza ta gadeza bulasida.

¹¹ He biittay ta sinththan bazzo, bulanne mela biitta gidana; izis qoppizay baynda gishshas biittaya bazzo gidana.

¹² Bazzon diza zumbullata bollafe dhayssizayti yaana; gaasoykka GODAA mashshay biitta ha gaxaappe he gaxa gakkanaas maana. Hessa gishshas oonikka attanaas dandayenna.

¹³ Istti gistte zeridi agunth cakkana; istti daro daaburanaashin aykkoka demmettenna; daro zeridi GODAA hanqo gaason intte guuth demmidi yeellatana» gides.

¹⁴ GODAY, «Tani ta dere Isra7eeles immida xinxxo biitta oykkiza iita shoorota tani istta istta biittafe dhoqallana. Qasse Yuhuda asatakka istta giddofe dhoqallana.

¹⁵ Gido attiin tani istta istta biittafe dhoqallidaappe guye zaarada maarana; tani istta dereninne istta xinxxon xinxxon zaara ehana.

¹⁶ Kase ta asaa Ba7aale sunththan caaqqana mala tamaarsoyssaththoka, ‹GODAY be7iin!› giidi ta sunththan caaqqiko istti ta asaa giddon xaphphidi daana.

¹⁷ Ta gizaaz ekkontta kawoteththi diikko ta iza mulera dhoqalla dhayssana» gees.