ኢሳያሳ ቲንቢቴ 9 - Geeshsha Maxaafa

Sinththafe Kawotana Saroteththa Kawo

¹ Ceecishe dizaytas hayssafe guyen hidotay dhayenna; beni wode Zaabiloone biittanne Niftaaleme biitta kawushshides; sinththafe yaana woden gidikko Mediteraane abbaa ogen de7iza biittanne Yordaanoose Shaafappe he pinththan de7iza, «Ayzaabeti de7iza Galila biitta» izi bonchchana.

² Dhuman de7iza derey wolqqama poo7o be7ides; hayqo kuwa garsan diza deretas poo7oy poo7ides.

³ Neni kawoteththaa darsadasa; isttas ufayssaa bolla ufays gujjadasa; asay kath shiishshishenne di7i ekkida miish gishettishe ufayettiza mala isttika ne sinththan ufayettana.

⁴ Kase neni Midiyaame biitta xoonida mala istta deexxiza qambara, istta hashe bolla wodhida durqqanne istta waayisi haarida guufe menththadasa.

⁵ Olanchchata caammay ubbay, suuththan moorettida may7o ubbayka taman dunne gidi eexxana.

⁶ Hekko nuus nay yelettides! Attuma naykka nuus imettides! Halaqateththi iza hashe bolla gidana; iza sunththi, «Malalisiza zoranchcha, Wolqqama Xoossa, Mernaa Aawa, Saroteththa Halaqa» geetettana.

⁷ Iza kawoteththa aakoteththaassinne iza saroteththaas zaway deenna; hachchife doommidi mernaa gakkanaas ba kawoteththaa, suure pirdaninne xilloteththan essana; lo7eththi oykkidi minththana; Dawite kawoteththa araatan izi uttana; deraa ubbaa haarana; Ubbaafe Wolqqama GODAA qanaatey hessa polana.

Isra7eele Bolla Xoossa Hanqo

⁸ GODAY Yaaqoobe zareta bolla pirda qaala kiittides; izikka Isra7eele bolla polettana.

⁹ Efreemeninne Samaariyan de7iza derey ubbay hessa Xoossi ooththidayssa erana; otoroninne moodheteththan dendidi,

¹⁰ «Xuubeppe oosettida gimbetti laalettida; nuni gidikko masettida shuchchan zaari gimbana; eththati qanxxettida; nuni gidikko isttasohon ziga laammana» gida.

¹¹ Hessa gishshas GODAY Eraasoone morkketa minththana; istta morkketa istta bolla denththeththidi ehana.

¹² Arshey mokkiza baggafe Aaraame biittaa asatinne arshey wulliza baggafe Filisxeeme biitta asati bantta doona hangidi Isra7eele mittana. Hessi ubbay haniinkka GODAA hanqoy irxxibeenna; iza kusheykka dendidasoppe simmibeenna.

¹³ Derezi gidikko bana shocida GODAAKKO simmibeenna; Ubbaafe Wolqqama GODAAKKA koyibeenna.

¹⁴ Hessa gishshas GODAY hu7enne goyna, zamba hagganne maqqa Isra7eeleppe issi gallas qeexana.

¹⁵ Cimatinne bonchchettidayti hu7e; wordo tamaarsiza nabeti goyna.

¹⁶ Hayssa deraa kaaleththizayti baleththeettes; kaalliza dereykka ogeppe kare kezidi toylattees.

¹⁷ Hessa gishshas GODAY naateththa naytan ufayettenna; yi7otassinne am7etas qadhettenna; ubbayka iita ooththizaytanne Xoossa yashshateth bayndayta; ubbaa asaa doonappe harassiza qaalay kezees; hessi ubbay haniinkka GODAA hanqoy irxxibeenna; iza kusheykka dendidasoppe simmibeenna.

¹⁸ Deraa iitateththi kindichchonne agunth xuuggiza tama mala; dhippi gida woray xuugettishin keziza cuwa tuussa mala sitti giidi pude kezees.

¹⁹ Ubbaafe Wolqqama GODAA hanqon biittay xuugettana; dereykka taman geliza miththa mala gidana; ishay ishas qadhettenna.

²⁰ Ushachcha baggara tuxxana; gido attiin gafa teqqenna. Hadirsa baggara maana; gido attiin kallettenna. Issoy issoy ba yelida nayta maana.

²¹ Minaasey Efreeme maana; Efreemeykka Minaase maana; istti issife gididi Yuhuda bolla dendana. Hessi ubbay haniinkka GODAA hanqoy irxxibeenna; iza kusheykka dendidasoppe simmibeenna.