ያቆቤ ኪታ 1 - Geeshsha Maxaafa

¹ Xoossa oosanchchanne Yesus Kirstoosa oosanchcha gidida Yaaqoobeppe biitta bolla laalettida tammanne nam7u kochchatas saroteththi inttes gido.

Metonne Paace

² Ta ishatoo! Intte bolla dumma dumma waayey gakkiko hessa wursi ufayssan qoodite.

³ Gaasoykka intte ammano paaceteththi inttes dandaya immizayssa intte ereeta.

⁴ Intte dandayan minni eqqanayssi inttes issi miishshika paccontta kumeththa asinne wosoy bayndayta gidana mala ooththo.

⁵ Intte giddofe oonaska erateththi pacciko oonakka leqqontta ba kiyateththaara ubbaas immiza Xoossaa woosso; izaadeska imettana.

⁶ Gido attiin sidhey baynda ammanon woosso; gaasoykka sidhizaadey abba qaaththiza dambala carko mala.

⁷ Hessaadey Godaappe aykkoka demmana giidi qoppofo.

⁸ Hessaadey nam7u qofan oykettidi ba biza oge bolla yaanne haa giza asa mala.

⁹ Kase ziqqa duussan dizaade Xoossi dhoqqu histtana gishshas ufayetto.

¹⁰ Asa dureteththi maata ciishsha mala qokkana gishshas duussan dhoqqu gidaadey Xoossi iza ziqqi histtiko ufayetto.

¹¹ Arshey xuuggidi maata shullisees; maata ciishshayka shullees; iza lo7eteththika dhayees; hessaththoka durey hach hach daabursan dishin iza dureteththi dhayees.

¹² Paacen minni eqqidaadey izi anjjettidaade; gaasoykka izi paacera eqettishin Xoossi bana dosizaytas immida hidota de7o akilile izi ekkana.

¹³ Oonikka paacettizaa gidikko tana Xoossi paaccees gooppo; gaasoykka Xoossi ase iitan paaccenna; izi oonakka paacci erenna.

¹⁴ Gido attiin issi issi asi paacettizay barkka ba iita amo kaallishenne balettishe paacettees.

¹⁵ Amoy qanththatidi nagara yelees; nagaraykka diccidaappe guye hayqo yelees.

¹⁶ Ta siiqo ishatoo! Intte balettofte.

¹⁷ Lo7o imoteththinne kumeththa anjjoy wuri bolla salo poo7ota Aawappe wodhdheettes; iza achchan yaanne haa yuuyiza eeshoykka deenna.

¹⁸ Nu iza medheteththaas koyro bayrata gidana mala ba sheneninne ba tuma qaalaan nuna yelides.

Siyidayssa Ooso

¹⁹ Dosettida ta ishatoo! Hayssa yuushshi qopite; asi wurikka siyanaas eesoto; haasayassinne hanqos eesotoppo.

²⁰ Asa hanqoy Xoossa xilloteth ooththenna.

²¹ Hessa gishshas tunateththinne dalgida iitateththi inttefe kessi yeggidi intte shemppo ashshanaas dandayza intte giddon tokettida qaalaa ashketeththara ekkite.

²² Qaalay gizayssa ooththite attiin mela sis xalla siyizaadentta gididi intterkka inttena baleththofte.

²³ Qaalaa siyishe siyida qaalay gizayssa ooththonttaadey ba ayfeso mastootera xeelliza asa mala.

²⁴ Bana xeelli be7idi bees; izi ay misatizaakko heerakka balettichchees.

²⁵ Gido attiin bana geeshshiza lo7o wogaa xeelli be7idi izan minnizaadey ba siyidayssa ooththizaadeynne balonttaadey izi ba ooson anjjettidaade gidana.

²⁶ Ba doona naagontta barkka ba wozina baleththishe ta ammanays gizaadey barkka bana baleththees; iza ammanoykka hada ammano.

²⁷ Xoossaa Aawaa sinththan iitateththi baynda lo7o ammanoy aayanne aaway hayqqida nayta, istta azinati hayqqida maccassata metotettishin maadonne hayssa alameza tunateththaafe bana naago.