ኤርማሳ ቲንቢቴ 10 - Geeshsha Maxaafa

Xoossenne Eeqa Xoossata

¹ Intteno Isra7eele asatoo! GODAY inttes yootiza qaala siyite!

² GODAY, «Kawoteththata oge intte tamaaropite. Istti salo bolla malata be7idi shirotikkoka, intte shirotopite.

³ Gaasoykka dereta wogay hada. Istti mith worappe qanxxeettes; hiillay massi giigssees.

⁴ Istti biraninne worqqan alleqisseettes; qaaxxontta mala naariqara misimaaren dhishkidi oyththeettes.

⁵ Istta eeqa xoossati istta kaththa giddon do7a daganththanaas essiza misle mala. Haasayanaas dandayettenna. Hemettanaas istti dandayontta gishshas asay istta tookkees. Istti iita gidiin woykko lo7o miish intte bolla ooththanaas dandayontta gishshas isttas mulekka yayyofte» gees.

⁶ Abeet GODAWU! Ne malay oonikka deenna. Neni gita; ne sunththayka gitanne wolqqama.

⁷ Abeet kawoteththatas kawoo! Nees yayyonttay oonee? Nees bonchchoy bessees; gaasoykka aadho eranchchata garsaninne istta kawoteththata ubbaa garsan ne malay deenna.

⁸ Hada gidida miththafe masettida eeqa xoossatappe timirte tamaarza ubbay eeyanne damma.

⁹ He eeqa xoossati Tarseeseppe yida biraninne Ufaazeppe yida worqqan alleqettida. Istti woyne ushshaninne ochcha teera misatiza medhara diza may7on kamettida. Istti ubbay kushe ooso hiillatan oosettida.

¹⁰ Gido attiin GODAY tumu Xoossa; izi de7o Xoossanne mernaa Kawo. Izi hanqettiza wode biittay qaaxxees; kawoteththatikka iza yiillo dandayettenna.

¹¹ GODAY, «Intteka, ‹Heyti salonne sa7a medhdhontta xoossati sa7appenne salo garsafe dhayana› geeta» gees.

¹² Ba wolqqan sa7a medhdhiday, ba aadho erateththan alame essiday, ba akeekan salo micciday GODAA.

¹³ Izi guummiza wode, salon diza ubbay qaaxxees. Izi shaara sa7a gaxappe pude denththees. Izi irara dada yeddees; carkoka ba minjjasoppe kessees.

¹⁴ Asi ubbay era dhaydi dammides; worqqa seerisiza asi ubbay ba ooththida eeqa xoossatan yeellatides. Gaasoykka eeqa xoossati wordo; isttas shemppoy deenna.

¹⁵ Istti coo qidhes medhettida miishsha. Pirday istta bolla gakkiza wode istti dhayana.

¹⁶ Gido attiin Yaaqoobe qaaday heyta mala gidenna. Gaasoykka izi ubbaa medhdhidayssa; Isra7eeley doorettida dere. Iza dooridayssa sunththay Ubbaafe Wolqqama GODAA Xoossa.

Buroppe Yaana Iita

¹⁷ Intteno morkkey giddoththidaytoo! Diza miish dizasoppe shiishshite.

¹⁸ Gaasoykka GODAY, «Tani ha sa7a bolla diza asaa ha7i gede kare kessada gooddana. Isttas erettana mala ta istta bolla meto ehana» gees.

¹⁹ Waanoo ay hanoo! Ta madunththay paxontta madunththa. Gido attiin ta tana, «Hayssi ta harge; tani dandayanaas bessees» gadis.

²⁰ Ta dunkaaney laalettides; iza wodoroy ubbay duuxerettides. Ta nayti ubbay taappe shaakettidi bichchida; hayssafe guye simmettenna; ta dunkaana zaaridi tolanaas woykko ta magalasha kaqqanaas ha7i issi asinne attibeenna.

²¹ Heenththanchchati dammida; istti GODAA oychchibeettenna. Hessa gishshas isttas injjetibeenna; istta wude ubbay laalettides.

²² Siyite! Iita yo7oy yuussa bolla dees; hessi, «Pudeha baggara diza kawoteththan gita bul7aketeththi yuussan dees» gizayssa. Iza olanchchati yiidi Yuhuda katamata bazzonne worakanata duussaso kessana.

²³ Abeet GODAWU! Asa de7oy izaade kushen donttayssanne ba hemetaakka barkka ba shene mala lo7eththana dandayonttayssa ta erays.

²⁴ Abeet GODAWU! Tana seera; gido attiin ginara gido. Tani mulera dhayontta mala neni hanqora ta bolla yooppa;

²⁵ Yaaqoobe mulera mi mittidayta bollanne ne sunththaa xeygontta asata bolla guussa. Iza duussasokka kayzisida gishshas neni ne hanqoza nena erontta dereta bollanne ne sunth xeygontta kawoteththata bolla gussa.