ዳናታ ማጻፋ 5 - Geeshsha Maxaafa

Dibooraynne Baraaqey Yexxida Yeththa

¹ He gallas Dibooraynne Abino7aame naa Baraaqey hayssafe kaalliza yeththaa yexxida.

² «Kaaleththizayti Isra7eele kaaleththishin, dereykka ba shenen haarettishin GODAA galatite!

³ «Intteno kawotoo! Hayssa siyite! Intteno dere haarizaytoo! Ezgite! Tani GODAAS yexxana; Isra7eele GODAAS galata mazamure yexxana.

⁴ «Abeet GODAWU! Neni Seyre dereppe dendida wode, neni Eedoome biittafe kezida wode, biittay qaaxxides. Saloppe iray bukkides; ee, iray shaaratappe duge bukkides.

⁵ GODAA Isra7eele Xoossaa sinththaninne Siina GODAA sinththan zumati qaaxxida.

⁶ «Anaate naa Shamgare wodeninne Ya7eele woden ogey samides; zal7anchchatikka he biittara kanththi beettenna. Ogezara bizaytikka ogaa aggidi harasora bida.

⁷ Isra7eele mandarati asi dontta bazzo gidida. Tani Dibooray Isra7eele asaas aayo gidada dendana gakkanaas xoonidi attiday baawa.

⁸ Isra7eele asay allaga xoossata doorida wode, biittan olay dendides; oyddu tammu shii Isra7eele olanchchata giddon issi gondalley woykko issi tooray beettibeenna.

⁹ Ta wozinay Isra7eele daannatara dees; asaa giddon dosan bana aaththi immidaytara dees. GODAY galatetto!

¹⁰ «Intteno koorettida booththa hare toggizaytoo! Intteno lo7o araatan utti aleqettizaytoo! Intteno tohon hemettizaytoo!

¹¹ Haaththa pulttota heeran yexettiza yeththaa siyite; istta GODAY xoonidayssa akeekissees; qasse Isra7eele asay xoonidayssa nashshees. «GODAA asaykka katama geliza pengetakko duge wodhdhides.

¹² ‹Diboora! Beegga! Beegga! Beegottada mazamure yexxa. Nenoo, Abino7aame naa Baraaqe, denda! Ne di7idayta ekkada sinththe gujja.›

¹³ «Hessafe guye attida asati halaqataakko duge wodhdhida. GODAA asati olettanaas giigidi Baraaqekko yida.

¹⁴ Kase Amaaleeqe zareti dizason diza Efreeme asaappe issi issi asati yida. Qasse harati Biniyaame zereththatappe istta kaallida. Maakire zaretappe daannati, Zaabiloone zaretappe kawoteththan uttizayti yida.

¹⁵ Yisakoore zereththafe daannati Diboorira yida; ee, Yisakooreynne Baraaqeykka yida; isttika Baraaqe kaallidi duge zulleza wodhdhida. Gido attiin Oroobeele zareti qofan shaaketti wodhdhida; Yaanaakkonne yonttaakko sidhida.

¹⁶ Ne ays dorsa yire giddon uttadii? dors heemmizayta wayqeth siyanaas uttadii? Oroobeele zareti qofan shaaketti wodhdhida; Yaanaakkonne yonttaakko sidhida.

¹⁷ Gala7aade zareti Yordaanoose shaafappe he pinththan attida; Daane zareti ays markabe giddon gam7idoo? Aaseere zareti ba dizason attida; Mediteraane abbaa lanqenkka de7ida.

¹⁸ Zaabiloone zareti bantta shemppo hayqos aaththi immida. Niftaaleme zaretikka isttaththoka ola demban ooththida.

¹⁹ «Kawoti yiidi Magiddo pulttota matan diza Ta7inaaken ola oykettida. Kanaane kawotikka heen olettida; di7i ekkanaas aykko miishshika demmibeettenna.

²⁰ Salo xoolintteti izara olettida. Bantta hanotan Sisaarara ola qaqaphu gida.

²¹ Beni Qisoone shaafaa kixay istta denththi efides; isttika haron meecetti dhayda; Ta shemppoyee minna; wolqqankka sinth gujja.

²² Hessafe guye toga asati togan adaraasi yida. Toga parata giirissay dada giirissa mala.

²³ GODAA kiitanchchay, ‹Merooze qanggite! heen diza asaa issife qanggite! Gaasoykka istti GODAA asaa olan maaddontta ixxida. Wolqqama istta morkketara olettanaas kezibeettenna› gides.

²⁴ «Qenaawe dere as Heebere machchiya Ya7eela maccassa ubbaafe anjjettidaaro gidu. Dunkaane giddon diza maccassa ubbaafe iza anjjettidaaro gidu.

²⁵ Sisaari izo, ‹Tana haath ushsha› gi woossides; iza gidikko meqa maath shiishshadus; lo7o wancan izas immadus.

²⁶ Issi kushen dunkaana dhishke, ushachcha kushen oosanchchata qoyxe oykkadus; Sisaara hu7en dhishkadus; hayththa corcorora lukka kessadus.

²⁷ Bolqu gi kundides; izi toho garsankka gufannides; he kundida sohon hayqqides.

²⁸ «Sisaara aayeya maskootera be7adus; maskoote xoo7erakka tishshi histta xeellashe, ‹Ta naaza para-gaarey ays gam7idee? Para-gaareti eesotidi ays simmibeettennee?› gaada waassa oychchadus.

²⁹ Aadho erateththi diza izi maccassati izi oyshaa zaarida; gido attiin iza ba qofan baas,

³⁰ ‹Istti di7idi ehidayssa gishetti ekkishin issaade issaade issi issi geela7oy woykko nam7u nam7u geela7oti gakkeettes. Sisaaras istti dumma dumma qalamen oosettida aleqo may7o immana; qasse taaska qoodhen xaaxanaas xilifen alleqidi lo7iza may7ota ehana› gadus.

³¹ «Abeet GODAWU! Ne morkketi ubbay hessaththo hayqqetto! Gido attiin ne siiqoti maalado mokkiza arsheda phoolletto.» Hessafe guye biittay oyddu tammu layth woppa demmides.