ኢሳያሳ ቲንቢቴ 63 - Geeshsha Maxaafa

Xoossa Xoononne Izi Ashshiza Wolqqa

¹ Eedoome biittan diza Booxira katamappe zo7o seelo may7o may7idi yizay hessi izi oonee? hayssi bonchcho may7idi ba wolqqa gitateththan hemettishe yizay izi oonee? «Xillo haasayzaynne ashshanaas wolqqay dizay tana gidikkinaa!» gees GODAY.

² Ne seelo may7oy woyne gum7iza asata may7o mala ays zo7idee?

³ «Gum7izasohozan woyne tani tarkka yedhdhadis; kawoteththatappe oonikka tanara deenna; tani istta ta hanqon yedhdhadis; ta bashshankka istta dirxxereththadis; istta suuththi ta seelo may7o bolla dhacettides; ta may7oy ubbay moorettides.

⁴ Tani halo kessana gallassay ta wozinan dees; ta wozzana gallassayka gakkides.

⁵ Tani xeelladis shin maaddizay beettibeenna; maaddizaadey baynda gishshas tani malalettadis. Hessa gishshas ta qesey taas atoteth ehides; ta hanqoyka tana minththides.

⁶ Ta hanqon kawoteththata yedhdhadis; ta bashshan istta maththosadis; istta suuththaaka biittan gussadis» gaana.

Xoossay Isra7eeles Ooththida Kiyateth

⁷ GODAA kiyateththi, GODAY nuus ooththida ooso ubbaa gishshas, izi galatettiza oosoza gishshas, iza siiqozanne iza kiyateththa keena, Isra7eele keeththas izi ooththidayssa, ee izi ooththida lo7o oosota gishshas ta yootana.

⁸ GODAYKKA, «Tumukka; istti ta dereta; istti taas wordotontta attuma nayta» gides. Hessa gishshas izi istta Ashshizaade gidides.

⁹ Istta meto ubbaan ceecides; Iza duussaa erisiza kiitanchchay istta ashshides; izi ba siiqoninne ba maaroteththan istta wozzides. Kase aadhdhida wode ubbaan istta denththidesinne tookkides.

¹⁰ Istti gidikko makkallida; iza Geeshsha Ayanaakka mishisida hessa gishshas izi simmidi isttas morkke gidides; istta olides.

¹¹ Hessafe guye asay beni wodezanne Muse wode yuushshi qoppides; Ba dorsata heenththanchchatara ubbaafe kessidayssi izi awan dizee? Ba Geeshsha Ayana istta giddon woththidayssi ha7i awan dizee?

¹² Bonchchettida wolqqama qese, Muses ushachcha kushe bolla woththides; baas mernaas sunth kessanaas, haaththata istta sinththan shaakkides.

¹³ Paray aykkoy baynda bazzo biittara kanththi biza mala, isttaka ciimma giddora kaaleththi pinththides; hessa gishshas istti dhuphettibeettenna.

¹⁴ Duge zulle wodhdhiza mehe wude mala, GODAA Ayanay isttas shemppo immides; izi deraa hessaththo kaaleththiday, ne sunththaa bonchchisanaassa.

Maado Demmanaas Woossiza Woosa

¹⁵ Abeet GODAWU, dummatida, bonchchettidanne dhoqqu gida ne araataappe saloppe duge xeella; ne wolqqaynne ne mishettiza mishoy awanee? ne ashketeththaynne ne qadheteththi nuuppe haakkides.

¹⁶ Abrahaamey nuna erontta aggiko, Isra7eeleykka nuna akeekontta aggikokka neni nuus aawa. Abeet GODAWU, neni nuus aawa; Beniisofekka doommidi ne sunththay nuna wozzizayssa.

¹⁷ Abeet GODAWU, nuni ne ogeppe kezana mala, nu wozina tullisada nees yayyontta mala ays ooththay? Ne aylleta gishshas gaada, nees xinxxo gidida qommota gishshas gaada nuukko simma.

¹⁸ Guuththa wodes ne derey geeshshasohoza laattides; ha7i gidikko nu morkketi ne Keeththaa yedhdhida.

¹⁹ Hekko beniisofe nuni neyta; gido attiin istta neni haarabeekka; istti ne sunththankka xeygettibeettenna.